79
Pray Cuz Da Nation All Wipe Out
One Asaf kine Song Fo God
79:1: 2Kings 25:8-10; 2Rec 36:17-19; Jer 52:12-14; 2Tess 1:8Eh God! Da diffren peopos,
Dey wen attack da land dass yoas.
Dey wen make da Temple pilau
Dat stay spesho fo you,
Fo us guys no pray dea now.
Dey wen bus up eryting
Inside Jerusalem town.
Dem odda peopos wen give
Da mahke bodies
A da peopo dat work fo you
To da scavenja birds fo eat.
Dey wen let da wild animals
Eat da meat from da bones
A da peopo dat stay tight wit you.
All ova Jerusalem town
Dey wen kill yoa peopo
An dump dea blood on top da groun
Jalike dey pouring watta!
No mo nobody fo bury yoa peopo!
Da peopos dat live aroun us guys
Make fun a us guys.
Dey make any kine to us
An talk bad bout us
Jalike we notting.
 
Eh! You Da One In Charge!
Wen all dis goin come pau?!
You goin stay mad all da time, o wat?
You goin stay jealous,
An burn up inside, o wat?
Mo betta you come huhu
Wit da nations dat donno you,
An cuz da peopo from dose countries
Donno wat kine god you,
Dey no aks you fo help dem.
Cuz dem, dey kill us peopo
Dat get Jacob fo oua ancesta,
An dey bus up da land
Wea us guys live.
No go afta us cuz a da bad kine tings
Oua ancesta guys wen do.
Hurry up an come by us guys
Fo show us yoa love an pity,
Cuz right now, we desperate.
You da God dat stay get us outa trouble,
So help us!
Den peopo goin know wat kine god you
An how awesome you stay.
Get us outa trouble, an let us go.
An hemo da shame fo da bad tings
Us guys wen do!
Den peopo goin know
Wat kine god you.
10 No good da odda peopos
Dat donno you tell,
“Eh! Dem guys god, wea he stay?!”
Da odda peopos, dey wen make
Da peopo dat stay work fo you
Bleed an mahke.
So pay um back plenny fo dat.
Let dose peopo know,
Dat you da one punish um lidat,
An let us guys see you do um.
11 Wen you hear oua peopo
Dat stay prisonas, moaning,
Lissen to dem!
You get choke plenny powa,
So wen da judge guys
From da odda peopos tell
Dat oua peopo gotta mahke,
Make shua dey no mahke!
12 Boss, fo erytime
Da peopo dat live nea us
Talk harsh kine to you,
Go do bad tings to dem,
Seven mo times!
 
13 Us guys, yoa peopo.
You take kea us guys
Jalike we yoa sheeps.
We goin tell good tings
Bout you all da time,
To oua kids, an oua grankids foeva.
We goin tell da story
Bout how you da greates!

79:1 79:1: 2Kings 25:8-10; 2Rec 36:17-19; Jer 52:12-14; 2Tess 1:8