Jesus Go Inside Jerusalem
Jalike One King
Jalike One King
(Matthew 21:1-11; Luke 19:28-40; John 12:12-19; Songs 118:25-26)
1 Den Jesus dem come nea Jerusalem an come by Betpage an Betany, on top da Olive Ridge. Jesus sen two guys he stay teach. 2 He tell um, “You guys see dat small town ova dea? Go inside dea, an you goin find one young donkey dat stay tie up. Nobody ride on um yet. Hemo da rope from da pos, an bring um ova hea. 3 If somebody tell you guys, ‘Eh, how come you guys do dat?’ tell um, ‘Da Boss Jesus need um. Den he goin sen somebody fo bring um right back.’ ”
4 Da guys go an find da young donkey outside in da street. He stay tie up by da door, so dey hemo da rope from da pos. 5 Get some guys dat stan aroun, an dey tell, “Eh! Wat you guys stay doing? How come you hemo da rope from da pos?”
6 Jesus guys tell um jalike Jesus wen tell. Den da guys let um bring um. 7 Dey bring da young donkey by Jesus. Dey throw dea coats on top um, an Jesus sit on top um. 8 Plenny peopo put dea coats down on top da road too, jalike fo one king. Odda guys cut branches from da palm trees in da fields, an put um down on top da road fo show respeck fo him. 9 ✡ 11:9: Songs 118:25-26An plenny peopo stay walk in front an behind, an yell
“Hui! God goin take us outa da bad kine stuff we stay in!
God goin do plenny good kine stuff fo him.
Dis da guy dat come fo Da One In Charge!
10 God goin do good kine stuff fo us!
He goin give us one King jalike King David,
Oua ancesta guy!
God in da sky,
He goin take us outa da bad kine stuff we stay in!”
11 Den Jesus go inside Jerusalem, an go inside da open lanai fo da temple. He look aroun at eryting. But late awready, dass why he go back Betany wit his twelve guys.
Da Fig Tree Dat No Mo Fruit
12 Da nex day, wen dey go way from Betany fo go Jerusalem one mo time, Jesus come real hungry. 13 He spock one fig tree kinda far, dat get leafs awready, but not time yet fo fruit. He go ova dea fo check out if get early fruit. He come dea an find ony leafs. 14 So he tell da fig tree, “Nobody goin eat fruit from you no moa!” His guys hear wat he wen tell.
Jesus Inside Da Open Lanai Fo Da Temple
(Matthew 21:12-17; Luke 19:45-48; John 2:13-22)
15 Dey get to Jerusalem. Jesus go inside da open lanai fo da temple, an he start fo throw out all da guys dat stay buy an sell stuff ova dea. He huli da tables wea dey sell da spesho kine temple money fo give to da temple, an da benches fo da guys dat sell doves fo make sacrifice. 16 He no let nobody carry any kine stuff thru da open lanai fo da temple. 17 ✡ 11:17 a: Isa 56:7; b: Jer 7:11He teach um, “Da Bible tell, ‘My temple goin be one house fo all da peopos all ova da world fo pray inside.’ But you guys stay make um jalike one hangout fo crooks!”
18 But da Main Pries guys an da teachas dat teach da Rules From God hear dat. Dey try figga out how fo kill him. Dey sked a him, cuz da tings he teach, blow da peopo mind. 19 Wen da sun go down, Jesus dem go outside da town.
Jesus Teach Um Bout Da Fig Tree
20 Early da nex morning, dey pass by da fig tree, an see um all dry up from da root. 21 Peter rememba, an tell Jesus, “Eh, Teacha! Look da kine! You wen put kahuna on da fig tree, an now, all dry up!”
22 Jesus tell um, “Gotta trus God! 23 ✡ 11:23: Matt 17:20; 1Cor 13:2Az right! I like tell you guys dis too: You goin tell dis mountain ova hea, ‘Eh, get up! Go jump inside da ocean!’ If you trus God fo make dat happen, an no trus um ony litto bit same time, den goin happen lidat. 24 Dass why I tell you guys, wen you pray, eryting you tell God you like him fo do, trus him jalike you get um awready, an dass wat goin happen. 25 ✡ 11:25: Matt 6:14-15Erytime you guys stan up an pray, if you huhu wit somebody, you gotta let um go. If you do dat, den yoa Faddah dat stay inside da sky, he goin let you guys go too, fo all da bad kine stuff you guys wen do. 26 [But wat if you guys no like let odda peopo go, an like stay huhu wit dem? Den yoa Faddah in da sky, no way he goin let you guys go. He goin stay huhu cuz a all da bad kine stuff you guys wen do.]”
Wat Right Jesus Get Fo Do Wat He Do?
(Matthew 21:23-27; Luke 20:1-8)
27 Jesus dem come back Jerusalem. He walk inside da open lanai fo da temple, an da Main Pries guys, da teachas dat teach da Rules From God, an da older leada guys go by him. 28 Dey tell him, “Eh, wat kine right you get fo do dis kine stuff? An who give you da right fo do um?”
29 Jesus tell um, “I like aks you guys one question. You tell me, an den I tell you guys wat right I get fo do dis kine stuff. 30 Da guy John, wen he wen baptize, wea he wen get da right? God in da sky, he give um da right? O da peopo, dey give um da right? Try tell me wat you tink.”
31 Dey talk to each odda, an dey tell, “If we tell um, ‘God in da sky give um da right,’ he goin tell, ‘How come you guys neva trus him den?’ 32 But if we tell, ‘Da peopo give um da right,’ No way! You know us guys sked wat da peopo goin do, cuz erybody figga dat John wen talk fo God.” 33 So dey tell him, “Eh, us donno.”
Den Jesus tell, “Kay den, I no goin tell you guys from wea I get da right fo do wat I do.”
✡11:9 11:9: Songs 118:25-26
✡11:17 11:17 a: Isa 56:7; b: Jer 7:11
✡11:23 11:23: Matt 17:20; 1Cor 13:2
✡11:25 11:25: Matt 6:14-15