112
Wat Da Good Kine Peopo Do
Eh you guys! Tell good tings
Bout Da One In Charge!
Anybody dat get choke respeck
Fo Da One In Charge,
An fo shua like do
Wateva Da One In Charge tell um fo do,
Dey goin stay real good inside.
Da peopo dat come from dose guys,
Goin be da mos strong peopo
Inside da land.
God goin do good tings fo dem
Cuz dey stay do wass right.
Dea ohana get plenny stuff, an dey rich.
An cuz dey do da right ting erytime,
Good tings goin happen to dem
All da time.
Fo da peopo dat do wass right,
An give odda peopo chance, an pity dem,
An do da right ting,
God get dat kine peopo outa trouble,
Jalike wen stay dark all aroun,
Da light come out.
Wen somebody do good tings fo peopo
An lend stuff to dem,
Good tings goin happen fo dat guy.
He no goin bulai nobody
Jus fo make money.
Fo dat kine guy, no mo notting
Goin throw him off.
Fo anybody dat do
da right ting erytime,
Peopo no goin foget dem foeva.
Dey no come sked wen dey hear
Bad kine stuff stay happening.
Inside, dey stay solid,
An trus Da One In Charge.
Dat kine guy no come sked,
Cuz inside he stay solid.
He know dat he goin face
Da ones dat stay agains him,
An he goin be da winna.
112:9: 2Cor 9:9Da good kine peopo
Stay give good kine stuff
To da pooa peopo all ova da place.
An cuz dey do da right ting erytime,
Good tings goin happen to dem foeva.
Peopo goin respeck dem,
An cuz a dat, dey goin come
Mo an mo strong.
10 Da bad guys, dey see wass happening,
An dey come bum out.
Dey goin grind dea teet
Cuz dey so mad an futless.
Eryting fo dem goin come poho.
Eryting da bad kine peopo like get,
No goin come to dem!

112:9 112:9: 2Cor 9:9