1 ओ अलि-अङाँमैं, अर्को ताँ, ङ्योए प्रभु येशू ख्रीष्‍ट धबै युबै ताँ नेरो ङ्यो खागु तसि खीने त्होबै ताँए बारेर ङिइ क्‍हेमैंने चु यो छ्युँ लम्:✡2:1 १ थेस ४:१५-१७ 2 “प्रभु युल् खाँइ बिसि पावलइ लोमिंइ,” बिबै स्योलिबै ताँ खाबज्यै या आक्वेंन्, क्‍हेमैंए सैं आआदिद्। ङिइ छले सुँइ आबि, प्ह्रिछ्यार आप्ह्रि, तोइ अगमबाणि आपों। 3 खाबज्‍यै या क्‍हेमैंलाइ लुल् आपिंन्, तलेबिस्याँ प्रभु येशू युब् भन्‍दा ओंसों ल्‍हें म्‍हिमैंइ परमेश्‍वरए बिरोध लब्मुँ, धै परमेश्‍वरए थेबै शत्तुर घ्रि त्‍होंब्‍मु। च ठिम बिरोध लबै दुष्‍ट शत्तुर आखिरर नास तल् त्‍हुब्‍मु। 4 म्हिमैंइ म्हाँदिरिबै ताँन् सैमैं भन्दा खी थेब् ग बिसि म्हिमैंइ म्हाँदिरिबै सैमैंए बिरोध चइ लम्। धै ङन् परमेश्‍वर ग बिसि च परमेश्‍वरए मन्‍दिरर क्हुँम्।✡2:4 दान ११:३६; इज २८:२ 5 ओंसोंन ङ क्‍हेमैंने मुँमा ङइ चु ताँ बिब तो क्हेमैंइ आमैं वा?

6 च चए ठिक त्हेर्न मत्‍त्रे त्होंरिगे बिसि तोगो समा खाबइ क्वेइ थेंइमुँ बिब क्हेमैंइ सेइमुँ। 7 तलेबिस्याँ चइ ओंसों ओंनोंन् खाबइ आसेल्‍ले न्हों-न्होंनो आछ्याँबै के लरिइमुँ। तोगो समा परमेश्‍वरजीन् च च्युथेंइमुँ, छतसि परमेश्‍वरजीन् आपिन् समा च त्होंल् खाँरिब् आरे। 8 लिउँइ परमेश्‍वरजी पिवासि च दुष्‍ट शत्‍त्रु त्‍होंब्मुँ, दिलेया प्रभु येशू युबै त्हेर्बै चारबै ह्‍वे नेरो खीए सुँउँइँले त्होंबै सोइ चलाइ नास लवाब्‍मुँ।✡2:8 यशै ११:४ 9 झाइले च दुष्‍ट शत्‍त्रुइ स्योलिबै ताँमैं पोंसि शैतान बिबै दुष्‍टए शक्‍तिउँइँले चइ म्हिमैंए उँइँर औदिबै प्लेटोयान् तबै केमैं नेरो स्योलिबै चिनुमैं लब्‍मुँ।✡2:9 मत्ती २४:२४ 10 धै नास तयाब्मैंने औदिबै स्योलिबै ताँमैं पोंब्मुँ। चमैं नास तयाब्मुँ तलेबिस्याँ चमैंइ क्ह्रोंसेंन्बै ताँ आक्वें धै छ्याँबै घ्याँरै या आप्र। 11 छतसि स्योलिबै ताँ क्वेंरिगे बिसि परमेश्‍वरजी चमैंए ङाँर बेल्‍ले स्योर तेल् ह्रबै सैमैं कल्मिंब्मुँ। 12 क्ह्रोंसेंन्बै ताँ आक्वेंसि आछ्याँबै केर सैं तोंब्मैं ताँन् दोषि ठर्दिरिगे बिसि परमेश्‍वरजी छ लब् ग।

13 प्रभुजी खोबै अलि-अङाँमैं, क्‍हेमैंए ल्हागिर ङिइ खोंयोंन् बिलै परमेश्‍वरलाइ धन्‍यबाद पिंल् त्हुम्, तलेबिस्याँ परमेश्‍वरए प्ल्हजी क्हेमैंलाइ पबित्र लमिंबै केउँइँले नेरो क्हेमैंइ क्ह्रोंसेंन्बै ताँ क्वेंबइले परमेश्‍वरजी क्‍हेमैंलाइ जोगेबर त्हाँइ। 14 ङिइ क्हेमैंने बिबै सैं तोंबै ताँउँइँले ङ्योए प्रभु येशू ख्रीष्‍टए मान क्हेमैंज्यै या योंरिगे बिसि परमेश्‍वरजी क्हेमैं हुइब् ग। 15 छतसि, ओ अलि-अङाँमैं, ङिइ क्‍हेमैंने बिमिंबै ताँ नेरो प्ह्रिछ्यार प्‍ह्रिबै ताँमैं सैंर मैंसि तारे पिरु क्हेमैं भोंसि तसि बिश्‍वास लसिन् टिरिद्।

16 परमेश्‍वरजी ङ्योलाइ म्हाँया लइमुँ धै खीए दयाम्हाँयाउँइँले ङ्योलाइ थेबै आशा नेरो सैं क्होल् लबै भों पिंइमुँ। धै ङ्योए प्रभु येशू ख्रीष्‍ट नेरो ङ्योए परमेश्‍वर आबाजी 17 क्‍हेमैंए सैं भोंब लमिंरिगे धै तोन्‍दोंरि छ्याँबै केमैं लबर नेरो छ्याँबै ताँमैं पोंबर ल्होमिंरिगे बिसि ङइ प्राथना लमुँ।