Wat Hannah Pray
1 ✡ 2:1: Luke 1:46-55; 2:52Den Hannah pray lidis:
“Da One In Charge make me feel real good inside.
Cuz a all da stuff he wen do, az why I stay feel lidat now!
An now I real strong so I no need worry notting.
An I no shame fo face da peopo dat stay agains me an talk big agains dem.
Cuz you da One dat get me outa trouble,
I stay good inside!
2 “No mo anodda god dat mo awesome an spesho den you, Da One In Charge!
You da One, da ony One!
You oua God, an you stay solid, jalike da bigges rock!
No mo any odda god dat stay solid jalike you!
3 “Eh you guys! Shut yoa mout!
No talk like you get big head awready!
Cut da pilau attitude, aah?!
Cuz Da One In Charge, he da God dat know eryting.
An he da One dat figga out awready
If da work somebody do, stay good o no good!
4 “Da muscle men army guys get bow an arrow,
But dey stay broke awready!
Oua guys, stay all bum out
An no can even stan up good,
But now dey goin come real strong!
5 An dose buggahs dat befo time get plenny food
An come real momona,
Now dey gotta bus ass fo find stuff fo eat.
But da peopo dat no mo food,
Now, dey no stay hungry no moa.
An da lady dat no can come hapai,
Now goin get seven kids.
But da muddah dat get plenny boys befo,
Now she no mo!
6 “Yeah, Da One In Charge, make peopo mahke,
An make dem come alive too.
Yeah, he take peopo down inside da Mahke Peopo Place,
An he bring um out.
7 Da One In Charge make some peopo lose dea stuffs.
An he make some peopo come rich too.
He make some peopo come jalike dey notting,
An he make some peopo come real big time.
8 Da One In Charge lif up outa da dirt an da ashes
Dose peopo dat no mo notting,
He let um sit wit all da alii guys.
He give dem da right fo sit on top da thrones,
An odda peopo goin show dem respeck.
“Dass cuz Da One In Charge own
All da deep places undaneat da world,
An he put da world on top um.
9 He goin take kea his spesho peopo, wea eva dey go!
But da bad kine peopo, dey goin mahke
An stay one dark place.
“An if one guy come strong,
Da powa dat he get, you know,
Neva come from inside him.
Come from Da One In Charge!
10 Dose peopo dat go agains Da One In Charge, he goin smash um down.
He even goin make da thunda, dat stay inside da sky, make dem all hamajang.
Da One In Charge da One goin judge da peopo all ova da world.
“He goin give plenny powa to da guy he wen pick fo be da king.
He goin make da guy he wen pick, come mo strong erytime.”
11 Den Elkanah dem go home Ramah side. But da boy Samuel stay back an work fo Da One In Charge. An Eli da pries guy stay in charge a Samuel.
Eli Boys Do Real Bad Kine Stuff
12 Eli boys, cuz dey no mo respeck fo Da One In Charge, dey pilau kine guys an dey do bad kine stuff. 13 An dey no do wat da pries guys suppose to do fo da peopo. Dis wat dey do: Weneva somebody make one sacrifice, an stay boil da meat, da guy dat work fo Eli boys come wit one pitchfork. 14 Dat worka guy push da pitchfork real hard inside da pot. An wateva meat da pitchfork bring up, Eli boys take um fo dem eat um. An dass wat dey do to all da Israel peopo dat make one sacrifice Shiloh side. 15 Mo den dat, even befo da guy burn da fat fo da sacrifice, da worka guy come tell um, “Eh! Give da pries guy some a da meat fo pulehu. Cuz he no goin take da meat dat awready boil. He ony take da raw kine meat.”
16 If da guy tell him, “Suppose to burn up da fat firs, aah? An den you can take wateva you like fo you,” da worka guy den goin tell him, “Not even! Give um now! O I jus goin grab um!”
17 Da way Da One In Charge see um, da ting dose pries helpa guys stay do was real bad, cuz dey make da sacrifice fo Da One In Charge jalike dey no give a rip.
Da Boy Samuel, Shiloh Side
18 Da boy Samuel, he wear da linen kine ves jalike one pries, an he do da pries kine work in front Da One In Charge. 19 Ery year his muddah make him one small robe, an wen she go wit her husban fo make sacrifice, she bring um to Samuel. 20 An ery year, befo dey go home, Eli like make one spesho ceremony fo Elkanah an his wife Hannah. He tell, “Hannah wen pray fo one bebe an she get um. Den she give da boy Samuel to Da One In Charge. An dass why Samuel no stay wit you guys now. So! I like Da One In Charge give you odda kids.”
21 Da One In Charge no foget Hannah. Afta dat, she born three boys an two girls. An same time, da boy Samuel grow up in front Da One In Charge.
One Talka Fo God Tell
Da Eli Blood Line No Goin Be No Moa
Da Eli Blood Line No Goin Be No Moa
22 Eli, he stay real ol an makule. But he still hear bout eryting his boys stay do, how dey make to da Israel peopo, an dat dey sleep wit da wahines dat stay work outside da door fo da Tent Wea Da Peopo Come Togedda Wit God. 23 So he tell his boys, “How come you guys make lidat?! I wen hear from all da peopo bout da real bad kine stuff you guys do! 24 Dass no good, you guys! Not good wat I wen hear bout da stuff dat you guys stay do! All da peopo a Da One In Charge dat come by hea, dey know bout um awready! 25 You know, aah? one guy do bad kine stuff agains anodda guy, Da One In Charge can come in da middo an make um right. But, if one guy do bad kine stuff agains Da One In Charge, he had it awready! Nobody goin come in da middo fo make um right!” But his boys no lissen wen dea faddah poin finga dem an scold um. Az cuz Da One In Charge awready like dem mahke!
26 ✡ 2:26: Luke 2:52Same time, da boy Samuel stay grow mo an moa. An Da One In Charge an da peopo tink good stuff bout Samuel.
God Talk Bad Bout Da Eli Ohana
27 Had one guy dat stay tight wit God an talk fo him. He go by Eli an tell um, “Dis one spesho message from Da One In Charge: ‘I wen show up awready to yoa ancesta guy Aaron an his ohana, da time dey stay slave guys inside Egypt unda da Pharaoh guy, aah? 28 ✡ 2:28 a: Outa 28:1-4; b: Pries 7:35-36An I wen pick yoa ancesta Aaron from all da ohanas inside Israel fo be my pries guy. He go up by my altar fo burn da incense, an he wear da pries kine spesho ves in front me. An, I give yoa ancesta Aaron ohana all da food fo you eat from da sacrifices dat da Israel peopo make wit fire. 29 So! How come you guys no mo respeck fo da sacrifice dat I tell da pries guys fo make inside my house?! An you, Eli, how come you show mo respeck fo yoa boys den you show fo me?! How I know all dis?! Cuz all you guys eat ony da bestes part a ery sacrifice dat my Israel peopo make fo you come fat. Dass how I know!
30 “ ‘Me, Da One In Charge, da God fo da Israel peopo. Az why I tell you dis: I wen make one promise dat yoa ohana, an yoa ancesta Aaron ohana, goin live in front me foeva. But cuz me Da One In Charge, I tell you dis too: No way goin be how stay now! Cuz da peopo dat show respeck fo me, I goin show respeck fo dem. But da peopo dat make to me jalike I notting, I goin put kahuna on top dem! 31 An now, da time stay come wen I goin make you an all da odda peopo inside yoa ohana mahke wen dey young. No goin even get one ol guy inside yoa ohana. 32 An you goin come bum out, cuz you goin see all da good tings I goin do fo da Israel peopo, an you no goin get notting. But from yoa ohana, no goin get nobody dat goin live long time! 33 Anybody inside yoa ohana dat stay alive an work in front my altar, dey ony goin do da kine stuff dat goin make you cry, an make you come sore inside. All yoa kids an grankids goin mahke wen dey young.
34 ✡ 2:34: 1Sam 4:11“ ‘Wat goin happen to yoa two boys, Hofni an Phinehas, goin show you how goin be. Da two boys goin mahke da same day. 35 Den I goin pick one a my guys dat I trus. He goin do da kine stuff dat I like, an he goin do um my way. I goin make his ohana strong, an I goin trus um fo do da pries kine work fo da ones I goin pick fo be da king, foeva. 36 Den, if still yet get anybody inside yoa ohana, dey goin come an go down in front da Main Pries Guy fo aks fo one piece silva an one small piece bread. Dey goin beg, “Jus let me do one a da kine jobs fo litto bit food fo eat.” ’ ”
✡2:1 2:1: Luke 1:46-55; 2:52
✡2:28 2:28 a: Outa 28:1-4; b: Pries 7:35-36