Tũpa Ñehengagüer FILIPENSES 1
PABLO REMBICUACHIA FILIPO PENDAR UPE
FILIPENSES
1
Pablo mahenduhasa Jesús reroyasar Filipo pendar upe
Che, Pablo, iyavei Timoteo oroico Jesucristo rembiguai. Aicuachía co che ñehe pẽu, pe Tũpa upendar Jesucristo rese peico vahe tecua Filipo ve, Jesús reroyasar rãrosar uve, seroyasar rese ihañeco vahe upe avei. Yande Ru Tũpa, yande Yar Jesucristo tape rovasa pe reco tuprɨ ãgua.
Pablo yeruresa Jesús reroyasar rese
Pe rese che mahenduhasa pɨpe, “Avɨye ndeu” ahe Tũpa upe yepi. Iyavei che ayerurese, arɨ rupi ayeroquɨ opacatu pe rese Tũpa upe che vɨharetesa pɨpe yepi. Esepia, oyoya yañepɨtɨvɨi Jesucristo resendar ñehesa icatuprɨ vahe rese, acoi pe seroya ramo suive. Che aicua co Tũpa omboɨpɨ mbahe avɨye vahe güemimbotar apo pe rese, ahe omboavɨye tuprɨ itera acoi arɨ pɨpe oyevɨse yande Yar Jesucristo.
Avɨye ité aipo rupi che pɨhañemoñeta areco opacatu pe rese. Esepia, che opoaɨsu ité. Opacatu niha oyoya yaipɨsɨ Tũpa porovasasa yepe co che roquendasave aĩ, anise que co cotɨ rupi aico mborerecuar rovai co ñehesa pɨ̃sɨrosa resendar repɨ ãgua iyavei amboyecua vaherã ahe ñehesa supi tuprɨ vahe yuvɨreco chupe. Tũpa oicua ité che opoaɨsu eteprɨ opacatu. Esepia, Jesucristo niha pe raɨsu uca cheu. Che aporandu vɨte Tũpa upe che yeruresa pɨpe: “Toicua tuprɨ oaracuasa pɨpe oyeaɨsu catu-catu iri ãgua yuvɨreco” ahe pẽu. 10 Ipɨpe sui peicuara mbahe avɨye catu vahe poravo ãgua yepi; ẽgüe peye aveira pe recocuer moatɨro ãgua peico. Evocoiyase ndipoi chira angaipa pe rese acoi Jesucristo ouse curi. 11 Perecora pe recocuer avɨye vahe ité Jesucristo ombou vahe pẽu Tũpa mboetei ãgua.
Cristo Pablo recovesa ité secoi
12 Che rɨvɨreta, aipota peicuara co mbahe tẽi co oyapo vahe yuvɨreco cheu, ahe ichui setá catu ava osendura Jesucristo resendar ñehesa yuvɨreco. 13 Evocoiyase opacatu mborerecuar guasu poravɨquɨsa pendar iyavei opacatu ambuae ava oicuapa che roquendasa Jesucristo rupi che guata sui tẽi yuvɨreco. 14 Iyavei setá eteprɨ yande rɨvrɨ che repiase soquendaprɨ che recose yuvɨreco, oyemonguerẽhɨ catu Tũpa Ñehengagüer mombehu ãgua osɨquɨyeẽhɨsa pɨpe. Yande Yar rese evocoiyase oyeroyá catu yuvɨreco.
15 Supi eté oime ava oñehe angahu tẽi vahe Jesucristo rese che reroɨ̃rosa pɨpe tẽi. Oime rumo amove ava oñehe tuprɨ Jesucristo rese opɨhañemoñeta tuprɨsa pɨpe. 16 Evocoi ava oñehe tuprɨ oporoaɨsusa pɨpe, ahe oicua cohave che roquendase yuvɨreco, “Co ñehesa Tũpa ñehe pɨ̃sɨrosa resendar, ahe supi eté vahe, ndahei temira tẽi” ahese. 17 Evocoi ambuae ava Cristo rese oñehe angahu tẽi vahe oyeupe nara tẽi oipota mbahe. Ahe che reco momara pota catu co che roquendasave che rẽi vɨteseve. 18 Mara etemo che areco aipo mbahe-mbahe tẽi viña. Yepe amove ava ipɨhañemoñeta rai yuvɨreco viña, opacatu rumo ñehesa Cristo rese. Ahe niha che mbovɨha.
Che mbovɨha catu aveira. 19 Esepia, che aicua co opacatu mbahe-mbahe tẽi sui añepɨsɨrora pe yeruresa pɨpe iyavei che pɨ̃tɨvɨira Jesucristo Espíritu. 20 Che aipota ité, asãro avei opacatu che recocuer sui che chĩẽhɨ ãgua añehe vaherã opacatu che sɨquɨyeẽhɨsa pɨpe. Evocoiyase yepe amanora, anise aicovera, tomboetei catu ava Cristo che recocuer repiase yuvɨreco. 21 Esepia, Cristo che recovesa ité secoi; amanose rumo, avɨyeño itera cheu. 22 Aicove vɨtese co ɨvɨ pɨpe, aicatura aporavɨquɨ tuprɨ yande Yar recocuer rese. Evocoiyase ndaicuai uma revo avɨyera cheu. 23 Ndaicatui co ñuvɨrío che pɨhañemoñetasa rereco: amove amano pota che so ãgua ɨvave Cristo pɨri. Ahe avɨye catura cheu viña. 24 Pẽu nara rumo avɨye catu aicove vɨtese co ɨvɨ pɨpe. 25 Sese che aicua aicove vɨte vaherã pe pɨ̃tɨvɨi vɨte ãgua, pe guata tuprɨ vɨte catu ãgua iyavei pe vɨharete catu ãgua pe Jesús reroyasa pɨpe. 26 Evocoiyase che rereco vɨtera peye pe pɨri. Ahese pe vɨharetesa pɨpe, “Imboeteiprɨ Jesucristo tasecoi” aipo peyera che repiase.
27 Co catu toyoya tuprɨ pe recocuer co ñehesa avɨye vahe Jesucristo resendar rese. Evocoiyase asose pe repia, anise amombrɨ aicose pe sui, asendu pota pe resendar ñehesa avɨye vahe, pe yemovɨracuasa resendar, pe pɨhañemoñetasa yoyasa resendar iyavei pe poravɨquɨ pĩratasa resendar pe poreroyasave co ñehesa poropɨ̃sɨrosa resendar rese. 28 Iyavei ndapeyembosɨquɨyei chira pe amotarẽhɨmbar sui. Evocoiyase ahe oicuara yuvɨreco chupe ité Tũpa omondora imocañɨ ãgua; pe rumo Tũpa pe pɨ̃sɨrora curi. 29 Supi eté ndahei Jesucristo recocuer reroya ãgua güeraño Tũpa oipota pẽu, sese pe yemombaraɨsu ãgua avei oipota. 30 Esepia, pe, che avei oyoya tuprɨ yaporavɨquɨ pĩrata yande amotarẽhɨmbar pãhuve yaico. Iyavei acoi pesepia yɨpɨndar che aporavɨquɨ pĩrata che amotarẽhɨmbar pãhuve vichico, iyavei cũritei peyandu mara ahe aporavɨquɨ pĩrata vɨte ipãhuve yuvɨreco.