101
Đawit Achìh
1 Au jah calêu padèch can xa-ŏch xam manoh loq waq wa can ta-atoq da Chuaq.
Chuaq ôi au jah calêu padèch hiniq Ìh.
2 Au joq 'nàng caq ŏi dìq jaq khôn rabiaq wa tiaq trong lem jang.
Chuaq ôi jò leq Ìh trùh ta au?
Au jah yŏc manoh lem jang
đòiq rìh ŏi ta hnem au.
3 Au ùh đòiq mat
au ngan bìac cleq ma 'mèq,
au git bìac broq da wì mangai khoi cađac Chuaq,
au ùh đòiq bìac dù top ca au.
4 Au jah dŏih đac bìac tango anang 'mèq 'mac enh manoh hèm da au,
au ùh hèm trùh bìac dù.
5 Au jah broq hatenh đac bìac loq capoch
'mèq ca mangai hatenh hatìa,
mahaq ca mangai leq loq khìn mangai wa i manoh loq padèch dađeh,
au ùh chìuq haq.
6 Mat au ngan chaq mangai leq loq wèq dèh bàu ta gùng au,
wì haq jah ŏi ti au,
mangai leq rìh tiaq trong lem jang
jah patìh ca au.
7 Mangai loq padô 'nùt
ùh jah ŏi ta hnem au,
mangai loq capoch cwàiq
ca au ùh jah yòng enh ngìa ca au.
8 Rìm xroq au jêh
dìq mangai 'mèq 'mac ta gùng au,
hnan đac mangai ngan dù loh khoi
enh phôq da Chuaq.