1 Avatauwa kita neta taanumisa bego Yeisu moe Guyau, Yaubada goi bogina tabíbina.†Iyo 1:13; 1Iy 2:29, 3:9, 4:7, 5:4,18. Neta Tamada tamataakoiye, e avatauwa Tauyana goi sibíbina nakae tamatakooiyedi. 2 Tutayana Yaubada tamataakoiye be nakae ina lovina takabikaaonedi, e moeko goi taayagoi bego Yaubada natunao moitamo tamatakoiyedi. 3 Moitamo. Yaubada ana matakoi yaida goi tagite ame nakae: Neta ina lovina takabikaaonedi. Go ina lovinayadi geya moudimo, go sem sikakapu, tauna itoboineda taguuinuwedi.†Iyo 14:15. 4 Moe moitamo. Yaubada goi tabíbina,†Iyo 1:13; 1Iy 2:29, 3:9, 4:7, 5:1,18. tauna poyapoya sinapuna tatogagasavedi go, ida kaba togagayana moe ida numisa. 5 E avatauwa poyapoya sinapuna sitogagasavedi? Neta kita taanumisa bego Yeisu moe Yaubada Natuna, poyapoya sinapuna tatogagasavedi.

6 Ame Tauyana, Yeisu Guyau, bwae goi be nakae ikaika goi‡Bwae goi be nakae ikaika goi: Ame livalayadi da Giriki niyadi nakae. Go adi yagoina geya imavadeta. Adi yagoina aito itoboinedi. Tayamo ame nakae: Bwae ana yagoina moe Yeisu ina bíbina go, ikaika ana yagoina moe ina kámasa. Tutayana tomota ibíbina, mainao bwae vavina goi isowóduwo namliyeta gómana isowóduwo. Neta bwae ana yagoina moe Yeisu ina bíbina, ameko goi Iyoni ivatulukoida Yeisu ina bibinayana moe kita tomota nakae. Aiyuwoina nakona bwae ana yagoina moe Yeisu ana sayóyova go, ikaika ana yagoina moe ina kámasa. Aitonina nakona bwae be ikaika aiyuwokova adi yagoina moe ina kámasa. ima poyapoya ame. Moe bogina tayagoi. Geya kada bwae kaka goi ima geya, go sem bwae goi be nakae ikaikaina goi. E ame dogoiyadi Yaubada Balomaina italavaitedokoidi, unana Balomayana moe Yaubada ana Nanamsa Mooitamoina ana tovagitákwana. 7 Moe moitamo. Yeisu Guyau ana kaba talavaita aito sikaaiyaka. 8 Aba talavaitayadi ame nakae: Baloma, bwae be ikaika go, nuwodi tayamo Yeisu manuna. 9 Moitamo tomota idi talavaita tanuumisedi go, Yaubada ina talavaita itogagasavedi. Moe moitamo. Tauyana ina talavaitayana moe Natuna manuna. 10 Tauna avatauwa neta Yaubada Natuna siinumise, atedi goi siiyagoi talavaitayana moe moitamo. Go avatauwa neta Yaubada geya sinumiseyeta, moe nakae Yaubada sivayoko topola unana ina talavaita Natuna manuna geya sinumiseyeta. 11 Ina talavaitayana ame nakae: Yaubada yawoida vata bogina ivinida†Iyo 3:36. go, yawoida vatayana ida spwagógana Natuna taiyao pasina tababane. 12 Avatauwa neta Yaubada Natuna taiyao siispwagógana, maa yawoidi vau. Go avatauwa neta Yaubada Natuna taiyao geya sispwagogoneta, e geya yawoidimo.

13 Ame livalayadi bogina aginidi siwo yaimi bego komi Yaubada Natuna ana tonumisayao bei koyagoi bego bogina maa yawoimi vata.†Iyo 3:15-16, 6:47, 20:31. 14 Go ida katepatu Yaubada matana goi ame nakae: Kaga takawaanoiye, neta Yaubada ina nuwonúwana nakae, bei inoveda. 15 Neta taayagoi ida kawanoiyadi iinovedi, e taayagoi kaga takawaanoiye, moitamo bei ivinida.

16 Tuwo neta siyami kogite goyo tayamo iguuinuwe go, goyoyana pasina Yaubada bei geya ilivisiyevataeyeta, kokawanōi tauyana manuna go, Yaubada bei iyolime. Go goyo tayamo ikaaiyaka neta taguinuwe, e Yaubada bei ilivisiyeda. Avatauwa yaida goi neta goyoyana iguuinuwe, e tauyana manuna taabu kokaawanōi. 17 Moitamo. Ava guinuwava neta Yaubada nuwona nakae geya moe goyo Yaubada yaina goi go, goyo maniyedi sikaaiyaka, pasidi Yaubada geya ilivisiyevataedeta.

18 Tayagoi avatauwa neta Yaubada goi sibíbina,†Iyo 1:13; 1Iy 2:29, 3:9, 4:7, 5:1,4. geya tuwaina sinapu goyo siguuinuwe, go sem Yaubada Natuna, Tauyana Yaubada goi ibíbina, ikalibodedi, tauna Togoyoinayana geya itoboineyeta ibisikonedi. 19 Bogina tayagoi da poyapoya liliudi Togoyoinayana nimana goi sikaaiyaka go, kita Yaubada ina bodao. 20 E nakae taayagoi Yaubada Natuna bogina ima be nakae nanamsa bogina ivinida bego Tauyana mooitamoina taayagoi be nakae Tauyana taiyao bogina taspwagógana. Tauyana moe Natuna Yeisu Guyau. Ame Tauyana Yaubada mooitamoina be nakae yawoida vata unana.

21 Natugowo, yaubada polapolayao kovakiilisīdi.