Book Numba Five
107
(Songs 107–150)
God, He Good
1 ✡107:1: 1Rec 16:34; 2Rec 5:13; 7:3; Ezra 3:11; Songs 100:5; 106:1; 118:1; 136:1; Jer 33:11Eh you guys! Tell good tings
Bout Da One In Charge, cuz he good,
An he stay tight wit his peopo foeva!
2 Da peopo dat Da One In Charge
Wen get outa trouble,
I like fo dem tell
How he get um outa trouble,
Fo da peopo dat stay agains dem
No hurt dem.
3 God wen bring his peopo back togedda
From all da diffren countries
Wea dey stay,
From wea da sun come up
To wea da sun go down,
From da north side
An from da south side.
4 Some a dem go all ova da boonies
Cuz dey donno wea dey was going.
Dey no can find one town
Fo make house dea.
5 Dey stay hungry an thirsty.
Dey feel inside
Jalike dey litto mo mahke.
6 Da peopo wen yell to Da One In Charge
Fo him help dem,
Cuz was real hard fo dem,
An he get um outa trouble.
7 He make dem go da right way
Fo reach one town fo make house.
8 Good, dose peopo tell good tings
Bout Da One In Charge,
Cuz he stay tight wit his peopo,
An cuz he do
Awesome kine stuff fo erybody.
9 Cuz Da One In Charge
Give da thirsty peopo wat dey need.
He fill up da hungry peopo
Wit good kine stuff.
10 Some a dem stay inside real dark places
Fo dem mahke.
Dey prisonas dat stay suffa
Cuz dey all tie up wit iron chain.
11 Az cuz dey wen go agains
Da tings God tell um fo do.
Da God Dass Mo Importan
Den All Da Odda Gods
Wen tell dem wass good fo dem do.
But dey ack jalike Da One In Charge
Donno notting!
12 Az why God wen make dem lose fight,
Cuz dey gotta bus ass
Fo odda peopo.
Jalike dey trip an fall down,
An no mo nobody dea fo help dem.
13 Den, wen eryting come real hard fo dem,
Dey wen yell fo Da One In Charge
Help dem,
An he get dem outa trouble.
14 God bring dem outa da real dark places.
He broke da chains dat stay tie um up.
15 Good, dose peopo tell good tings
Bout Da One In Charge
Cuz he stay tight wit his peopo,
An he do awesome kine stuff
Fo peopo all ova da world.
16 God wen smash da bronze metal town gates
An cut da iron bars.
17 Some a dem wen come stupid
An get one attitude,
Cuz dey like beef wit God,
An cuz dey stay do
Any kine bad kine stuff,
Plenny trouble come to dem cuz a dat.
18 Hard fo dem eat even litto bit,
Az why dey come
Jalike dey litto mo mahke.
19 Den, wen eryting come hard fo dem,
Dey wen yell to Da One In Charge
Fo help dem,
An he get um outa trouble.
20 An wat Da One In Charge tell um,
Make um come good
Fo dem no mahke
An go down inside da grave.
21 Good, dose peopo tell good tings
Bout Da One In Charge
Cuz he stay tight wit his peopo,
An he do awesome kine stuff
Fo peopo all ova da world.
22 Good dey make one sacrifice
Fo tell God “Mahalo!”
An tell da story
Bout all da tings God stay do.
Good dey yell
Cuz dey stay good inside!
23 Some a dem wen go
Inside da ocean in big boats.
Dey get jobs on top da watta
Dat take um all ova da world.
24 Dey see wat Da One In Charge
Do ova dea,
Da awesome stuff he do
On top da open ocean.
25 God jus tell someting,
An he bring up one storm wind
Dat make da ocean waves
Come real big.
26 Da boats go jalike up to da sky,
An down to da bottom,
Cuz get real danger,
An da saila guys no can handle.
27 Dey fall all ova da place
An stagga jalike dey piloot.
Dey donno wat fo do.
No matta dey good sailas,
Dat no help um.
28 Den, wen eryting real hard fo dem,
Dey yell fo Da One In Charge
Help dem,
An he get dem outa trouble.
29 He make da storm stop
An make da watta come glassy
An make da waves come flat.
30 Wen da waves come flat,
Da peopo come good inside.
Den God bring um to da harbor
Wea dey like go.
31 Good, dose peopo tell good tings
Bout Da One In Charge
Cuz he stay tight wit his peopo,
An he do awesome kine stuff
Fo peopo all ova da world.
32 Good dey tell how importan Da One In Charge
Wen all da peopo come togedda!
Good dey tell dat God da greates
Wen dey meet wit da older leadas!
33 God change rivas fo come one dry place wea no mo notting.
He make pukas wea da watta come outa da groun
Come one place dat need watta cuz no moa.
34 God make da kine land dat grow plenny fruits
Come all mud,
Cuz da peopo dat live dea do bad kine stuff.
35 God make da dry boonies get watta pond all ova,
An da land wea no mo rain get pukas wea da watta come out.
36 Dass da place God wen bring hungry peopo fo live dea
An set up one town fo dem make house.
37 Da peopo wen throw seed on top da fields
An plant grape farms.
Dass how dey get plenny fo eat.
38 God do good tings fo dem,
An dey come choke plenny peopo.
God no cut down da numba a dea animals.
39 But den, da peopo come litto bit.
Dey no stay importan no moa,
Cuz dey get hard time.
Odda peopos presha dem.
An do bad kine tings to dem,
An da peopo stay sad inside.
40 God show dea alii guys,
Da ones dat put presha on da peopo,
Dat dea alii guys no worth notting,
He make da alii guys go hea an dea
Inside da boonies, wea no mo road.
41 But God make shua da ones
Dat need plenny stuff, come okay
An no get hard time no moa.
He make dea ohanas come mo plenny,
Jalike how da sheeps an goats
Come plenny.
42 Wen da good kine peopo see dat happen,
Dey stay good inside.
But da bad kine peopo
No can tell notting.
43 Da peopo dat know wat fo do erytime
Good dey stay do all dis stuff,
An tink plenny bout how
God stay tight wit his peopo!