72
Song Fo Da New King
Fo King Solomon
Pray Fo Da King
1 Eh God! Teach da new king fo know
Wass right an wass wrong,
Jalike you know um,
An help him do da right ting erytime
Jalike you do um.
Dis fo da new king,
Dat wen born from da ol king.
2 Weneva he judge yoa peopo, God,
Let him judge um da right way.
Even wen he judge yoa pooa ting guys,
Let him make eryting
Come right fo dem.
3 I like da peopo stay do wass right,
Cuz den, da up country land
Goin give enuff food
Fo make eryting okay fo dem,
An da hill land
Goin give um plenny too.
4 Wen da king judge his peopo,
I like fo him make shua
Fo help da pooa ting guys.
An fo da ohanas dat need plenny,
I like fo da king get um outa trouble
An poun da ones
Dat like take away dea rights.
5 God, I like fo yoa peopo
Show you choke respeck foeva,
All da time da sun
An da moon stay shine,
Fo dem, dea kids,
An dea grankids, foeva.
6 I like fo da king make good tings
Happen fo da peopo,
Jalike da rain dat come down
Right afta dey cut da grass,
An jalike da passing showas
Dat make da groun get plenny watta.
7 All da time da king stay alive,
I like fo erybody stay do wass right.
I like fo eryting go good fo erybody
Foeva, till da moon pau shine.
King Fo Da Whole World
8 ✡72:8: Zek 9:10I like fo da king stay in charge
From one ocean to da odda ocean,
From da Eufrates Riva
To da mos far place inside da world!
9 I like fo da peopo dat live
Wea no mo watta
Go down on top dea knees
In front him.
I like fo da ones dat stay agains him
Eat dirt!
10 I like fo da king guys from Spain
An all da islans
Come back to oua king
Fo give um gifs.
I like fo da king guys
From Yemen an Ethiopia
Bring wat dey owe
Fo show he da boss fo dem.
11 I like fo all da king guys
Go down in front him.
I like fo all da nations
Stay his worka guys.
Da King Help Da Peopo Dat No Mo Notting
12 Az why da peopo dat need plenny,
An da ones dat no mo nobody
Fo help dem,
Wen dey yell fo help to dis king,
He goin get um outa trouble!
13 Da king, he no goin hurt da peopo
Dat no can do notting
An dat need plenny.
He goin keep dem alive
An get um outa trouble.
14 Wen odda peopo make any kine
To da pooa peopo
An bus um up,
Dis king goin pay da price
Fo make shua dey stay alive.
An if somebody make dem
Bleed an mahke,
Da king kea plenny bout dat,
Cuz dey spesho fo da king.
Pray Dat Eryting
Come Out Good Fo Da King
Come Out Good Fo Da King
15 Da king, I like fo him live long time!
I like fo peopo give him
Gold from Yemen.
I like fo peopo pray fo him all da time
An aks God all day
Fo do good tings fo him.
16 I like fo da land grow
Plenny food fo harves,
Dat grow food all da way
To da mountain tops!
I like da land get plenny fruits,
Jalike Lebanon!
I like fo eryting go good
Fo da peopo inside da towns.
I like fo da peopo come
Jalike wen da grass get flowas
All ova da country side!
17 I like fo peopo no foget
Wat kine king him,
Foeva, all da time da sun stay shine.
I like fo all da nations tell,
“God do good tings fo us,
Cuz a dis king an his ohana!”
An dey tell, “Dis king,
Fo shua he stay good inside!”
Book Numba Two Pau
18 I like erybody tell good tings bout God,
Da One In Charge,
Da God fo us Israel peopo!
Him da ony god dat do stuff
Dass awesome fo real kine!
19 I like fo erybody tell
Good tings bout him all da time,
Cuz dey know how awesome him!
I like fo erybody all ova da world
Know how awesome he stay!
Dass it! Pau.
20 Dass da las prayer in dis book
A prayers from Jesse boy King David.