10
Chuaq Jah Am Xôq Ramŏt Ca Juđa Wa Ep-ra-im
1 Waiq xìn Chuaq am mè jò padrang,
Chuaq ma broq loh camlet,
Haq jah am mè bình halùih,
mangai leq ji i cachiq caq ŏi ta đùng tamang.
2 Ma jah 'màng aih dua 'mù toq capoch bìac amòng,
'bài pajàu toq hnoq bìac lìq làn đòiq 'nùt;
wì anoi 'noh bìac apô 'nùt,
capoch bàu alòng ùh i ca lòiq cleq.
Taiq 'màng aih jàn Au lam lac
tìah ca con trìu xalep taiq ùh i ca mangai ban.
3 Can nòih Au khoi plôh tŏc tajraq ca 'bài mangai ban.
Au baxa 'bài mangai wèq cwìang;
taiq Chuaq ma wèq dìq ca 'bình plình khoi trùh hmàih ca calùh trìu Haq,
aih mangai Juđa;
wa broq wì haq tìah ca axêh tadêh loh nòi tajêh poh.
4 Enh hnem Juđa jah loh hmu xèm da mùm hnem,
enh wì haq jah loh long cŏc traiq,
enh wì haq jah loh panenh tajêh,
wa enh wì haq jah loh 'bài mangai wèq cwìang.
5 Wì haq jah wìa 'bài mangai dêh tanuq,
jôiq len lình 'noiq ta nòi tajêh poh tìah ca jôiq tràp ti trong.
Wì haq jah yòng tajêh ma jah 'màng aih Chuaq ŏi ti wì haq,
'bài mangai còi axêh jah camaih.
6 Au broq ca hnem Juđa jah dêh,
wa dèch dŏih mangai hnem Jôsep.
Au 'ràng wì haq hlài,
taiq Au xa-ŏch ca wì haq;
wì haq jah
tìah ca mangai 'nhòq lah 'bìq Au cađac,
taiq Au Chuaq Boc Plình wì haq,
jah rùp bàu ca wì haq dang xìn.
7 Ep-ra-im jah tìah ca mangai dêh tanuq;
manoh wì haq lem bùi tìah ca jò ôq alac nho;
con caiq wì haq jah hnoq wa lem bùi;
manoh wì haq jah lem bùi ta Chuaq.
8 Au hlôi ken
đòiq tagop yŏc wì haq,
ma jah 'màng aih Au khoi rŏt hlài wì haq;
wa wì haq jah bàc tam troi calah nèh.
9 Au jah rai wì haq ta 'bài jàn 'noiq,
wì haq ŏi ta 'bài Diac hangai jah hmàng hlài ca Au;
wì haq ban dèh con caiq hi càn wa wìh hlài.
10 Au jah 'ràng ahlài wì haq enh taneh Diac Aicàp,
gop hlài wì haq enh A-si-ri,
'nong wì haq mùt ta Ga-la-at wa Liban
trùh 'mòi ùh 'noh nòi ŏi.
11 Wì haq cwa diac raxìq xalep.
Haq broq rabùh diac raxìq loh ca hatenh;
dìq ca nòi jrùq da diac Ninh loh ca xŏt;
bìac catèh da A-si-ri 'bìq tacro,
long wèq cwìang da Aicàp jah hnhung đac.
12 Au jah broq ca wì haq dêh ta Chuaq,
wa wì haq jah lam hlài ta hiniq Haq,
Chuaq doi 'màng aih.