3
Mangai Wèq Cwìang 'Bìq Ta'mòq Tôiq
1 'Màng aih Au doi:
“Ô 'bài cwan da Jacôp
wa mangai wèq cwìang da Is-ra-ên tamàng beq!
Ma ùh xài pì enh tamàng bìac lem jang 'mòh?
2 Pì mangai git ca bìac lem
wa loq enh bìac dù,
luch akia jàn Au wa xah yŏc xech khoi enh caxènh wì haq.
3 Pì caq jam jàn Au,
luch đac akia
wa goh đac caxènh loh tang ha'nech,
hachoh tìah ca hachoh jam,
tìah ca jam ta gŏc.”
4 Hi khoi pì creo ca Chuaq,
mahaq Haq ùh tèo bàu.
Haq cadoc dađeh khoi ca pì
taiq pì khoi broq bìac ngang dù.
5 Cô bàu Chuaq doi:
“Ca 'bài mangai capoch bàu loq adroi,
aih 'bài mangai khoi broq ca jàn Au lam lac,
pì rùp bàu ca jàn, doi: ‘Catèm,’
tàng mangai leq am ca pì dahwèq caq,
mahaq anoi 'noh bìac tajêh poh
ca cabô ma ùh xùai am dahwèq ca pì.
6 Taiq nen aih, damang pì pi hnoq bìac mahno;
pì ŏi ta clam, ùh capoch bàu loq adroi leq;
can 'ngah pi ŏi ti pì mangai capoch thai Boc Plình aih,
jò dahì loh ca clam clôiq ca pì.
7 Pì mangai capoch thai Boc Plình jah camaih,
wa pì ngan tì jah 'bìq camaih;
pì dìq dŏng bàng dèh hadrò
taiq ùh jah i bàu tèo leq enh Boc Plình.”
8 Mahaq au, au jah bình halùih cwìang,
enh Yiang da Chuaq.
Au jah bình manoh bìac lem jang
wa padren dêh đòiq anoi 'noh ca Jacôp manoh tablàq da haq,
wa bìac tôiq lôi da Is-ra-ên.
9 Ô 'bài mangai wèq cwìang da hnem Jacôp,
wa pì ma wèq cwìang da hnem Is-ra-ên,
tamàng bìac cô beq.
Pì git ca trong lem jang wa i manoh git bìac da-adàng.
10 Pì jêh mangai đòiq broq phôq Siôn,
wa yŏc bìac ngang dù broq phôq Jê-ru-sa-lem.
11 Pì cwan hadrah tiaq dahwèq rŏt manoh đòiq hadrah;
pì pajàu hnài tiaq 'bac baha đòiq hnài;
pì mangai capoch thai Boc Plình ùh capoch tàng ùh nhàn 'bac jèn,
mahaq pì canòm ca Chuaq. Pì doi:
“Bìac ranàc ùh jah trùh ta bèn taiq i Chuaq 'nang ŏi ta bèn!”
12 'Màng aih, taiq pì,
Siôn 'bìq cai tìah ca wì cai taneh;
Jê-ru-sa-lem loh ca hech hoch!
Ta nòi wang da hnem cùh waiq jah plôh drudrèn!