ታኒ ታ አታክልትያ ግዶ ገላስ።

ታኒ ኤሳ ኡይꬅ ማስ፤

ታ ዎይንያነ ታ ማꬃ ኡያስ።

ሲቆ አላና ጋካናዉ ኡይተ።

ታ ሲቆይ ሀይሳዳ ያግድ ፐንግያ ቆንክሽን ስአስ።

ቦረይ ባይና ታ ሆለ፥

ታዉ ፐንግያ ዶያ።

ታ ብናናይ ቃማ ፑሰን እርፅስ።”

ታ ቶሁዋ ሜጨታስ፥ ዛራዳ ቅታዮዬ?

ታ ዎዛናይ እያ ግሾ ሴሌስ።

ፐንግያ ዶያናዉ ኮብያ ኦይክያ ዎደ፥

ታ ኩሽያፐ ካርበይ፥

ታ ብራꬍያፈ ሽቶይ ፆኬስ።

እያ ቃላ ስአናዉ ዳሮ አሞታስ።

ፄጋስ፥ ሽን ታዉ ኮይቤና።

ዋꬍዶሶና፤ ማዱንፅስዶሶና።

ታ ላፃና ቃር ኤክዶሶና።

ታ ሲቁዋ ደምኮ፥

ታኒ እያ ሲቁዋን ሀርግዳይሳ፥

ሀዳራ እያዉ ኦድተ።

ነ ላገይ ሀራታፐ ዋንድ ዱማቲ?

እ ሀራታፐ አይብን ዱማቲ?

ታሙ ሙኩሉ አደታ ግዶን እያ መል ባዋ።

እያ ብናናይ ሎኦነ ቁሮ መላ ካሬꬅ።

ማꬃን ሜጨትዳ ሆለታ ዳኔስ።

እያ መተርሻይ ካርበ ሽቶይ ፆክያ ዎራ ጪሻዳ ሎኤስ።

እያ አሳተꬃይ ሳንፓረ አልኦ ሹቻን አሌቀትዳ ዳንጋርሳ ዛለ መላ።

እያ ማላይ ዝጋን አሌቀትዳ ልባኖሰ ዙማ መላ።

እያ ኩመꬃ አሳተꬃይ ሎኤስ።

ታ ሲቆይነ ታ ላገይ ሀይሳ ዳነስ።