1 Kanan bon APU DIOS ke Moses di 2 “Idawat yun ha-on nadan linalakin panguluwan an imbabale yu te midawat ke ha-on am-in di panguluwan an imbabale yun holag Israel, takon nadan namangulun impan di aggayam yu.”

3 Ot e kalyon Moses nadah ibbanan holag Israel an kananay “Adi taku kal-iwan hituwen algon nanayanan takud Egypt an nihbutan yu gapuh ongal an kabaelan APU DIOS. Ya tibon yu nimpe ta adi kayu mangan hi tinapay an naha-adan hi mumpalbag. 4-5 Ad uwanin mamangulun bulan an Abib ya taynan takuy Egypt ta ume taku nadah boblen kinalin APU DIOS handidah aammod takun ipaboltanan ditaku. Datuwe nadan numboblayan di Kanaanite, Hittite, Amorite, Hibite ya nadan Jebusite, an dakol di makan ya maluwab di mitanom. Deket dumatong kayuh di ya adiyu kal-iwan an mun-an-anla ketuwen algoh katootoon. 6-7 Ya kediye ya mahapul an adi kayu mangan hi tinapay an naha-adan hi mumpalbag nah mamangulun pitun algoh mamangulun bulan. Ya mahapul an maid di mumpalbag hi tinapay hi nunhituwan yu ya hi boble yu ke dadiyen algo ya ahi kayu mumpiyestan munhahamul kayuh pundayaw yun APU DIOS nah mikapitun algo.

8 Kediyen piyesta ya ahiyu kalyon hanadah imbabale yun man-uket aton yuh tuwe ya gapu nah inat APU DIOS ot ahiyu tayanan ad Egypt. 9 Hituwen piyesta ya paddungnay markah takle weno hi tuktuk taku ta panginomnomnoman takut nangamung nadah tugun APU DIOS. Aton takuh tuwen piyesta te gapuh ongal an kabaelana ya impakaan ditakud Egypt. 10 Kinali aton takuh tuwen piyesta nah nagtud an algoh katootoon.

11 Hantuh datngan yu nah boblen kinalin APU DIOS handidah aammod takun ipaboltanan ditakun numboblayan nadan iKanaan 12 ya mahapul an idawat yu nadan linalakin panguluwan an imbabale yun hiya, takon nadan mamangulun lakin impan di aggayam yu. Te am-in di panguluwan an linalakin imbabale yu takon nadan namangulun impan di aggayam yu ya bagin APU DIOS.*13:12 Lucas 2:23 13 Mu dadiyen panguluwan an linalakin imbabale yun idat yu ya damanan hannotan yuh impan di kalnero. Ya takon nadan namangulun impan di kabayu yu ya damanan hannotan yu boh impan di kalnero. Mu deket adiyu pinhod an hannotan ya gi-uwon yuy bagang nan kabayu. 14 Deket hanhanan di imbabale yuh udum hi algo hin nganney gapunah pangatan yun datuwe ya kanan yuy ‘Man-uke ya gapuh ongal an kabaelan APU DIOS ya impakaan dakamid Egypt an nihbutan mi. 15 Te handih wada kamih did Egypt ya mangohe nan patul an adi dakami iabulut an tumayan hidi, ot patayon APU DIOS nan panguluwan an imbabalena ya am-in di panguluwan an imbabalen nadan iEgypt, takon nadan namangulun impan di aggayam da. Hidiyey gapunan mahapul an idawat takun APU DIOS nadan namangulun linalakin imbabale taku ya hay namangulun impan di aaggayam taku. Mu hay mihannot nadah panguluwan an linalakin imbabale taku ya hay impan di kalnero. 16 Hituwen aton taku ya kay nimarkah takle taku weno hi tuktuk taku ta panginomnoman takut nangamung hi nangaanan APU DIOS ke ditakud Egypt gapuh ongal an kandamana.’ ”

17-18 Handih in-abulut nan patul an tumayan nadan holag Israel ya bokon nan dalan an mumpaed Pilistiay impangulun Apu Dios an dinalan da, yaden hidiye ot kumay antiktiken pangidalanan dan ume nah pangayan da. Ot hay impangulunan dinalan da ya nah ugge naboblayan an mumpaen nah Maingit an Baybay. Te kanan Apu Dios di “Adik pinhod an kal-ina ya muntutuyu datuwen tatagu ta mibangngad da ten tibon dan mahapul an makigubat da.” Hituwey ninomnom nan aton takon di waday almas nadan holag Israel an timmayan ad Egypt.

19 Handih timmayanan da Moses ad Egypt ya impakial-ala da nan gunit Joseph te hidiyey kinalina tuwali handi nadah iibanan holag Israel an kananay “Hantuh pangihwangan Apu Dios ke dakayu ta tumayan kayuh tu ya mahapul an pakial-ala yuy gunit ku.”

20 Tinaynan nadan holag Israel di Sukkot ot dumatong dad Etham an boble nah pingngit di ugge naboblayan ot mungkampu dah di. 21-22 Hay inat APU DIOS an nangipangulun dida ya deket mapat-al ya wadat nangamung nan kulabut an mangipangpangulun dida. Ya deket hilong ya mumbalin hidiyen kulabut hi ongal an apuy an mundadalang ta mapat-alan di dalanon da.†13:21-22 Exodus 40:30