5
No Mo Nobody Do Da Right Kine Stuff
(Mark 8:18)
1 “Run up an down da streets inside Jerusalem town.
Look aroun an tink hard.
Look inside all da open places.
If you guys can find one guy dea
Dat can tell wass right an wass wrong,
One guy dat fo real kine like know wass true,
Den I goin let go all da peopo inside Jerusalem
Fo da bad tings dey wen do,
An hemo dea shame.
2 No matta dey make one strong promise an tell,
‘Fo shua Da One In Charge stay alive,
Same ting I stay shua I goin do wat I make one promise fo do!’
Still yet dass ony bulai
Wen dey make one strong promise.”
3 Jeremiah tell, “Eh! Da One In Charge, fo shua you look
Fo peopo you can trus, aah?!
But dese Jerusalem guys, even wen you wack um,
Still yet, dey neva feel bad cuz a dat.
You wen smash um,
But no way dey goin learn fo do wass right.
Dey hard head, jalike one rock.
Az why dey no like change dea mind
An come sorry fo da bad kine stuff dey wen do.
4 Me, Jeremiah, I figga lidis:
‘Dese guys, dey pooa, dey no mo notting.
But dey stay stupid,
Cuz dey donno how Da One In Charge like fo dem live.
Dey donno wat dea God tell
Bout wass right an wass wrong.
5 Az why I goin go by da leada guys an talk to dem.
Fo shua dose guys know how Da One In Charge like fo dem live
An wat dea God tell
Bout wass right an wass wrong.
But all dem guys ack jalike cows
An broke off God yoke
An broke da rope dat tie dem wit him.
6 Az why da lions from da fores
Goin attack dem.
Da wild dogs from da up country boonies goin wipe um out.
Da leopards goin wait fo dem nea da towns
Fo jump whoeva go outside.
Dis goin happen cuz dey go agains me ova an ova,
An dey go da wrong way plenny times.’ ”
7 Da One In Charge tell: “How come you Jerusalem guys tink I gotta let you guys go?
Yoa kids wen dig out from me.
Wen yoa kids make one promise,
Dey call out to da gods dat not gods fo real kine,
Fo make shua dey goin do wat dey wen promise fo do.
I da One give dem eryting dey need.
But dey fool aroun wit da wahines dat not dea wife, in front da odda gods.
Dey all go togedda to da houses wea da wahines stay
Dat fool aroun fo get money fo da odda gods.
8 Jalike da horse hot up fo da wahine horses,
All da Jerusalem guys hot up fo some odda guy wife.
9 You tink I no need punish dem cuz dey make lidat?! No way!
You tink I not suppose to pay back dat kine nation?! Not even!”
Az wat Da One In Charge tell.
10 “Attack da grape farms an bus up ery row.
But no wipe all a dem out.
Broke off all da young branches,
Cuz dese peopo not da peopo a Da One In Charge.
11 Da Israel ohana an da Judah ohana,
Da way dey ack, no way I can trus dem!”
Az wat Da One In Charge tell.
12 “Da peopo talk bout Da One In Charge jalike he not importan.
Dey tell, ‘He no goin do notting!
No mo notting bad goin happen to us guys!
We no goin get kill wit swords o come hungry!
13 Dea guys dat tell dey talk fo God, dey ony mout.
Da One In Charge no tell dem notting.
Dey tell dat bad tings goin happen to us guys,
But we like wat dey tell, happen to dem!’ ”
14 Az why Da One In Charge, da God Ova All Da Armies, tell dis to me, Jeremiah:
“Cuz da peopo wen talk lidat,
Dis wat I goin do:
I goin put my words inside yoa mout.
Wat you tell dem goin come out jalike one fire,
An dese peopo, dey goin come
Jalike da wood dat da fire goin burn up!”
15 Da One In Charge tell, “Eh, you Israel ohana peopo!
I goin make one peopo from far away
Come attack you guys.
Dey was dea from long time.
You guys donno dea language.
An you guys no undastan wat dey talking.
16 Da arrows dey carry goin put you guys inside da grave.
All dose guys stay strong fo fight.
17 Dey goin eat up all da food you guys harves,
An all da odda food you get.
Dey goin kill all yoa kids.
Dey goin eat all yoa cows, sheeps, an goats.
Dey goin eat all yoa grapes an figs.
No matta you guys trus da big towns dat get strong wall fo proteck you,
Dey still goin wipe out all da peopo inside da towns wit dea swords.”
18 Da One In Charge tell dis too: “But wen dat happen, I still yet no goin wipe out all you guys. 19 Wen da peopo tell, ‘How come oua God, dass Da One In Charge a us, do all dis kine stuff to us?’ you, Jeremiah, goin tell um, ‘Da One In Charge tell, you guys wen dig out from me, fo work inside yoa land fo da idol kine gods from da diffren peopos. An den, dese diffren peopos goin make you guys work fo dem inside one land dass not yoa land!’
20 “Tell all da peopo dat come from Jacob
An make real shua da Judah ohana peopo hear dis:
21 ✡5:21: Isa 6:9-10; Ezek 12:2; Mark 8:18‘Lissen up, you stupid peopo dat no tink!
You guys get eyes, but you no can see.
You guys get ears, but you no can hear.’ ”
22 ✡5:22: Job 38:8-11Da One In Charge tell, “I da One you guys betta watch out!
You betta come sked a me!
Wen you stay in front me,
You guys goin shake cuz you sked!
I wen put da sand by da sea edge.
Da sand make da ocean stay dea foeva.
Da waves come in an go out,
An dey no can do notting.
Da wave make big noise,
But dey no goin go ova da sand.
23 But you guys, you still hard head.
Inside, you still like go agains me.
You make deaf ear an go da odda way.
24 Dey no talk jalike my peopo. Dey no tell:
‘Eh, we goin come sked an shake
An get choke respeck fo oua God, dass Da One In Charge a us!
He give da rain da right time hea,
Novemba kine rain, an March kine rain.
He make shua ery year get food ready fo harves.’
25 But cuz you guys stay do wass wrong,
Da time fo rain an da time fo harves food no goin come.
An cuz you guys stay do bad kine stuff,
Da good kine stuff no goin happen fo you guys.
26 “Some a my peopo, dey real bad kine guys.
Dey hide an wait fo grab peopo,
Jalike da guys dat trap birds,
Jalike dey put one trap fo wipe out odda guys.
27 Dey fill up dea houses wit all kine stuff
Cuz dey bulai peopo fo get um.
Dis jalike one bird catcha dat fill up cages wit birds.
Dey come importan an rich.
28 Dey come momona an dea skin come nice.
Dey do plenny bad kine stuff an no stop.
In front da judge dey no try help da kids dat no mo faddah
Fo make shua da kids get wat dey suppose to get.
Dey no do notting
Fo help da pooa peopo dat need help get dea rights.”
29 Da One In Charge tell, “You tink I no need punish dem fo all dis stuff?!
I goin punish dem!
You tink I no goin pay back dat kine peopo fo dis?!
I goin pay um back!
30 “Bummahs! One real skery, bad kine ting,
Wen happen inside da land.
31 Da guys dat tell dey talk fo God,
Wateva dey tell, dey bulai.
Da pries guys make da kine rules dey like.
An my peopo like fo eryting stay lidat.
But how you guys goin handle
Wat goin happen cuz a dat, aah?”