Dehet deng
Lamtua Yesus anan in nutus sas
1
Ama Lamtua Allah hid le tunang Un Koo Niu ka maa
1-3 Ama Teofilus* Ngaal Teofilus se dais Yunanin nam nahin na, ‘atuil man in namnau Ama Lamtua’. Ni Lukas buk nomer dua la, man un dulan bel Teofilus. Ngat kon se Lukas 1:1-4. man in banan, sium boa-blingin deng au, Lukas.
Se auk buk hmunan nua ka, auk dul meman deng Lamtua Yesus in nuli ka totoang son. Nas, totoang asa man Un in daek son, nol totoang asa man Un in tui kit meman son nas. Un huil nal Un anan in nutus sas son. Atuli las tao sus Una nol tao tele Un son, mo Ama Lamtua Allah belen le nuli pait. Nikit Un nuli pait kon, Un tulu-balang Un apa ka bel Un anan in nutus sas. Oen net Un tutungus lako pes lelo buk aat, le oen tana noan, Un nuli baktetebes son. Un kon tekas noan, Ama Lamtua Allah nam Laih man in kil bandu. Un kon nutus oen nini kuasa deng Ama Lamtua Allah Koo Niu ka. Tao hidi beles ela lam, Lamtua Yesus sake pait lako sorga.
Totoang nas, auk dul netas son.
4-5 Oe mesan na, Yesus nakbua nol Un anan in nutus sas se leten Saitun na. Kon Un beles prenta noan,
“Nangan ne! Hmunan nu Yuhanis sarain atuli li nini ui tuun. Mo mi musti natang lelo il pait, ta Ama Lamtua le tao asa mes tene dui pait bel mia, Un le bel mi Un Koo Niu ka. Tiata, mi laok nadadai kota Yerusalem deken le. Mo natang se nia, didiin Auk Amang ngu bel Un Koo Niu ka se mia, banansila el Un in hid meman son na. Auk kon tek net mi ela meman son.”✡Lukas 24:49; Matius 3:11; Markus 1:8; Lukas 3:16; Yuhanis 1:33
Lamtua Yesus sake pait lako sorga
6 Dedeng Yesus nakbua nol Un anan in nutus sas sa, oen keket Un noan, “Papa! Kaim le keket elia: taon elola ko Paap nangan net hmunan nu negara Israel prenta un negara la esa ka. Ta Paap le sas-sao kaim deng atuil didang in prenta son nia ke? Tamlom kaim musti natang oras didang pait ta?”
7 Kon Yesus situs noan, “Mi boel keket nuting dedeng nga deken. Ta suma Auk Amang ngu sii man muik hak le ator un dedeng-lelon na. 8 Mo mam etan Ama Lamtua Allah Koo Niu ka maa tama se mi son, halas-sam mi haup kuasa. Hidi kam mi musti laok tek atuli las totoang deng Au. Tek atuil in se kota Yerusalem nol totoang ingu-iung in se propinsi Yudea, nol propinsi Samaria, napiut lako lius se apan-kloma ki suut-suut tas.”✡Matius 28:19; Markus 16:15; Lukas 24:47-48 9 Aa hidi ela lam, Yesus sake lako apan-dapa se oen silan. Un sake lako le nopen na kabut nalan tukun nam, oen ngat net Un pait lo son.✡Markus 16:19; Lukas 24:50-51
10 Oen ngat laok bus el apan-dapa nabale lam, suknahkitum muik atuli at dua dil se oen halin na, oen kai-batu las muti niu hilin. 11 Atuil at dua nas tekas noan, “Hoe! Atuil Galilea me! Tasao le mi langan tukun le ngat laok bus el apan nua lia? Apin mi ngat net nini mi matan nas esan son, Yesus sake lako apan nu didiin nopen na maa kabut nal Una. Mi net Un in saek lako ka elola lam, mam Un niu pait maa ka, kon ela.”
Oen nuting atuil didang le seda Yudas
12 Hidi kon, Yesus anan in nutus sas nius deng leten Saitun na, le pait lakos kota Yerusalem. Leten na katang deng kota la, nataka le kilu mesa.† Dedeng na, guru agama Yahudi las tao atorang noan, tom nol leol teen in dake kam, atuil Yahudi las boel laok katang deken. Oen ator le atuli laok katang dui deng kilu dua deken (lako-pait). In dula deng dais Yunanin esa se bango nia ki, tek noan, leten ni katang deng Yerusalem ma sama nol “lalan man atuli li bisa lakon se leol teen in dake.” Undeng na le kit tana noan, leten na katang deng kota la kilu mesa.
13 Maas lius se kota la kon, oen taam lakos se uma mesa, man oen pake le daad tahang se las. Hidim, oen saek lakos mana mesa, se um na hnoden dapa ka. Aan in nutus sas ngalan nas elia:
Petrus,
Yuhanis,
Yakobus,
Anderias,
Filipus,
Tomas,
Bartolomeos,
Matius,
Yakobus (Alfius ana ka),
Simun (deng partei Selot),‡ Kata ‘Selot’ nol kata ‘Patriot’, nahin na noan, Simun niam daid at mes deng partei pulutik pro-mardeka. Partei ni le nulut soleng pamarenta Roma la deng atuil Israel las ingu-dale ka.
nol Yudas (Yakobus ana ka)✡Matius 10:2-4; Markus 3:16-19; Lukas 6:14-16
14 Taom oen totoang nakbua tutungus le kohe-kanas nol dalen mesa. Oen kon kohe-kanas leo-leo nol Maria Yesus ina ka, nol ina-in tenga las, nol Yesus palin nas.
15 Oe mesan na kon, oen nakbua pait, nataka le atuli at ngatus buk dua. Kon nam Petrus hangu dili, le tekas noan, 16 “Ina-amang nol pali-kakang totoang! Bet mi nangan net Yudas nabale, man hmunan nu kil nol un atulin nas bua mes le laok daek Yesus sa. Totoang man in daid nol Yudas sa, meman musti ela. Lole hmunan hesa kua, Ama Lamtua Allah Koo Niu ka pake laih Daud, le dul meman deng Yudas ela son. 17 Ta hmunan nua, un nam mo kit atulin. Un kon daek leo-leo nol kita.”
18 (Mo dedeng Yudas hee hidi Yesus, kon oen kat nal duit in luling nas, le laok sos dale teb mesa. Dale na daid maan un in mate ka, lole un nahi hokobang se na, tiata un tain na sait, ta un tai-lutu nas lail putis totoang. 19 Hidi kon atuli las dehet apa baha laok baha, didiin totoang atuil man in daad se kota Yerusalem mas, ming deng Yudas in mate ka. Undeng na, tiata oen ngali dale na ngala ka, nini dais Aram noan ‘Hakeldama’, nahin na noan ‘Dale Dala’.)✡Matius 27:3-8
20 Petrus aa napiut noan, “Hmunan hesa kua, laih Daud dul meman son ne Buk in Naka-nahalit ta. Un dul noan,
‘Nang le un maan in dada ka, daid maan in ete tuun;
boel muik atuli daad pait se maan na deken.’
Hidim un dul pait noan,
‘Nang le un osa la belen lako se atuil didang tukun.’✡Buk in Naka-nahalit 69:25; 109:8
21-22 Tiata kit musti nuting atuil le seda Yudas. Kit nuting atuli mesa, man un leo-leo nol kit blaan son. Atuling na, musti atuil in dani nol Lamtua Yesus, leo-leo nolan mulai deng Yuhanis in sarain Yesus sa. Un kon musti net nol mata beas esa deng Lamtua Yesus in nuli pait ta, didiin Un in sake pait lako sorga ka.”✡Matius 3:16; Markus 1:9; 16:19; Lukas 3:21; 24:51
23 Petrus tekas hidi ela kon, atuil in maa nakbua se na ngas, tamang ngala dua. Atuling mesan ngala Matias, nol mesan na pait ngala Yusuf (man taom oen haman noan Barsabas, un ngaal didang nga, Yustus). 24-25 Kon nam oen kohe-kanas noan, “Ee, Ama Lamtua man in ne maan lalapa kua! Ama taan parsis totoang atuli li dalen. Yudas nahi le mate nang soleng un osa la son. Tiata Ama Lamtua tulu bel kaim deng atuil at dua nias, asii man Ama hulin le seda Yudas. Le halin nam kaim nikit un daid Lamtua Yesus atulin in nutus.” 26 Hidi kon oen pel lot deng atuil at dua nas. Kon nam lot ta nahi tom Matias. Tiata oen nikit una, le daid atuil in nutus, leo-leo nol at hngul esa kas.
*1:1-3 Ngaal Teofilus se dais Yunanin nam nahin na, ‘atuil man in namnau Ama Lamtua’. Ni Lukas buk nomer dua la, man un dulan bel Teofilus. Ngat kon se Lukas 1:1-4.
✡1:4-5 Lukas 24:49; Matius 3:11; Markus 1:8; Lukas 3:16; Yuhanis 1:33
✡1:8 Matius 28:19; Markus 16:15; Lukas 24:47-48
✡1:9 Markus 16:19; Lukas 24:50-51
†1:12 Dedeng na, guru agama Yahudi las tao atorang noan, tom nol leol teen in dake kam, atuil Yahudi las boel laok katang deken. Oen ator le atuli laok katang dui deng kilu dua deken (lako-pait). In dula deng dais Yunanin esa se bango nia ki, tek noan, leten ni katang deng Yerusalem ma sama nol “lalan man atuli li bisa lakon se leol teen in dake.” Undeng na le kit tana noan, leten na katang deng kota la kilu mesa.
‡1:13 Kata ‘Selot’ nol kata ‘Patriot’, nahin na noan, Simun niam daid at mes deng partei pulutik pro-mardeka. Partei ni le nulut soleng pamarenta Roma la deng atuil Israel las ingu-dale ka.
✡1:13 Matius 10:2-4; Markus 3:16-19; Lukas 6:14-16
✡1:20 Buk in Naka-nahalit 69:25; 109:8
✡1:21-22 Matius 3:16; Markus 1:9; 16:19; Lukas 3:21; 24:51