3
Job Talk
1 ✡3:1: Jer 20:14-18Afta dat, Job start fo talk to his frenz. He tell dat mo betta he neva born. 2 He tell:
3 “I like fo da day I born neva happen!
An I like fo dat nite no happen, wen dey tell,
‘His muddah wen get one boy!’
4 I like erybody foget bout dat dark day.
I like even God in da sky foget dat day eva happen.
I no like da light start fo shine dat day.
5 I like da shadows an da dark take ova dat day.
I like da clouds come down on top um.
An da black clouds take ova da light.
6 I like da mo dark kine stuff take ova dat nite.
No count um wit da odda days inside da year.
An no count um wit any month.
7 I like fo no odda bebes born dat nite,
An fo nobody hear somebody yell cuz dey stay good inside.
8 I like da peopo dat know how fo put kahuna on top one day,
Put kahuna on top da day I wen born.
Dose guys know how fo wake up da Leviatan sea monsta.
9 I like da early morning stars fo dat day come dark.
Da peopo dat wait fo da day time dat no goin come,
Dey no goin spock da early morning light.
10 I stay bum out, cuz dat nite da door fo da opu wea I stay, neva shut,
Fo me no see trouble.
11 “How come I neva mahke wen I born?
12 How come get somebody fo take kea me?
An fo give me breas milk?
13 Cuz if I wen mahke den,
I can lay down an res now.
I can go sleep an res.
14 I can sleep wit da kings an peopo dat know wass good fo do on top da earth,
Dat wen build places fo dem dat now stay all bus up.
15 Maybe I can sleep wit da leada guys dat wen get gold,
An fill dea houses wit silva.
16 How come dey neva hide me inside da groun
Jalike I one bebe dat mahke befo he born?
Jalike da bebes dat neva see da light from da day?
17 Ova dea inside da Mahke Peopo Place,
Da bad kine guys no can make humbug no moa.
Ova dea da guys dat stay wore out can res.
18 Ova dea da prisonas can res togedda an no need work.
Dey no hear da luna guy yell at um no moa.
19 Da guys dat not importan, an da guys dat stay importan,
Dey all stay ova dea.
Da boss let go da slave guy awready.
20 “How come God let somebody still see da light wen dey stay suffa?
How come God let peopo stay alive wen dey stay sad inside?
21 ✡3:21: JShow 9:6Fo real, dey stay wait fo mahke, but dey no mahke.
Dey like mahke mo den dey like get plenny rich kine stuff.
22 Dat kine peopo stay plenny good inside
Wen dey go inside da grave.
23 How come God let one guy jalike me stay alive
Wen dey donno wea dey going?!
Wen God put one fence so dey no can go no place?!
24 I ony yell an moan, an no can eat.
I stay moan loud cuz I stay crying plenny.
25 Erytime, I wen stay plenny sked bout dis kine stuff,
An now stay happen to me!
26 I no mo res inside. I no stay quiet inside.
I ony stay all bum out inside.”