24
Yeisu ina taoyamna tetelina
(Madiu 28:1-10; Maki 16:1-8; Iyoni 20:1-10)
1 E wiki ana maliyalina vakuumgoina goi nobuyana nava matagougouna go, vevinayadi idi pútuma bogina sikatuubayasi sikabi sime Yeisu ana valiwoga tukubu goi. 2 E sima tukubuyana goi go, tobuna ana kauboda gurewa sigite, bogina pulipulina! 3 E tukubuyana goi sisiu go, ida Tomoya Yeisu wowona geya sibabaneyeta.
4 Geya tuwo nukotodi siwówana, idi nuwonúwana kadi, ‘Yeisu wowona nako?’ Nakae sinuwooleleu go, koroto adi taiyuwo madi kwama naamalidi matabuwodi sisowóduwo vevinayadi yaidi goi. 5 E vevinayadi sigitedi, atedi siyova, tuwo sisakululu go, korotoyadi sidigo kadi,
‘Vevina, kaga unana Tauyana maa yawoina go, tokámasa yaidi goi koolusale? 6 Tauyana ameko geya, go sem Yaubada ámasa goi bogina ikaitáoe. Konuwāisi boi Galili goi taiyao nava kokaaiyaka manakaena ilatuwokoimi kana,
7 “Itoboine Tomalatomota siyoisi toogoyoidi nimadi goi siyato be kerose goi situpatuko namliyeta maliyalina aitonina ámasa goi itaoyamna.” ’†Mad 16:21, 17:22-23, 20:18-19; Mak 8:31, 9:31, 10:33-34; Luk 9:22, 18:31-33.
8 Tuwo moitamo ina bóbwara sinuwopeyedi. 9 Anerose sibóbwara ikavava, vevinayadi tukubu goi sisowóduwo sikaluvila sina Yeisu ina tovatotowanayao yawou tayamo yaidi goi be nakae ina tosabokuliyao liliudi yaidi goi madabokina sitalavaite.
10 E vevinayadi moe Meri guma Magidara, Yoana be ituli ta Meri, tauyana Yemesa sinana, be nakae vevina maniyedi taiyao. Moe tauyadi Yeisu ina taoyamna manuna ina vamoleyanayao silatuwokoidi. 11 Ago kidi korotoyadi vevina idi livala sinove go, idi livalayana ana taiyakeka nakae sikautaotáwana, tuwo geya sinumisedita.
12 E kina go Pita itaoya, ilokoina ina valiwoga tukubuyana goi isakululu isalogeba imatavilavila go, areko kaka igite. Igite ikavava, itaoya ikaluvila ina ina kasa go, dogoiyana ina sowóduwo pasina ikainaopa.
Yeisu iisowóduwo
ana tosabokuliyao adi taiyuwo yaidi tetelina
ana tosabokuliyao adi taiyuwo yaidi tetelina
(Maki 16:12-13)
13 Tomota adi taiyuwo Yeisu ina tosabokuliyao yaidi amo maliyalinayana goi siiketoiya sinonoina asa tayamo yoina Eméusa manuna. Emeusayana moe 11 kilomita Yerusalema goi. 14 Siiketoiya go, ana kaibako sivaateteli.
15 Idi vatetalayana goi Yeisu kina iketoiya ima isakavatedi adi taiyuwo taiyao siiketoiya. 16 Go Yaubada nuwodi ikiwowonidi, tauna geya itoboinedita Yeisu sikinane. 17 E Yeisu kidi taiyao siiketoiya, idigo kana,
‘Kooketoiya kaga kovaateteli?’
Adi taiyuwo madi nuwomou sitaoya. 18 E koroto tayamo yoina Keliyopasi idigo kana,
‘Manakae? Kom amta Yerusalema goi kueogaoga go, geya kuyagoiyeta maliyalina mlida goi kaga siisowóduwo ae?’
19 Tuwo Yeisu idigo kana,
‘Go manakae?’
E kidi kadi,
‘Yeisu guma Nasareta manuna. Tauyana tokabivalavala tayamo. Yaubada matana goi be nakae tomota liliuma matama goi ina guinuwa be ina livala toogagaidi. 20 Ago ida Tonúwala Gagaidi be nakae ida tolovinayao Tauyana ina lovina siyato kadi,
“Itoboine ikámasa.”
Tuwo sinave kerose goi situpatuko. 21 E kai go kaalotuta bego Tauyana nakona Yaubada ina kinava bogina ima bei kita Isileli tubunao itateteda. Tuwo kanuwonúwana bei itaoyamna nakae idige, go geya, go sem ame bogina maliyalina aito ina kámasa mlina go, geya tayaamo kaga isowóduwo. 22 Nukotoma siwówana; ima nuwonúwana bego Tauyana nakona Guyau geya go, vevina maniyedi yaima goi nakae nukotoma sikiwowonidi. Maine nobuyana nava matagougouna goi sina Tauyana ana valiwoga tukubu 23 go, Tauyana wowona geya sibabaneyeta. E sima silatuwokoima anerose sisowóduwo yaidi goi sidigo kadi,
“Tauyana maa yawoina!”
24 Tuwo maniyedi yaima goi sina tukubuyana goi go, nakonakae vevinayadi sidigedige nakae sibabane. Ego Tauyana geya sigiteyeta.’
25 Go kina Yeisuyana idigo kana,
‘O komi tamogemogemi nakae dabami sikasa! Neta Yaubada ina tokabivalavalayao idi livala liliudi konumisedi! 26 Boi sidigodigo bego Guyau itoboine moe gedagedayadi ilotowoidi namliyeta Yaubada ana káeyana isiu bei ikalibúbuna.’
27 Tuwo Mosese ina buki goi be nakae tokabivalavala liliudi idi buki goi ivatowo go, kaga liliuna toinina manuna Gínina Kimaasabaina goi ilumavivisi yaidi. 28 Siiketoiya, asayana manuna sinonoina bogina sivakakana sina go, Yeisu bego inonoina ituli ta kasa. 29 Go kidi adi taiyuwokova simatakanikaniye kadi,
‘Geya. Bogina lavilavi. Níyala bogina ikavava, tauna kwaiyāka kai taiyao.’
Tuwo moitamo isiu ikaiyaka tauyadi taiyao.
30 Niga áika goi taiyao siitusobu, Yeisu beredi ikabi, manuna ikauyagu Yaubada yaina. Ikavava, ikivisi ikaiguyauye tauyadi yaidi goi. 31 E Yaubada nukotodi ikipolaledi,†Abv 3:5,7. tauna Yeisu sikinane. Ago yaidi goi Tauyana itagau. 32 Tauyadi taudiva sidigo kadi,
‘Moitamo. Enao goi taaketoiya, Tauyana ibobóbwara be Gínina Kimaasabaina ivatulukoida go, ida lotówana ilulutaoneda ae?’
33 Tuwo tuta amo goi sitaoya sikaluvila sina Yerusalema goi Yeisu ina tovatotowanayao yawou tayamo ma sediyao sibabanedi bogina situgúguna, 34 e sidigo kadi,
‘Ida Tomoya ámasa goi bogina itaoyamna, isowóduwo Saimoni yaina goi!’
35 Tuwo adi taiyuwokova nakae ana kaibako sivateteli enao goi kaga kaga siisowóduwo. Nakae Yeisu beredi ikivisi baige sikinane.
Yeisu isowóduwo ina tovatotowanayao yaidi
idi paisewa ivinidi tetelina
idi paisewa ivinidi tetelina
(Madiu 28:16-20; Maki 16:14-18; Iyoni 20:19-23; Guinuwa 1:6-8)
36 E nava moe dogoiyadi sivateetelidi go, kina Yeisu isowóduwo, nauyayanaidi goi itaoya ilatuwokoidi idigo kana,
‘Yaubada ina tuboina yaimi.’
37 E tauyadi sikaliwoisa nakae atedi iyova gagaina. Idi nuwonúwana bego baloma sigite. 38 Tuwo Yeisu idigo kana,
‘Kaga unana atemi iyova be nakae konanayuwo? 39 Nimagu aegu kogitēdi. Ame yau. Baloma geya wowonamo, geya lulunamo, tauna yau geya baloma geya. Kōma kobisikonēgu be kogīte, yau ma sakavaigu, ma lulugu.’
40 Moe ilatuwokoidi ikavava, nimana be aena ivatulukoidi. 41 E tauyadi siuyáwana go, sikainaopa go, nava geya sinumiseyeta. Tauna Yeisu idigo kana,
‘Awoinu kōme akáika.’
42 E tuwo íyana kaaivayaina giyaina sivini 43 ikabi matadi goi ikani. 44 E ilatuwokoidi idigo kana,
‘Ame yau guna livala boi nava yaimi goi akaaiyaka alatuwokoimi kagu,
“Kaga liliuna Yaubada ina Katukeda goi be tokabivalavala idi buki goi be Same goi siiginidi yau manugu itoboine simalatomota.” ’
45 Tuta amo goi nukotodi ikipolaledi, e itoboinedi Gínina Kimaasabaina siyagoi. 46 Ikavava, idigo kana,
‘Amo bukiyadi goi sigini bego Guyau, Yaubada ana Vadámana, itoboine bei gedageda be ámasa ibabanedi go, maliyalina aitonina goi tokámasa yaidi bei itaoyamna. 47 Aiyuwoina sigini bego Guyauyana yoina goi ina tosabokuliyao bei sitalavaita tomota liliudi yaidi goi bego situgavila, e bei Yaubada idi goyo inuwotaoidi. Ago ameko Yerusalema goi bei sivatowo sina asa liliudi goi sitalavaite. 48 Moe dogoiyadi toinimi matami goi kogitedi, tauna komi dogoiyadi adi totalavaitayao. 49 Konovēgu. Giyakainava kaga Tamagu bogina ikaatotule bei yau aetune iwo yaimi.†Gui 1:4. Go komi asa ame goi kokaiyāka ana kadókana Yaubada olagaema ina togaga goi ikitogagemi.’
50 E ibóbwara ikavava, inavedi Betani goi nimana ikatulágata go, ikaipakuyedi.
Yeisu itukotuko ina yábana tetelina
(Maki 16:19-20; Guinuwa 1:9-11)
51 Yeisu ikaipaakuyedi go, ikalavedi o tadigo kada, ‘Yaubada itukoe inave yábana.’ 52 Go kidi amoko goi sisakululu Yeisu yaina ikavava, madi uyáwana sikaluvilamna sina Yerusalema. 53 Ago tuta liliuna sinonoina Vada Kimaasabaina goi Yaubada siyaapaliye.