Job Ansa Back Elifaz
1 Den Job ansa back Elifaz lidis:
2 “I like fo somebody measure
How plenny I stay bum out!
I like fo somebody weigh
How bad all da tings dat happen to me!
But nobody goin do dat.
3 Fo shua az mo heavy den all da sand on top da beach!
Az why I wen talk an no tink firs!
4 Jalike Da God Dat Get All Da Powa wen shoot me wit arrows,
An da arrows get poison dat jam me up inside!
God do all kine stuff dat make me sked!
5 Da wild donkey no make noise wen get grass fo eat.
Da cow no make noise wen get food.
6 But no mo nobody eat food dat no mo taste, ony if dey put salt.
Da white from da egg taste like spit.
7 I no goin even touch um.
Dat kine food make me come sick.
8 “Fo real, I like get da ting I wen aks fo,
But dat no happen!
I like fo God give me da ting I stay wait fo.
9 I like fo God tink az good fo smash me,
Fo wack me wit his fis an cut off my life.
10 An if I know he goin kill me,
Den I can still res easy,
No matta I stay suffa plenny an no come mo betta.
Cuz I neva hide from nobody
Da tings I tell bout da One Dat Stay Good An Spesho.
11 “I not strong enuff fo wait!
If I ony goin live short time, no need hang in dea!
12 You tink I strong, jalike da big rocks, o wat?!
You tink my body da kine dey make from bronze metal?!
13 Fo shua, I no mo powa fo do notting.
No mo nobody fo back me up an make eryting come good fo me.”
Frenz Dat No Help
14 “Wen somebody stay bum out, his frenz suppose to stay tight wit him,
No matta da guy no sked fo bag from Da God Dat Get All Da Powa.
15 But I no can trus my braddahs.
Dey jalike da streams dat flow today an tomorra no moa.
Da kine streams dat can ovaflow,
16 Wen da dark ice an da snow hide da watta,
Dey melt, an den da streams come big.
17 Den dey come dry wen no mo rain.
Dey no mo watta wen come hot.
18 Da guys wit horses an camels dat bring stuff fo sell,
Dey turn away from da road.
Dey go up wea eryting all look same same, an fo dem come wipe out.
19 Da guys from Tema wit horses an camels dat bring stuff fo sell,
Dey look fo da streams too.
Da guys from Sheba dat sell stuff look fo watta.
20 Dey come bum out cuz dey stay shua fo find watta.
Wen dey reach da place, dey stay real bum out, cuz no mo da watta.
21 “Same ting now, you guys jalike dose dry streams fo me!
You guys see someting skery, an you come sked.
22 I neva tell you guys, ‘Give me someting!
You guys rich, so pay somebody unda da table
Fo get me outa dis, okay?!
23 Get me outa da powa a da guys dat stay agains me!
Do wateva you gotta do fo da mean guys no grab me!’
24 “Show me how you guys stay right, an I goin stay quiet an lissen you.
Make me undastan how I jam up! 25 Wen somebody tell wass right, dat can hurt.
But wat you guys wen show proof fo?! Notting!
26 You guys like fix wat I tell,
Fo make um come right, o wat?
You guys tink wat I tell cuz I stay ready fo give up,
You tink I not serious, jalike ony da wind?
27 You guys, da kine dat even throw dice
Fo buy kids dat no mo faddah fo make um come yoa slaves.
You trade yoa frenz fo all kine stuffs cuz you no give a rip.
28 “But now come on, face me.
You guys tink I goin bulai in yoa face?
29 Back off! No judge da wrong way!
Tink one mo time, cuz you guys make jalike I do someting wrong,
No matta I ony do wass right!
30 You guys find out dat I tell stuff dass not right, o wat?
You guys tink I donno wass right an wass wrong?! Not even!”