1 झाइले म्रुँ नेरो हामान म्रुँस्यो एस्तर ङाँर चब् चबर ह्‍याइ। 2 च अर्को त्हिंइर अँगुरए प्हा थुँदै म्रुँइ म्रुँस्यो एस्तरने धबै बिइ, “म्रुँस्यो एस्तर, तारे क्हिए सैंर तो मुँ? बिद्। क्हिइ तो ह्रिदा ङ्हाँइमुँ? च ङइ क्हि पिंस्यो। क्हिइ ङए आधा ग्याल्स ह्रिलैया ङइ पिंस्यो।”

3 छबिमा म्रुँस्यो एस्तरइ बिइ, “ओ म्रुँ, क्हि ङए फिर ल्हयो खम् बिस्याँ, धै ङए यो छ्युँ पिंदा ङ्हाँस्याँ, ङ नेरो ङए ह्रेंमैं जोगेमिंन्। 4 तलेबिस्याँ ङ नेरो ङए ह्रेंमैंलाइ सैवासि ङिए मिं-क्ह्रन् म्हवाद् बिसि म्हिमैंलाइ मुइ पिंइमुँ। ङिलाइ केब्छैं-केब्स्योमैं तबर मत्‍त्रे चुँवाब् ग बिस्याँ ङ आपोंन्ले टिमल, च्हौ च्योंबै ताँर म्रुँलाइ छोंरों ङ्हाँन् आलमल।”

5 चु ताँ थेसि म्रुँ अहासूरसइ एस्तरने बिइ, “छाबै के लबै म्हि खाब् जा? च खनिर मुँ?”

6 एस्तरइ बिइ, “ङलाइ सैल् म्हैबै ङिए शत्तुर चु दुष्‍ट हामानन् ग।”

छ बिब् थेसि म्रुँ नेरो म्रुँस्योए ओंसों हामान बेल्‍ले ङ्हिंइ। 7 झाइले म्रुँ ह्रिसइ मि धों तसि अँगुरए प्हा*7:7 दाखमाद्य, वाइन थुँरिबै क्ल्ह्‍योउँइँले रेसि दरबारए बगैंचाए बैरु ह्‍याइ। हामान बिस्याँ ह्रोंसए ज्यु जोगेबर म्रुँस्यो एस्तरने यो छ्युँ लरिइ, तलेबिस्याँ तारे म्रुँइ दण्ड पिब्मुँ बिब चइ सेल।

8 झाइले म्रुँ दरबारए बगैंचाउँइँले अँगुरए प्हा थुँबै क्ल्ह्‍योर धबै एखमा एस्तर रोबै सोफाए फिर हामान क्रेरिब म्रोंइ।

छाब् म्रोंसि म्रुँ ह्रिस खसि “चुइ ङए धिंर, ङए ओंसोंन् म्रुँस्योलाइ न्होंवाल् म्हैमुँ उ तो जा?” बिसि ओरइ। म्रुँइ छ बिबै तोदोंन् हिचडमैंइ हामानए लि हुवाइ। 9 झाइले म्रुँए ओंसों खोंयोंइ रारिबै हिचडामैं न्होंर्बै हर्बोनाइ बिइ, “ङ्ह्‍योद्, क्हिलाइ जोगेबै मोर्दकैलाइ च्योवाब् बिसि चुइ ह्रोंसए धिंर ङ्हिस्युसे ङ्‍ह मिटर नुबै त्हो क्योइमुँ।”

झाइले म्रुँइ बिइ, “छ बिस्याँ च त्होर चलाइन च्योवाद्।” 10 म्रुँइ छबिमा मोर्दकैलाइ च्योब् बिसि क्योबै त्होर चमैंइ हामानलाइन च्योवाइ। च लिउँइँ बल्‍ल म्रुँए ह्रिस म्हइ।