42
Agali mbira dindi taraha haru pu henegome Ngode Datagaliwabehondo bi lenego ogo
1 Nogo meme ale mini dia gabuame iba noa howa hége lebola ho yalu✡Iba 119.131
iba libule porago hendehende gerai piaganedagua
Ngode Datagaliwabe-o i̱ í̠ kegoria haparaho hole ibulene hameore lo ko.
2 Ngode Datagaliwabe í̠ holenehe kegoni.✡Iba 42.11, 43.5, 63.1, 143.6, Yar 10.10, Dan 6.26, Md 26.63, Lm 9.26
Iba noa biradagua i̱naga minime í̠ kegoria haparaho holeneore hamelo kogoni.
I̱na í̠ kego de handalu
í̠naga mini yaraga hole angi ibuliyadabe.
3 Mbiraga horombebi i̱ dugu biaabo halu✡Iba 80.5
tomo nane tomo i̱ninaga de iba no paliruli.
Horo bibahendengi wali agali i̱naga waitigi karume i̱hondo,
Í̠naga Ngode Datagaliwabe hayuagoni agoha kabe, laabo haga.
4 Ala bialu haruligo mitangi budai berodagua nde✡1 Sml 1.15, Yob 30.16, Iba 95.2, 100.4, Ais 30.29
i̱naga gubaliniha tandagaore bialu habe naharagola haruli.
Wali agali maru heba wabuni Ngode Datagaliwabenaga andaha pole poramaligobi
ti maha ibilo i̱na haru bamba haruligobi nde
mitangiore halu ko.
Wali agali turuhe damene wabuni buyu pialu
iba ganaru lagalaga bialu
Ngode Datagaliwabenaga mini yaraga hagahaga bima ibunaga andaha pole poramaligoore
mitangi haabo halu ko.
5 Ai nde áyu i̱ore miniha turu naheore haabo kogoni aginagadabe.✡Iba 9.1, 38.6, Md 26.38
I̱naga miniha genda bialu lungulungu biaruagoni agiorenagadabe.
Ani biaruagoni bilo
i̱na i̱naga Ngode Datagaliwabeni mini hanaho holebero.
I̱naga Pele Ngiagabi i̱naga Ngode Datagaliwabebi kagonaga mini
i̱na lone mo yaraga holebero.
6-7 I̱ i̱ninaga dindini hewaria bo ba tagi haya handala dindi taraha o pu kogoni koria✡Iba 69.1-2, 88.7, Yna 2.3
i̱naga gubaliniha tandagaore bialu tumbudu biragola kogoni.
Ani biragola i̱naga mitangi mo tiga bialu
Ngode Datagaliwabe kagohayagi pelaruli.
Ibugua dara bulenego iba yaribu bu yu ibilaradagua
i̱naga mini dara buleneme bu dambi haga.
Genda tara tara bulenego Hari Hemono howabi Hari Misa howabi
iba dugutagi halu ue lama Yodanaha pugulupebe biradagua biragola
birama iralu i̱ namu labehe kogoni.
8 Ani kogonigo Anduane Homogo gubalini haho wiaabo haga kago✡Iba 16.7, 57.3, 63.6, 149.5
ibugua horongi ibunaga gubalini holene ogoni walia helo hameledo.
Ibugua ani birago hondowa
i̱na mbiraga iba gana lo mialu
i̱ holene ngiagane tene Ngode Datagaliwabe kago
ibuhondo bi ogoni lolene hameledo.
9 I̱naga waitigirume bolilono i̱naga mo wiaga Ngode Datagaliwabe kagohondo,
Í̠na i̱ aginaga embedaho waharibe, laro.
I̱naga waitigi karume i̱ bo hengedo waharagola
tandaga narogo naabo holiya kego aginagabe.
10 Tigua i̱hondo, Í̠naga Ngode Datagaliwabe hayuago agoha kabe, lalu
mege biaabo haragome i̱ore hengedope haabo haragola kogoni.
11 Ai nde áyu i̱ore miniha turu naheore haabo kogoni aginagadabe.
I̱naga miniha genda bialu lungulungu biaruagoni agiorenagadabe.
Ani biaruagoni bilo
i̱na i̱naga Ngode Datagaliwabeni mini hanaho holebero.
I̱na i̱naga Pele Ngiagabi i̱naga Ngode Datagaliwabebi kagonaga mini
i̱na lone mo yaraga holebero.