15
Dey Sing Cuz Dey Win
1 ✡15:1: JShow 15:3Den Moses an all da Israel peopo sing fo Da One In Charge lidis:
“I like make one song fo Da One In Charge,
Cuz he awesome, da way he show how big he stay!
He wen throw da horses an da guys dat ride um inside da sea.
2 ✡15:2: Songs 118:14; Isa 12:2Da One In Charge, he da One dat make me strong an solid,
He wen come da One dat get me outa trouble.
He da God fo me, an I like tell, he da greates!
He stay da God fo my faddah guy too, an I goin tell, he da bestes!
3 Da One In Charge, he da One dat know how fo fight!
Da One In Charge, dass who him!
4 “Da Pharaoh guy wen sen army guys an wagons fo war.
But God, he throw um inside da sea!
Even da bestes officer guys dat Pharaoh get,
Dey go down awready inside da Red Sea.
5 Da deep watta cova dem.
Dey go down deep inside da watta jalike one stone!
6 “Eh! You Da One In Charge! Awesome, real strong yoa powa!
Wit yoa strong right hand, you wen bus up
Da guys dat stay agains us!
7 You so big, you wipe out erybody dat go agains you.
Wen you come huhu, you burn um up,
Jalike peopo burn up da junks dat stay
Afta dey harves da wheat.
8 You blow, an da watta pile up.
Da flood watta stan up strait,
Jalike get one wall fo da waves.
Inside da deep sea,
Jalike da watta come solid.
9 “Da guys dat stay agains us, dey tell,
‘I goin chase um! I goin catch um up!
I goin give my frenz dea share
A da stuff I goin take away from dem guys!
I goin do eryting I like do to dem!
I goin pull out my sword an kill um!
Wit ony my hands I goin make um run away from hea!’
10 But you, God, you wen make yoa wind blow,
An da sea cova dem up.
Dey sink down jalike lead inside da big watta.
11 “Eh! You Da One In Charge! From all da gods dat get,
No mo nobody jalike you!
No mo nobody stay awesome jalike you,
Da way you stay good an spesho
Wen you do stuff az real awesome
An awesome an unreal fo us!
12 You wen hold out yoa right hand,
An jalike da earth swallow dose guys,
An dey gone awready!
13 “You stay wit yoa peopo,
An show us wea fo go!
You wen pay da price fo get us outa trouble!
You strong, dass why you goin help us go
Da good an spesho place wea you stay.
14 Da odda peopos, dey goin hear dis,
Dey come sked an shaking!
Da peopo dat live inside da Filisha land,
Dey suffa plenny!
15 Dat time, da main leada guys from Edom,
Dey lose fight an no can do notting.
Da leada guys from Moab,
Dey ony stan dea an shake!
Da peopo dat live Canaan side,
Dey all donno wat fo do awready.
16 Dey so much sked an shaking, dey donno wat fo do.
Cuz a you, you strong. Dass why dey no move notting.
Dey jus stan dea jalike one stone an no talk notting,
Till yoa peopo go all da way da odda side, Da One In Charge,
Till da peopo go da odda side,
Dey da ones you wen free up!
17 “Eh! You Da One In Charge! You goin take yoa peopo
To da place you wen make ready fo you live dea.
Jalike you stay plant um fo grow
On top yoa mountain,
Da place you wen make fo you stay,
Da place dass spesho fo you, Da One In Charge,
Da place you, my Boss, wen make ready wit ony yoa hands!
18 Da One In Charge, he da King foeva an eva!”
19 Afta da horses from Pharaoh, wit da war wagons an da horse ridas, go inside da sea, Da One In Charge make da sea watta go back ova dem. But da Israel guys, dey wen walk thru da middo a da Red Sea on top da dry groun.
20 Den Miriam, dass Moses an Aaron sistah, she talk fo God too. She pick up one tammorine. She start fo dance, an all da odda wahines, dey go pick up tammorine too an dance in circle wit her. 21 Miriam, she give um dis song fo sing back to her:
“I sing fo Da One In Charge!
He awesome fo real kine!
Da horses an da guys dat ride um,
God throw um all inside da Red Sea!”
God Give Da Peopo Watta
Marah Side An Elim Side
Marah Side An Elim Side
22 Afta dat, Moses tell da Israel peopo fo go. Dey go way from da Red Sea an go inside da boonies Shur side. Three day, dey walk. But dey no can find watta dea. 23 Dey get to Marah an find watta, but dey no can drink da watta Marah side cuz bitta. (Dass how come da place get da name “Marah,” cuz dat mean “bitta,” dea language, you know.)
24 Da peopo, dey grumble to Moses. Dey tell um, “So, wat we goin drink now?!” 25 Moses yell fo help to Da One In Charge an he show Moses one tree. Moses take one branch an throw um inside da watta, an da watta come good fo drink.
Den God make one rule fo da peopo dat stay dea. Same time, God check out da peopo fo know if dey goin stick wit him. 26 God tell dem, “You guys gotta lissen good to me, yoa God, Da One In Charge fo real kine. You guys gotta stay do da right ting in front me, an lissen wat I tell you guys fo do, an keep all da Rules. If you guys do all dat, den I no goin wack you guys wit all da kine sick dat I wen bring fo da Egypt peopo. Cuz me Da One In Charge, an I da one dat make you guys come good.”
27 Afta dat, dey go Elim. Ova dea, get twelve puka wea da watta come outa da groun, an get seventy date palm tree. Az wea da peopo make camp nea da watta.