80
Help Oua Nation!
Fo da main music guy sing um wit da tune “Lily Flowas,” fo no foget. One Asaf kine Song Fo God
80:1: Outa 25:22You da one dat take kea
Us Israel ohana guys
Jalike one sheep guy
Take kea his sheeps.
You da one dat show
Da Joseph ohana guys wea fo go,
Jalike one sheep guy
Show his sheeps wea fo go.
So, lissen wat I tell!
From da place you stay,
Ova da Box Fo No Foget Da Deal,
Wea da awesome angel watcha guys
Stay on top—
Show how strong you!
So, let yoa peopo see you,
Da ones from da Efraim an Benjamin
An Manasseh ohanas!
Show you strong, an come by us guys
Fo get us outa trouble!
 
Eh God! Make us guys come
Jalike we was befo time!
Smile an show you stay good inside
Bout us guys,
Fo us guys get outa trouble!
 
Da One In Charge,
You da God Ova All Da Armies!
How long you goin stay huhu
An no lissen wen yoa peopo
Pray to you?!
You make yoa peopo cry,
An dass da ony food you give um.
You give um buckets a tears, ova an ova,
An dass all you give um fo drink.
You make da peopos
Dat live aroun us guys
Make argue wit each odda
Fo find out who goin take ova us.
Da guys dat stay agains us
Make any kine joke bout us.
 
You da God Ova All Da Armies!
Make us come
Jalike we was befo time!
Smile an show you stay good inside
Bout us guys,
Fo us guys get outa trouble!
 
Wen you wen bring yoa peopo
Outa Egypt,
Az jalike you take
One grape plant from ova dea.
An afta you chase da diffren peopos
Outa dis land,
You let us guys live inside da land.
Az jalike you plant dat grape plant
Inside da groun ova hea.
Da way you wen clean out
Da land fo us guys,
Dass da same way peopo clean out
Dea land fo put grape plant.
Den az jalike us guys
Get real strong root
An fill up da whole land.
10 Us guys wen scatta all ova da land,
From da mountains south side
To da Lebanon mountains, north side,
Jalike how da grape plant make shade
Ova da mountains south side
An da mangus cedar trees
Lebanon side.
11 Us guys wen scatta all ova fo live,
From da Mediterranean Sea
To da Eufrates Riva,
Jalike how da grape plant
Put branch all da way makai side,
An make one shoot dat grow ova dea
By da big riva.
12 So, how come you let us guys
Come all bus up?!
Dass jalike you wen broke down
Da walls aroun da grape plant
Fo erybody dat go by dea steal da grapes!
13 You let peopo rip into us guys,
Jalike da wild pig from da fores
Rip into da grape plants,
An all da wild animals
From da boonies eat up eryting.
 
14 God, you da God Ova All Da Armies.
Try look aroun one mo time
An check out us guys!
Look down from da sky
An see wassup!
Do dis jalike you stay plan
Fo do good to yoa peopo.
Cuz us jalike yoa grape plant
You wen plant!
15 Dass us, jalike da grape plant
You wen plant,
Da young grape plant
Dat you wen make grow.
16 Da odda peopos wen try
Fo wipe out us guys,
Jalike dey chop up yoa grape plant
An burn um.
I like fo dose peopo come wipe out.
I like fo dem see
Dat you stay huhu wit dem.
17 Go help da guy you wen pick
Fo be yoa right hand guy,
Da guy dass fo real,
Cuz you make him strong fo help you.
18 Den us guys no goin bag from you.
Make us guys come alive one mo time,
Fo us yell fo you help us
Cuz we know wat kine god you.
 
19 Eh! You Da One In Charge!
You da God Ova All Da Armies!
Make us come
Jalike we was befo time!
Smile an show you stay good inside
Bout us guys,
Fo us guys get outa trouble!

80:1 80:1: Outa 25:22