God An His Peopo Stay Awesome
1 Da One In Charge tell:
“You Jerusalem peopo,
Stan up! Shine jalike one light!
Cuz now, you get awesome light from me,
Da One In Charge.
I stay awesome,
An I jalike da bright light
Dat make you peopo come awesome too,
Jalike wen da sun come up an shine light fo you.
2 Look! All ova da world stay dark,
Jalike da dark cloud stay cova all da diffren peopos.
But Me, Da One In Charge, I da One stay bring da light fo you guys.
Wen peopo see how awesome you guys stay,
Dey goin know az me, God, make you awesome lidat.
3 Da peopos from plenny countries
Goin come by you guys fo see da light you get.
King guys goin come fo see da light too,
Cuz stay bright,
Jalike da sun come up fo you.
4 “Look up! Look all aroun you guys.
See all da peopo come togedda an come by you guys.
Yoa boys come from far away.
Peopo bring back yoa girls too.
5 Wen you guys see all dat,
You goin smile plenny!
You goin shake cuz you feel real good inside,
An yoa heart goin beat mo fas.
All da kine stuffs da trader guys bring
From da odda side a da ocean,
Goin be fo you, an not fo odda peopo.
An rich kine stuffs goin come fo you guys
From all da diffren peopos.
6 Goin get real plenny camels all ova yoa land.
Young camels from da Midian an Efah peopos,
Dey all goin come from Yemen
An bring gold an incense,
Fo tell erybody dat Da One In Charge stay good.
7 All da sheeps from Kedar goin come togedda fo you guys.
Da goats from Nebaiot goin be wat you guys need
Fo make good kine sacrifice on top my altar.
An I goin make my awesome Temple mo nice still yet.
8 “Wat dese tings dat look jalike dey fly jalike da clouds?
Jalike da doves dat stay fly to da puka in dea house?
9 Dey big boats wit sail,
Cuz me, Da One In Charge, I da One
Da peopo in da far islans stay wait fo.
Da big boats from Spain come firs
Fo bring yoa boys from one far away place
Wit da silva an gold dey get.
Dey come, cuz dey know
Wat kine god me, yoa God, Da One In Charge,
Da Good An Spesho God fo da Israel peopo,
An I da One make you guys come awesome.
10 “Peopo from anodda place goin come fix yoa town walls.
Dea kings goin help you guys too.
Befo time, I wen stay huhu with you guys
An wack you guys,
But now, I like do good tings fo you guys
An show you pity an love.
11 ✡ 60:11: JShow 21:25-26Yoa town gates goin stay open all da time.
Day time o nite time, dey no goin stay shut,
Az fo peopo bring rich kine stuffs fo you guys
From all da diffren peopos, thru da gates.
Wen dea king guys come by yoa town,
You guys goin make parade fo bring um inside.
12 Cuz da king o country dat no help you guys,
Da peopo goin mahke
An da country goin get wipe out.
13 “All da awesome stuff from Lebanon side
Goin come by you guys.
Wood from da tall pine tree,
Da short pine tree, da cypress tree,
All dis goin make
Da place dat stay spesho fo me, awesome.
14 ✡ 60:14: JShow 3:9Get peopo befo time
Dat wen make any kine to you guys,
Dea kids goin come by you guys
An go down in front you guys.
Erybody dat wen ack jalike dey tink you no good,
Dey goin go down on top da groun by yoa feets.
Dey goin call yoa town, ‘Da One In Charge Town,
Da Town Fo Da One
Dat Stay Good An Spesho fo da Israel peopo.’
15 “Befo time, peopo wen go way from you guys,
An hate you guys,
An nobody go pass thru yoa land.
But now, I goin make you guys come
Da ones dat erybody tell, ‘You da greates!’
An dey goin feel good inside
Bout you guys all da time.
16 Da peopo from odda countries an dea king guys
Goin make you guys come strong,
Jalike one muddah breas feed her bebe
Fo make um come strong.
An you guys goin know dat me, Da One In Charge,
I da One dat get you guys outa trouble.
I da One dat pay da price
Fo you guys no come slaves no moa.
I da Strong One fo da Jacob peopo.
17 I goin bring you guys gold an not bronze.
I goin bring you guys silva an not iron.
I goin bring you guys bronze an not wood.
I goin bring you guys iron an not stones.
Eryting goin come good fo you guys,
An dass da kine govmen I goin give you.
Peopo goin do wass right erytime,
An dass wat goin make you guys like do yoa work.
18 No goin get noise inside yoa land no mo
From peopo dat stay hurt each odda.
Nobody goin wipe out stuff
O broke up stuff inside yoa land.
But wen you guys build one town wall,
You goin give um da name
‘God get us outa trouble.’
An wen you guys put up one town gate,
You goin give um da name
‘Da One In Charge stay good.’
19 ✡ 60:19: JShow 21:23; 22:5You guys no goin get da sun fo light day time.
Da moon no goin shine fo make um bright fo you guys.
Me, Da One In Charge, I goin be da light fo you guys foeva.
I yoa God, an I goin make awesome kine fo you guys.
20 Da sun no goin go down fo you guys no moa.
Da moon no goin go dark fo you guys no moa.
Me, Da One In Charge, I goin come da light fo you guys foeva.
An you guys no goin come sad no moa.
21 “Dat time, all yoa peopo goin do da right tings.
Dey goin own da land foeva,
Jalike I plant one young plant
An put um dea.
Me, I do all dat
Fo peopo see dat I awesome.
22 Da mos litto bit peopo goin come tousan peopo.
Da mos small ohana goin come one strong country.
Me, Da One In Charge!
Wen da right time come,
I goin make um happen, right den an dea!”