Da Grape Farm Worka Guys
1 “I like tell you guys one story bout how stay wen God in da sky stay King. Dass jalike one boss guy dat own one grape farm. Da firs ting in da morning da owna go out fo look fo guys dat like work fo him on his grape farm. 2 He find some guys dat tell, ‘Yeah, we work fo you fo one day fo one silva denarius coin.’
“He tell um, ‘Kay den, go my grape farm fo work.’
3 “Den he go out bout nine clock in da morning. He spock odda guys stay standing aroun inside da open market, an no doing notting. 4 He tell um, ‘Go work inside my grape farm too, an I pay you guys wateva stay right.’ So dey go. 5 Den he go out bout noon time an one mo time bout three clock, an do da same ting.
6 “Bout five a clock he go out one mo time, an spock odda guys stay standing aroun, no doing notting. He tell um, ‘How come you guys stay hea all day an ony do notting?’
7 “Dey tell, ‘Cuz nobody give us job.’ An he tell um, ‘Den you guys go work inside my grape farm too.’
8 ✡ 20:8: Pries 19:13; Rules2 24:15“Wen da sun go down, da grape farm owna guy tell da luna, ‘Tell da worka guys fo come, an pay um dea money. Start wit da las guys, all da way to da firs guys.’ 9 So da guys dat wen start in da aftanoon bout five clock come firs, an da luna pay all dem one silva denarius coin. 10 Wen da firs guys dat start early come, dey figga dey goin get mo money. But all dem get one silva denarius coin too.
11 “Wen dey get dea pay, dey start fo grumble to da boss owna guy. 12 Dey tell, ‘Eh, dis not right! Da las guys wen work ony fo one hour, but den you give dem da same pay, jalike you give us. Us wen bus ass all day, even inside da hot sun!’
13 “But he tell one guy, ‘Eh my fren, I no cheat you. You wen tell you goin work fo one day fo one silva denarius coin, aah? 14 Kay den, take wat you wen work fo an go home. I like give da las guys da same pay I give you. 15 I do wat I like wit da money I get, you know. You jealous cuz I mo good to dem, o wat?’ ”
16 ✡ 20:16: Matt 19:30; Mark 10:31; Luke 13:30Den Jesus tell, “Da guys dat come las, goin come firs, an da guys dat come firs, goin come las.”
One Mo Time Jesus Tell He Goin Mahke
(Mark 10:32-34; Luke 18:31-34)
17 Wen Jesus dem go Jerusalem town, he ony take his twelve guys by da side a da road, an tell um, 18 “Eh, lissen up, us go Jerusalem. I da Guy Dass fo Real, you know. One guy goin turn me ova to da Main Pries guys an da teachas dat teach da Rules From God. Den dey goin tell I gotta mahke. 19 Dey goin turn me ova to da guys dass not Jew guys. Dey goin make any kine to me, whip me, an den kill me on top one cross. Den day numba three afta I mahke, God goin make me come back alive.”
One Muddah Tell Jesus
Fo Do Someting Fo Her Boys
Fo Do Someting Fo Her Boys
20 Den da Zebedee boys an dea muddah come by Jesus. She go down in front him, cuz she like aks him fo do someting fo her.
21 He tell her, “Wat you like?”
She tell him, “Bumbye wen you come king, try let my two boys sit by you, one by yoa right side, an one by yoa lef side.”
22 Jesus tell, “You donno wat you stay tell. You figga you guys can suffa jalike I goin suffa?”
Dey tell, “Yeah, can handle.”
23 He tell um, “Fo shua you guys goin suffa jalike me. But fo sit by my right side an by my lef side bumbye wen I come King, dass not fo me tell. My Faddah, he da One dat tell dat, an he awready stay make da spesho places ready fo da guys dat suppose to sit ova dea.”
24 Wen da odda ten guys hear dat, dey come all huhu wit da two braddahs. 25 ✡ 20:25: Luke 22:25-26But Jesus tell, “Eh, all you guys! Go come ova hea an lissen! You know, da leadas fo da peopos dat donno God, dey get any kine powa ova dem. Dea main guys get da rights fo tell dem wat fo do. 26 ✡ 20:26: Matt 23:11; Mark 9:35; Luke 22:26But fo you guys, no goin be lidat. Fo you guys, whoeva like be da leada, he gotta take kea you guys. 27 Wit you guys, whoeva like be numba one, he gotta do wat you guys tell him fo do. 28 I da Fo Real Kine Guy. I neva come hea fo peopo take kea me. I wen come fo take kea dem. I wen come fo let peopo kill me. Dass how I cut loose plenny peopo from da powa dat da bad kine stuff get ova dem.”
Jesus Make Two Guys Dat No Can See Come Good
(Mark 10:46-52; Luke 18:35-43)
29 Laytas, Jesus dem go away from Jericho town, an plenny peopo go wit dem. 30 An you know wat? Get two blind guys stay sit by da road side. Dey hear dat Jesus stay go by dem. So dey yell, “Eh, Boss! You da guy dat suppose to show up from King David ohana! Try pity us!” 31 Had choke plenny peopo ova dea dat scold dem an tell um fo shut dea mout. But dey yell even mo loud, “Eh, Boss, you da guy from King David ohana! Try pity us!”
32 Jesus stop an tell um, “Go come ova hea! Wat you guys like me do fo you?” 33 Dey tell, “Boss! We like see!” 34 Jesus feel real pity fo dem, an he touch dea eyes. Right den an dea, dey see, an dey go wit him.
✡20:8 20:8: Pries 19:13; Rules2 24:15
✡20:16 20:16: Matt 19:30; Mark 10:31; Luke 13:30
✡20:25 20:25: Luke 22:25-26
✡20:26 20:26: Matt 23:11; Mark 9:35; Luke 22:26