9
ኢታታ ቦላ ያና ፕርዳ
ዛማረታ ሀላቃስ ፃፈትዳ ዳዊታ ማዝሙረ
“ናአ ሀይቆን” ጌተትያ ጩꬃን የፀትያ ማዝሙረ
1 አቤት ጎዳዉ፥ ታ ነና ታ ኩመꬃ ዎዛናፐ ጋላታና፤
ኔኒ ኦꬅዳ ማላልስያ ኦሶ ኡባ ኦዳና።
2 ታኒ ነናን ኡፋይታና ሀሹ ጋና።
ኡባፈ ꬎቃ ፆሳዉ፥
ታኒ ነ ሱንꬃስ ጋላታ ማዝሙረ የፃና።
3 ታ ሞርከት ጉየ ስምያ ዎደ፥
ነ ስንꬃፈ ꬉበትድ ꬋያና።
4 ነ አራታን ኡታዳ ታዉ ፅሎ ፕርዳሳ፤
ታ ሞቱዋ ነ ፅሎተꬃን ኦይካዳሳ።
5 ኔኒ ካዎተꬃታ ሴራዳሳ፤
ኢታታ ꬋይሳዳሳ።
ኔኒ ኤንታ ሱንꬃ መርናዉ ቁቻዳሳ።
6 ሞርከት መርናዉ ꬋይዶሶና፤
ኤንታ ካታማታ ኩመꬅ ላላዳሳ፤
ኤንቲ ኩመꬅ ዶገትዶሶና።
7 ሽን ጎዳይ መርናዉ ካዎትድ ደኤስ፤
እ ባ አራታ ፕርዳስ ጊግስስ።
8 ሀ ሳኣ ፅሎተꬃን ፕርዳና፤
ደረታ ሱረተꬃን አይሳና።
9 ጎዳይ ኡንኤትዳይሳታስ አትያ በሲ፤
መቶ ዎደ ገልድ አትያ ቆታ።
10 ነና ኤረይሳት ነናን አማነቶሶና፤
ጎዳዉ፥ ነና ኮየይሳታ የጋ አጋካ።
11 ፅዮነን ካዎትዳ ጎዳ ጋላትተ፤
እ ኦꬅዳ ኦሱዋ አሳ ኡባስ ኦድተ።
12 ሀሎ ከይያ ፆሳይ ጉክዳ ፅሎ ሱꬃ ዶገና፤
ቦረትዳይሳታ ዋሱዋ ቀል ጌና።
13 አቤት ጎዳዉ፥ ታዉ ቃታ፤
ታ ሞርከት ታ ቦላ ኤህያ መቱዋ በአ፤
ሀይቆፐ ታና አሻ።
14 ፅዮነ አሳ ግዶን ታኒ ኤቃዳ፥
ነ ጋላታ ኦዳና፤
ነ አቶተꬃን ኡፋይታና።
15 ካዎተꬃት ባንታ ቦክዳ ኦላን
ባንታዉ ኩንድዶሶና፤
ኤንቲ ዎꬅዳ ፅሄይ ኤንታ ቶሁዋ ኦይክስ።
16 ጎዳይ ባ ፅሎ ፕርዳን ኤረትስ፤
ኢታ አሳይ ባንታ ኢታ ኦሱዋን ኦይከትዶሶና።
ሳላህ
17 ኢታት ዱፎ ባና፤
ፆሳ ዶግያ ካዎተꬃት ኡባይ ኤንታዳ ሀናና።
18 ማንቆይ ኡባ ዎደ ዶገትድ አተና፤
መቶታንቹዋ ኡፋይሳይ መርናዉ ꬋየና።
19 አቤት ጎዳዉ ደንዳ፤ አስ ፆኖፖ!
ካዎተꬃት ነ ስንꬃን ፕርደቶ።
20 አቤት ጎዳዉ ኤንታ ኔኒ ያሽሳ፤
ካዎተꬃት አሰ ግደይሳ ኤሮ።
ሳላሀ።