Job Tell, No Way
Can Make Argue Wit God
Can Make Argue Wit God
1 ✡ 9:1: Job 4:17Den Job tell Bildad:
2 “Fo shua, I know az true, wat you tell.
But in front God, how one guy goin show proof dat he do da right ting, aah?!
3 No matta some guy like take God in front one judge,
An God aks him tousan question,
Da guy no can even ansa one!
4 God know wat fo do erytime, mo den erybody.
He get mo powa den anybody.
Nobody can go agains him an come out okay!
5 He can move da mountains,
Befo dey know wass happening.
He can huli dem wen he stay huhu.
6 He shake da earth from wea stay.
He make da poses undaneat um shake.
7 He tell da sun no shine, an da sun no come up.
He cova up da stars so dey no shine.
8 He da One dat stretch out da sky,
An no need nobody fo help him.
He walk all ova da waves inside da ocean
Fo show he stay in charge dea too.
9 ✡ 9:9: Job 38:31; Amos 5:8He da One wen make da Big Dippa, an Orion,
Da Seven Sistahs an da odda star pichas south side.
10 He do unreal kine tings dat nobody can figga out.
He do awesome kine stuff, mo den can count.
11 Wen he go nea me, I no can see him.
Wen he pass me, I donno he dea.
12 If he grab someting, nobody can stop him, you know.
No mo nobody goin aks him, ‘Eh! Wat you stay do, aah?!’
13 God no hold back fo come huhu.
Even da sea monsta an his helpa guys stay sked
An lay down in front God cuz he win ova dem.
14 “An if da sea monsta no can do notting,
Den me, how I goin argue wit God?
How I goin find da right words fo squawk agains him?
15 No matta I neva do notting wrong,
I no can tell him notting.
I ony can beg my Judge fo give me chance!
16 Even if I make him go in front one judge, an he go dea,
I no stay shua he goin show up an lissen me.
17 Mo like he goin smash me wit one storm.
He goin hurt me ova an ova fo notting.
18 He no goin let me breave.
He goin make me suffa an max me out!
19 If us talk bout who mo strong, God da One stay real strong, not me!
If us talk bout fo go in front one judge, who goin tell him he gotta come?!
20 No matta I neva do notting wrong,
Wateva I tell, goin soun jalike I wen do someting wrong.
Even if I no mo blame, wat I tell goin soun jalike I one crook.
21 “No matta I no mo blame,
I no give a rip bout me.
My life no mean notting to me!
22 Eryting stay da same!
Az why I tell,
‘God, he wipe out da peopo dat no mo blame,
Same ting jalike he wipe out da guys dat do wass wrong.’
23 Wen one bad kine sick wack da peopo
An dey mahke fas,
Az jalike he make fun a da peopo dat stay bum out,
Neva mind dey no do notting wrong.
24 Wen da guys dat do bad kine stuff take ova one land,
God cova up da judge guys eyes.
If az not da One dat make lidat,
Den who do um?!
25 “My days go mo fas den one guy dat run fas.
Dey fly away, but notting good happen to me.
26 Dey pass jalike da boats peopo make outa reeds.
Dey go fas jalike da eagle dive down fo grab food.
27 If I tell God, ‘I goin foget wat I wen squawk bout,
I goin change how I look, an smile.’
28 But still yet, I stay sked dat I goin suffa eryting,
Cuz fo shua you goin tell dat I get da blame.
29 Cuz you tink still yet dat I get da blame,
Ony wase time if I struggle,
Cuz notting good goin happen!
30 Even if I wash wit soap,
An clean my hands wit lye,
31 You goin dump me inside one pilau pit.
Den even my clotheses goin tink I pilau.
32 “God not one guy jalike me. No ways I can make argue wit him!
Me an him no can stan agains each odda in front one judge.
33 I like fo somebody come between us fo tell us who right!
Fo somebody put his hand on top God an me same time!
But no mo nobody fo do dat!
34 I like fo somebody tell God no wack me,
So den he no goin make me stay sked no moa.
35 Den I can talk an no stay sked a him no moa.
Cuz now, I shua I not da kine guy he tink me.”