113
Tell Erybody Dat
Da One In Charge, He Good!
Eh you guys! Tell good tings
Bout Da One In Charge!
All you guys dat work
Fo Da One In Charge,
Tell good tings bout him!
Tell good tings cuz you know
Wat kine god him!
I like fo peopo tell dat Da One In Charge
Do good tings
Now, an foevas,
Cuz dey know who him.
All ova, from da place da sun come up
To da place da sun go down,
Good fo tell how good
Da One In Charge stay!
He mo big den all da diffren peopos.
Da One In Charge, he da greates,
He mo big den even da sky!
 
No mo nobody jalike Da One In Charge,
Da One dass da God fo us guys!
He get his throne ova eryting,
But he bend down fo see
Wass happening inside da sky
An da earth.
Da peopo dat no can do notting,
Da One In Charge pick dem up
Outa da dirt.
Da peopo dat get hard time,
He help dem fo stan up
An come outa da rubbish pile.
Da One In Charge give dem
One place wit da alii,
Right dea wit da leada guys
Fo all his peopo.
Da One In Charge make da wahines
Dat no can get kids stay good inside,
Cuz he give um dea home,
An now dey get kids.
 
Eh you guys! Tell good tings
Bout Da One In Charge!