16
Pray An Trus God
One David kine song
1 Eh God, no let notting bad happen to me!
I trus you fo proteck me.
2 Dis wat I tell Da One In Charge:
“You, you da Boss fo me!
If no was fo you,
No mo notting good happen to me!”
3 Da peopo inside dis land
Dat stay spesho fo God,
Dey awesome!
Dey make me feel good inside
Wen I tink bout um.
4 But now, fo da peopo dat like hang out wit dose gods,
Dey goin suffa mo an mo plenny!
No way I goin go wit dem fo make one sacrifice
An pour blood on top da groun fo dose gods,
I no even goin tell da names
A da gods dey stay tight wit.
5 Eh! You Da One In Charge! Da main ting I get cuz I yoa kid,
I get you!
You, you make good tings happen fo me,
Cuz you stay in charge a eryting dat goin happen to me.
6 Az nice, da stuff you do fo me!
I stay real good inside
Cuz a wat you give me cuz I yoa kid!
7 I goin tell good tings bout Da One In Charge
Cuz he da One show me how fo live.
Even nite time, he make me know inside
Weneva I jam up.
Dass why I goin tell erybody
Dat he do good tings fo me!
8 I make shua I tink bout Da One In Charge,
Cuz he stay in front me foeva.
No mo notting throw me off,
Cuz he stay right dea by me.
9 Dass how come, I stay real good inside,
An I feel inside jalike I throw party!
Fo shua, wen my body stay res,
No mo notting bad goin happen to me.
10 ✡16:10: JGuys 13:35Cuz you no goin leave me
Inside da Mahke Peopo Place.
I stay tight wit you,
Az why you no goin make me know
How stay, inside da grave.
11 ✡16:11: JGuys 2:25-28, 31You, you erytime show me
Da way fo live fo real kine.
Wen I stay wit you,
I stay good inside to da max.
Az nice, cuz I live nea you all da time!