2 Korinta
Yeisu ana totugugunayao Korinta goi
adi leta aiyuwoina
Livala Aba Vaita
Leta ame ana livala aba vaita madabokina 1 Korinta ana livala aba vaita goi kugīte.
Leta ame Paulo be Timoti sietune ina Yeisu ana totugugunayao Korinta goi yaidi. Boi Paulo da Korinta adi leta aivasi iginidi. Leta vakuumgoina be leta aitonina sitagau. Leta aiyuwoina moe 1 Korinta. Leta ame moe leta aivasina ina da Korinta yaidi.
Nakona tala 56 sinaena leta ame Paulo igini. Tutayana igini nakona tauyana Mesadoniya parovinsi goi ikaaiyaka go, asa giyaina yoina Pilipai o Bereya.
Leta ame itoboineda tabobo dadavato. Kúpwana 1 ina 7 moe dadava tayamo go, kúpwana 8 be 9 dadava aiyuwoina, kúpwana 10 ina 13 dadava aitonina.
Leta ame goi Paulo itasígina bego moitamo toina Yeisu boi ikawoi paisewa iguinuwe, tauna ina sinapu ivateteli nakae kaga kaga siisowóduwo yaina. Aiyuwoina ina sinapu da Korinta yaidi manuna itasígina. Tayamo mou Korinta goi moe Paulo geya latuwona tomota siemaisi ina paisewa Vala Dedevina manuna. Tauna tomota maniyedi geya siuyaoneeta. Tuwaina ivatétala vininabeso ana sinapu manuna.
Ame letayana goi itoboineda tagite Paulo ina matakoi da Korinta yaidi.
Leta Luluna
1. Leta ana togínina be ana tokatuyaivayao 1:1-2
2. Yaubada ina kipáiwala manuna 1:3-22
3. Paulo ina kawoi be ina sinapu ilumavivisidi 1:23—7:16
4. Vininabeso Manuna 8:1—9:15
5. Paulo vamoléyana tayamo ina lovina itasigi 10:1—13:10
6. Paulo ina vaduduwo 13:11-13
Leta ana togínina be ana tokatuyaivayao
1
(2 Korinta 1:1-2)
Komi Yaubada ana totugugunayao Korinta goi nakae komi Yaubada ina kimasabayao liliumi Akeya Akeya: Korinta asa tayamo Akeya parovinsi sinaena. parovinsi ana madabokina goi, Gui 18:1.
Yau Paulo Guyau Yeisu ina vamoléyana Yaubada ina nuwonúwana goi be nakae siyada Timoti ami leta ame kaetune iwo komi yaimi.
Yaubada Tamada be ida Tomoya Yeisu Guyau idi kanuwóiya be idi tuboina bei sivinimi.
Yaubada ina kipáiwala manuna
(2 Korinta 1:3-22)
Yaubada aba yapali!†a Luk 1:68; Rom 1:25, 9:5; 2Ko 11:31; Epe 1:3; 1Pi 1:3. Tauyana ida Tomoya Yeisu Guyau ina Yaubada be nakae Tamana!†b Rom 15:6; 2Ko 11:31; Epe 1:3,17; 1Pi 1:3. Tamanayana nuwokaapisina go, kipáiwala liliudi unadi moe Yaubadayana. Ima mou liliudi goi ikipaiwolema e itoboinema ituli ta tokaiyakomou adi mou liliudi goi kakipaiwoledi Yaubada ina kipáiwala goi nakae boi kai bogina ikipaiwolema. Moitamo. Guyau ina gedageda kalotowoidi gagaina, e nakae Guyau goi Yaubada ina kipáiwala ivaituwe yaima. Tauna itoboinema semao kakipaiwoledi. E tutayana mou kababanedi, moe komi ami kipáiwala be ami yava manudi. Tutayana Yaubada ikipaiwolema, moe komi ami kipáiwala manuna. Kipaiwalayana ame nakae: Tutayana gedageda kai ima gedageda nakae kobaabanedi goi komeesayágana, e Yaubada ikipaiwolemi. Ago kayagoi komi imi gedageda goi bei kotogaga. Bogina kayagoi imi gedagedayadi kai nakae kobaabanedi go, Yaubada bei ikipaiwolemi nakae kai bogina ikipaiwolema.
Moitamo Esiya parovinsi goi mou kababanedi go, latuwoma ima mouyadi koyagoidokoidi, segowo. Mouyadi kalootowoidi moumou sisaki, nakae geya itoboinemeta toinima ima togaga goi katogaga, tauna nukotoma itopa; ima lotówana kalotowoidi nakae bei kakámasa. 1Ko 15:32. U. Toinima nuwoma goi kanuwonúwana kama, ‘Bei takámasa!’ Tauna toinima ima togaga geya kanumiseeta, go sem Yaubada tokámasa ikaitaaoedi kanumise. 10 Tauyana aba vailai gagaidi goi iiyavema go, nava bei nakae iiyavema. Tauyana yaina kalotuta bego tuta liliuna bei iiyavema. 11 Komi nakae imi kawanoi goi kosiukōima. Latuwoma bego tomota badabadaidi sikauyagu Yaubada yaina ina kaiguyau yaima manuna; aiguyauyana moe tomota badabadaidi idi kawanoi pasina.
12 Moitamo itoboinema kakawanoi yaimi bego kokawanoi manuma. Ima uyawana gagágasa goi nukotoma geya isabutukoidita go, ima uyawana gagagasayana moe ame: Bego Yaubada pasina ima sinapu da poyapoya yaidi moe mooitamoina be maavadaina go, moe gagaina toina komi yaimi goi. Go ima sinapuyadi geya kada poyapoya ana nanamsa goi geya, go sem Yaubada ina kanuwóiya yaima goi. 13-14 Moe moitamo. Ami leta kogīte. Geya tayaamo kaga kavamoukoimi, go sem kaga liliuna letayana goi itoboinemi kokatuyaivi be koyagoi. Ego ame tuta tupwana koyagoima go, alotuta bego nava bei koyagoidoko kai pasima komi aedidimi bei kosamolai nakae komi pasimi kai aedidima kasamolai ida Tomoya Yeisu ina maliyalina goi.
15 Anumisa moe koyagoi, tauna guna nuwonúwana bego mainao ao avadademi bego guna vadadanayana pasina ami dedevina sivayuwoina kobabane. 16 Guna nuwonuwanayana ame nakae: Bego tutayana anonoina Mesadoniya go, ao avadademi. Niga tutayana Mesadoniya akalave, bego aiyuwoina ao yaimi. Moeko goi itoboinemi ma nimatoogu kovalavegu ana Yudiya. Gui 19:21.
17 E tauna moe bego aguinuwe go, niga geya itoboineguta. Go manakae? Guna yúpuna goi akatubaumi nakae tomota maniyedi bogina siwowokoigu? Geya akatubaumita! O nakona konuwonúwana tutayana ayúpuna, sakava ina sinapu goi toinigu mainao ayúpuna kagu, ‘U, bei ao.’ Go, guna nuwonúwana moitamo moe kagu, ‘Geya awoita.’ Moe nakae geya aguinuweeta. 18 E kina Yaubada aba numisa iyagoida! Ima livala yaimi goi geya kapoleta geya! Tutayana kama, ‘U, bei kao’, e ima nuwonúwana nakae bei kaguinuwe. Neta kama, ‘Geya kawoita’, nakae bei kaguinuwe. 19 Bogina koyagoi. Yeisu ina sinapu kasabookuliye. Yaubada Natuna, moe Yeisu Guyau, boi yau, Silovano be Timoti taiyao katalavaite yaimi. Moe Tauyana geya ipoleta kana, ‘U, bei aguinuwe’ go, ina nuwonúwana kana, ‘Bei geya aguinuweta.’ Go sem Tauyana goi Yaubada ina katótula sisowóduwo nakae idige. Gui 18:5. 20 Moe moitamo. Yaubada ina katótula liliudi Yeisu ina guinuwa pasina kana, ‘U, bei aguinuwe.’ Tauna nakae Yeisu goi Yaubada talatuwoko kada, ‘E nakae!’ Moe Yaubada ana taimámina manuna. 21 E Tauyana kai komi taiyao ikitogageda ida spwagógana Guyau taiyao pasina be nakae toinina umana ikinaveda moe Yaubada. 22 Tauyana ina kaba kinana ateda goi iyato moe Baloma Kimaasabaina. Balomayana goi tayagoi ina katótula bei iguinuwedi.
Paulo ina kawoi be ina sinapu ilumavivisidi
(2 Korinta 1:23—7:16)
Paulo ina vadádana iupavile
23 E Yaubada iyagoida yau abóbwara moitamo! Boi latuwogu bego guna bolagu yaimi avakilisi. Moe pasina geya awoita moeko Korinta. 24 Go moe geya bego imi numisa kalovinae geya, go sem kai komi imi tosavaiyuwo imi uyáwana manuna. Tauna imi numisa geya kalovinaeeta geya. Bogina koyagoi. Imi numisayana goi bogina kotaoyakavata!

1:1 Akeya: Korinta asa tayamo Akeya parovinsi sinaena.

1:1 Gui 18:1.

†a1:3 Luk 1:68; Rom 1:25, 9:5; 2Ko 11:31; Epe 1:3; 1Pi 1:3.

†b1:3 Rom 15:6; 2Ko 11:31; Epe 1:3,17; 1Pi 1:3.

1:8 1Ko 15:32.

1:16 Gui 19:21.

1:19 Gui 18:5.