20
Yeisu itaooyamna tetelina
(Madiu 28:1-8; Maki 16:1-8; Luke 24:1-12)
1 E wiki ana maliyalina vakuumgoina, níyala matavivina ikaipodume goi tupwana nava matamamaniwonina go, Meri guma Magidara vevina maniyedi taiyao sina valiwoga tukubuyana goi sikandobala tukubu tobuna ana kauboda gurewa sigite bogina pulipulina. 2 E tuwo silokoina sima Saimoni Pita be yau Yeisu ina kalo yaima goi Meriyana idigo kana,
‘Ida Tomoya wowona tukubu goi bogina sikabi sinave go, geya kayagoiyeta nako siyato.’
3 E tuwo yau Pita kasowóduwo kana tukubuyana goi. 4 E ama taiyuwokova kaalokoina go, yau woiligu Pita alokoinasave ana agimisowóduwo tukubuyana goi 5 asakululu tobuna goi asalogeba obáila karekoidi kaka agitedi. Ago geya asiuta. 6 E Saimoni Pitayana nakae mligu goi ilokoina ima tukubuyana goi isiu, arekoyadi igitedi, 7 tayamo moe obáila karekoina, tayamo máisina ana kareko boi Yeisu dabana goi ikaaiyaka. Ago máisina ana karekoyana geya obáila karekoina taiyao, go sem tupwana masigava goi bilibilina nakae ikaaiyaka. 8 E tuta amo goi yau nakae tukubu goi asiu arekoyadi agitedi, tuwo anumisa bego Yeisu bogina itaoyamna. 9 Bogina kuyagoi, namliyeta ina taoyamna, Gínina Kimaasabaina ana livala bego Tauyana itoboine tokámasa yaidi goi itaoyamna go, moe livalayana ana yagoina kai nava geya kayagoiyeta. 10 E tuwo kai ina tovatotowanayao ama taiyuwokova kakaluvila kana ima kasa.
Yeisu iisowóduwo Meri yaina tetelina
(Madiu 28:9-10; Maki 16:9-11)
11 E iya go Meriyana ikaluvilamna ina tukubuyana goi go, mana táiya tukubu moetala goi iitaoya. E tutayana itaitáiya, isakululu tukubuyana tobuna goi isaalogeba 12 go, anerose adi taiyuwo madi kwama poowoudi igitedi nako boi Yeisu wowona ikaaiyaka goi siitusobu, tayamo dabana goi, tayamo aena goi. 13 Tuwo Meriyana silatuwoko kadi,
‘Vavina, kaga unana kutaitáiya?’
‘Guna Tomoya sikabi sinave go, geya ayagoiyeta nako goi siyato’, Tauyana kaena.
14 Tutayana nakae ibóbwara, itugavila Yeisu igite iitaoya go, geya ikinaneyeta. 15 Yeisuyana kana,
‘Namoya, kaga unana kutaitáiya? Avatau kuulusale?’
Go iya Meriyana inuwonúwana bego Yeisu moe tánuwo ana tomatakavata tayamo, tuwo kana,
‘Tomoya, neta Tauyana kom kunave, kulatuwokōigu nako goi kuyato be ana akabi.’
Ago itugavilamna tukubuyana sinaena igitemnei. 16 E Yeisu kana,
‘Meri!’
Tuwo Meriyana itugavila ikanaiberiu kana,
‘Raboni!’
Raboni ana yagoina Tovatulúkwana Toolagaina. 17 E Yeisu kana,
‘Taabu kuyooisīgu. Nava geya atukoita ana Tamagu goi. E kūna sedao kulatuwokōidi giyakainava bei atuko ana yau Tamagu nakae komi Tamami yaina. Tauyana yau guna Yaubada nakae komi imi Yaubada.’
18 Tuwo Meri guma Magidara ima kai Yeisu ina tovatotowanayao yaima goi italavaita kana,
‘Ida Tomoya bogina agite!’
Kaga liliuna Yeisu ilaatuwoko nakae ilatuwokoima.
Yeisu iisowóduwo ina tovatotowanayao yaidi tetelina
(Madiu 28:16-20; Maki 16:14-18; Luke 24:36-49)
19 E bogina lavilavi maliyalina amo goi. Moe nava wiki ana maliyalina vakuumgoina. Ago kai Yeisu ina tovatotowanayama vada bogina kakatunibode nakae karoke go, sinaena kakaaiyaka unana kai Diyuu ima tovakumgoyao kamatoitedi. E tuwo vada goi kakaaiyaka go, Yeisu isowóduwo, nauyayanaima goi itaoya ilatuwokoima kana,
‘Yaubada ina tuboina yaimi.’
20 Moe ilatuwokoima ikavava, nimana be silalumina ivatulukoima. E tauna kauyáwana unana ima Tomoya bogina kagite. 21 E Yeisu aiyuwoina ilatuwokoima idigo kana,
‘Yaubada ina tuboina yaimi! Nakae Tamagu bogina ietunegu, e yau nakae aetunemi.’
22 Moe ilatuwokoima ikavava, yawoina isalauwe yaima goi kana,
‘Baloma Kimaasabaina kouyaōne. 23 Neta ava tomotava idi goyo konuwotaoidi, Yaubada nakae bogina inuwotaoidi. Neta ava tomotava idi goyo geya konuwotaoidita, Yaubada nakae geya inuwotaoidita.’†Mad 16:19, 18:18.
Yeisu iisowóduwo Tomasi yaina tetelina
24 E iya go Tomasi geya ikaiyaketa kai yaima goi tutayana Yeisu isowoduwomna yaima. Tauyana youyuwoina moe Didimosi. Iya tovatotówana tayamo yawou aiyuwo yaima goi. 25 E niga ima, kai tovatotowanayama kalatuwoko kadigo kama,
‘Ida Tomoya bogina kagite!’
‘Neta nere kiyauna nimana goi agitedi nakae nere kiyaunayana nimagu goi abisikonedi nakae silalumina abisikone, bei anumisa bego moitamo Tauyana kogite. Go geya, bei geya aanumisa’, iya Tomasi kaena.
26 Maliyalina ainima aito mlidi aiyuwoina kai Yeisu ina tovatotowanayao kakaaiyaka go, Tomasiyana taiyao. Kakaaiyaka, vada totomna bogina kakatunibode nakae karoke go, Yeisu isowoduwomna, nauyayanaima goi itaoya, idigo kana,
‘Yaubada ina tuboina yaimi!’
27 Ikavava, Tomasiyana ilatuwoko kana,
‘Nimam kuyosāle ameko kubisikōne go, nimagu kugitēdi. Nimam kuyosāle silalumigu kubisikōne. Taabu kunaanayūwo, go sem kunumisāmo yau maa yawoigu!’
28 Tomasi idigo kana,
‘Guna Tomoya be guna Yaubada!’
29 Go iya Yeisuyana kana,
‘Moe bogina kunumise unana bogina kugitegu ae? Avatauwa neta geya sigiteguta go, sinumisegumo, adi dedevina bogina sibabane.’
Buki ame ana masi
(Iyoni 20:30-31)
30 E tauna Yeisu ituli ta kaba kinana badabadaaidi tuwaina iguinuwedi kai ina tovatotowanayao matama goi. Amo aba kinanayadi buki ame goi geya aginidita. 31 Ego ava kaba kinana buki ame goi aaginidi, moe bego itoboinemi konumisa bego Yeisu moe Guyau, Yaubada Natuna go, imi numisayana pasina imi spwagógana Yeisu taiyao goi maa yawoimi vau.†Iyo 3:15-16, 6:47; 1Iy 5:13.