ኔኒ ዋንዳ የገልሰ!

ሆለዳ ሎኦሶና።

ዎꬍያ ዴሻ ዉደ ዳኔስ።

ኡባይ መንተ የልያ፥

ኤንታ ግዶን አዉጫየይ ባይና ዶርሳ ዉደ መላ።

ነ ሃሳያ ዎደ ዳሮ ኡፋይሶሶና።

ናምአ ከስድ ጳልቅዳ ኦሮማነ ዳኖሶና።

እያ ቦላ ኦላንቾታ ጎንዳለይ ደእያ፥

ሙኩሉ ምኖ ኦላንቾታ ጎንዳለይ ካቀትዳ፥

ዳዊታ አዱሳ ግምብያ ዳኔስ።

ሎኦ ጪሻታ ግዶን

ምያ ዎሽኤ ማራታ ዳኖሶና።

ꬉማይ ክቻናፐ ስን፥

ካርበ ደርያነ እፃነ ዙማ ባዳ ሸምፓና።

ነናን ቦረትያባይ ባዋ።

ጋሞይ ፔእያ፥ ማሄይ አቅያ፥

አርሞና ሁጵያፐ ዎꬋ።

ነ አይፍያ ፄሎይነ ነ ቆꬍያ አሌቆይ፥

ታ ዎዛና ኡፋይሳን ጎሽስ።

ነ ሲቆይ ታና ዋን ኡፋይስ!

ነ ሽቶይ ኡባፈ አꬍድ ሳዌስ።

ነ ዶናፐ ኤስነ ማꬅ ፑልቴስ፤

ነ ማኦይ ልባኖሰ ሽቶዳ ሳዌስ።

ነ ዩሾይ ድረትድ ናገትያ አታክልተ በሳ መላ፤

ነ ሀራታስ ጎርደትዳ፥ ታዉ ዶየትዳ ፑልቶ መላ።

ኦሮማነይ፥ ዶረትዳ አታክልተ አይፈት፥

ናርዶሰ ጌተትያ አይፈት ደእያ በሳ መላ።

እፃናዳ ሳውያባት ደኦሶና።

ዱማ ዱማ ቅማመ አታክልተት ዶሎሶና።

ደኦ ሃꬅ በንትያ ኦላ መላ፤

ልባኖሰ ዙማፐ ጎግያ ሻፋ መላ።

ዱገሀ ባጋ ጫርኩዋዉ፥ ሃያ!

እያ ሳዎይ ቶንኩ ጎ።

ዳሮ ማልእያ አይፈታ ሞ።