2
Khosoih Boei Simon kah Thangthuinah
1 Khosoih Boei Simon te bawkim benla mang tih a kho sungkueng thuk. Te phoeiah vaan la a ban a phuel rhep thangthui:
2 Kaimih kah Pathen thaom koek aw, nang bueng ni vaan kah a cim manghai neh suentae boeih ukkung la na om. Hlang muen neh mangkhak kawng dongah kho ka pam tuh tih ka patang uh coeng. Te dongah ka thangthunah he hnatun lah.
3 Hno cungkuem na saii tih te rhoek soah a tiktam la na uk. Tedae amah kah thadueng dongah aka hangdang hlang tah dan na tat.
4 Hnukbuet vaengah khaw, boethae aka saii boeih te na phae tih hlanglen hlang rhalh khaw tuiphu neh na khoe. 5 Sodom khopuei kah pilnam aka hoemdam rhoek te ngawn ham kat hmai na tueih pah. Amih kah boethae longpuei aka vai hlang thae duet rhoek ham sawt koila na khueh pah.
6 Na pilnam cim Israel sal la aka khueh Egypt manghai na toel vaengkah na thaomnah mah khuet tangkik coeng. Thinthah manghai boeih tah rhih om khosing nen ni na toel. 7 Na pilnam te caem neh leng neh a hlaak dae amih te Carhaek Tuili dung ah ni na buek sak. Tedae namah aka uepnah na na hlawt. Diklai pum he namah kah tumbaemnah khuiah ni a om pai. 8 Namah kah kopoekrhai tanah ne a hmuh daengah Israel ca loh thaomnah aka khuet Pathen nang te n'koeh uh.
9 Ka manghai aw, diklai pum he na saii tih te nueh ham khaw len aih. A cungkuem he na khueh ngawn dae Jerusalem he namah long ni na tuek. Te dongah ah ni nang kan bawknah uh bawkim he yoethen na paek. Heah he na thangpomnah kho aa neh na loh tih he bawkim khaw a yoeyah la namah bawknah neh koehnah hmuen la dawk na khueh. 10 Israel na lungnah he ba hoeng tlo. Te dongah ahnih tholhnah neh ka ngaihmang vaengkah ham ol na khueh. Thangthui ham ka lo vaengah he na hnatun bitni. 11 Na olkhueh khoembael hamkhaw uepomnah na khueh yoeyah.
12 Hnuk buet kah a tue te yet khuiah a pa rhoek te aka muen rhal loh patang vaengah khaw na hlawt coeng. 13 Te dongah kaimih kah a cim manghai aw, kaimih kah patangnah he solah. Na taengah ka tholh uh coeng. Ka rhal loh n'tumbaem coeng tih ka tat uh tloel. 14 He hlang thae loh kaimih kah kothae ngaithae a omtoem. Namah bueng hinyahnah hamla ka sak uh bawkim khuila kun coeng. 15 Na im tah vaan a sangkoek ah om tih tela aka cet thai khat khaw a om pawt te ka ming uh. 16 Lungma na ti dongah Israel pilnam he namah ham na coelh. Te dongah na thangpomnah om saeh tila hmuen cim he khaw a khueh.
17 Manghai Philopator neh a hlang rhoek loh boethae halang a saii dongah kaimih he dantatnah han khueh boel mai. 18 Amih kah thadueng loh bawkim a phae coeng. Te koinih luki rhoek kah bawknah hmuen la om vetih a hohi la poeh pawh ni.
19 Na taengah ka tholh uh he khodawk ngai lamtah kaimih soah sitlohnah tueng sak laeh. 20 Te daengah ni ngaihmang neh ngaidaeng rhoek loh namanh koeh ham laa a sak thai he. Ngaimongnah om sak ham kaimih m'bom lah.
Philopator Sokah Dantatnah
21-22 A cim Pathen, hno cungkuem aka suen tih a soah aka dawn loh Simon loh a yaak. Te dongah khohli loh caphoei yoeikoek la a yawn bangla Philopator te talh a boh. Philopator tah pahoi yuui tih cal thai voel pawh. A mangkhak neh a hoemdam te ni Pathen loh dan a tat coeng.
23 Philopator kah boei rhoek neh taengom rhoek tah thuen uh. A mae hma uh tih aka duek la a ngai uh. Te dongah anih te hlangping lakli lamloh a mawt uh.
24 Philopator te koep sae dae Judah rhoek taengah a yut moenih. Anih te vawpvawp a toel dae ta. Jerusalem lamloh a nong vaengah tah amih soah kosi a sah.
Philopator loh Judah a phaep
25 Manghai Philopator went Alexandria kah im la bal. Teah te Judah rhoek boeih te a phaep. Amah neh aka o a pueipo rhoek loh a thaphoh. Amih long te a thuem saii ham a ming uh moenih. 26 Philopator loh tae lek tae na pawt hil anah la sarhingkoi te a saii dae dam a ti pah moenih. Khopuei vangca kah khosa Judah rhoek taengah rhih om puen yilh a caak sak. Judah rhoek patang sak ham te Philopator te a paya rhoek loh muep a bom uh. 27 Te dongah amih te rhep a hnah uh.
Judah rhoek kah bawknah hmuen vongup ah imsang dongah kam a ling ca a tarhit.
28 Jews rhoek loh Greek pathen Dionysus taengah hmueih nawn kuekluek saeh. Te daengah nih he bawknah hmuen ah ka kun sak eh. Judah rhoek kah amih te cabu dongah boeih tael saeh lamtah mangmu thoo saeh. Te phoeiah amih te sal la om uh saeh. Hekah saii hem aka aal tah hnaemtaek saeh lamtah duek sak saeh.
29 Dionysus pathen kah muei la aka om dingpae hnah te Judah rhoek a vin dongah a mang daek pa uh. Amih kah hamsum a yol aka om te boeih pit la om saeh.
30 Pilnam loh a thae la a paek te Philopator loh ngaih pawh. Te dongah a dang kah ol te a rhaep tih kutnoek a khueh thil.
Judah hlang khat khat long nih a ngaih tih Dionysus pathen te a bawk atah Alexandria kah khosaknah hamsum te rhep paek la om ni.
Judah rhoek kah hlatnah
31 Alexandria kah Judah hlangvang long tah amah bawknah dongah uepomnah phu te paek ngaih uh pawh. Te dongah Philopator taengah kung hamla a bih uh. Teni amih ham a then ngai hno la a ngaiuep uh.
32 Tedae Judah hlang a yet ngai long tah amah bawknah te hnoo uh pawh. Ngawnnah te rhael a ngaih uh dongah cabu aka hutnah boei te kutdoe a paek uh. 33 Uepomnah neh aka cak Judah rhoek van long tah amih te khatkhat loh n'khang ni tila a tangnah uh. Philopator taengla aka kun boekoek Judah rhoek te a thina uh. Rhal bangla a poek uh amih neh khaw benbo uh pawh.