16
Kimmali boh APU DIOS ke ha-on an kananay “He-an tagu, kalyom ke Jerusalem nadan umipaboh-ol an inat na. Ya kalyom an ha-oy an Nakattag-en DIOS ya kanak ke hiyay ‘He-a ya nitungo kad Kanaan. Amorite hi amam ya Hittite hi inam.* 16:3-43 Hanadan Amorite ya Hittite an nangapyah Jerusalem an pumboblayan da ya mialig da nah ammod an iwalong nay imbabalena. Ya mialig di Jerusalem nah golang an inwalong di ammod na. Ot agamidon Apu Dios ot ipaptok na. Indani ya paddungnay kimmat-agu ya maddikit an babai ot mialig an in-inen Apu Dios. Indani ya mundayaw di iJerusalem hi udum an dios ya hidiyen inat da ya mialig at-atton di babain pabayad nay adol nah lalaki. Ot gapun diye ya kinastigun Apu Dios didan iJerusalem. Handih nitungowam ya maid di nangipaptok ke he-a, maid di namuttut hi puhog mu ya maid di nangamon he-a weno nangiapuwap hi ahin ke he-at bulwatiyan daka. Maid di nangipaptok hi athitun he-a te maid di hinummok ke he-a ya maid di naminhod ke he-a. Kinali inwele daka nah payot mate kah di.
Indani ya nala-uwak ot tibon dakan mungkoyakkoyang ka nah dalam. Ot awiton daka te adik pinhod an mate ka. Impaptok daka ot maongal kan umat ka nah maluwab an nitanom. Kimmat-agu ka ya natag-e kan babain andukkey buuk mu. Muden numbollad ka te maid di bulwatim.
Handih nala-uwak bo ya tinibo dakan daydayuna mon malahin ka. Inlibbut kun he-a nan ambilog an bulwatik ta mahaniyan di adol mu. Insapatak di naminhod kun he-a ot iine dakan ha-oy an Nakattag-en DIOS ot ipaptok daka.
Handi ya inamo dakan inulahak di dalam ot lanaan dakah nabanglun lana 10 ot ahi daka bulwatiyan hi makaphod ya nakangnginan bulwati ya inapatutan dakah lalat. Indat kuy ipngot mu 11 ya indat ku boy gamgam mun pang-o ya hubong ya takkalang. 12 Indat ku bon he-ay balituk an miha-ad hi olong mu takon di hingat mu ya nan miha-ad hi ulum. 13 Om, nunggamgam kah balituk ya silber ya numbulwati kah makaphod ya nanginan bulwatin naabol. Ya hay kanom ya nan tinapay an nakapyah makaphod an alina, iyyukan ya mantekan di oliba. Namahig di kinamaddikit mun umat ka nah inayan di patul. 14 Indani ya nundingngol hi kabobbobley kinamaddikit mu. Mu man-uket numbalin kan athidi ya gapuh numpaptok kun he-a. Ha-oy an APU DIOS an Nakattag-ey nangalin tuwe.
15 Ya gapu bo anhan bot ininnilam an maddikit ka ya am-in boy lalakin umali ya ihuyop mu. 16 Nangapya kah makaphod an pundayawam an inusal muy udum an bulwatim ot itultuluy mun aton dadiye umat hi at-atton di babain pabayad nay adol nah linalaki. 17 Hanadan silber ya balituk an gamgam mun indat kun he-a ya inusal mun nangapyah linalakin tinattaggun dayawom. Adik pinhod hidiyen inat mun mialig hi aton di babain pabayad nay adol nah linalaki. 18 Hanada bon bulwatin naboldaan an indat kun he-a ya impabulwatim hanadah daydayawom an adi makulug an dios an kinapyam ot iappit mu bon dida nadan lanan di oliba ya nadan bangbanglun indat kun he-a. 19 Hanan kanom an indat kun he-an dadiye ya makaphod an alina, mantekan di oliba ya iyyukan ya in-appit mun dadiyen dayawom an dios te pangalim on idat dan he-ay nganneh diyen ibagam. Ha-oy an APU DIOS an Nakattag-ey nangalin tuwe.
20 Kulangom pay dadiyen inat mu ot alam nadan iimbabale tan linalaki ya binabai ot iappit mun makan ke dadiyen dios mu. Kon makudang nadan inat mun paddungnay pibayad muy adol muh udum an linalaki? 21 Kon tipet kulangom dadiyen inat mut mahapul pay an em iappit ke dadiyen dios mu nadan imbabale ta? 22 Tipe anhan ta handih nangatam ke dadiye ya uggem ninomnom an handih kagolang mu ya maid di nunhangud ke he-a ot naala ya numbolad ka ya nungkoyakoyang ka nah dalam?’
23 Ad uwani ya ha-oy an Nakattag-en DIOS ya kanak di ‘Mahmok kan abu te makastigu ka! Man-uke ya inat mun am-in di gaga-iho 24 mu kulangom pay ot mangapya kah pundayawam hanadah dios mu nadah kakalata. 25 Impakaibabbam di kinamaddikit mu ot atom nadan umat hi at-atton nadan binabain pabayad day adol dah linalaki. Em, ih-ih-od di adol muh kabigabigat hi kumpulmin mala-u. 26 Ya iabulut muy adol mu nadah hinag-on mun iEgypt an gagaid an mangihuyop ke he-a. Hinaen at-attom ya umipabobboh-ol an abu ke ha-on. 27 Kinali kastiguwon dakan iabulut kut sakupon di buhul mun iPilistiay udum hanadah boblem. Takon dadiyen iPilistia ya balawon dah naen gaga-ihon at-attom. 28 Impabayad mu pay di adol mu nadah iAssyria te maid di kanam on abu mo tut-uwa tun at-attok. 29 Loktat ya takon mo pay nadan iBabilon an negosyante ya inhuyop mu muden kapyanan kulangom.
30 Anakkaya mo anhan di kinagaga-ihom an inat mun am-in di umat hi aton nan maid di bainan babain pabayad nay adol nah linalaki. Ha-oy an APU DIOS an Nakattag-ey nangalin tuwe. 31 Man-u bo te em nungkapya nadah kakalatay pundayawam hanadah dios mun kinapyan di tagu ta atom hidiy umat hi at-atton di babain pabayad nay adol na muden adim boppo abuluton di mibayad ke he-a. 32 Umat ka bo nah babain adina iohhah inayanay pamhod nat hiya ya abuy ihuyop na te kon ot makihuyop kah udum an linalaki. 33 Hay ke babain pabayad nay adol na ya alanay ibayad dan hiya. Mu he-a ke ya nahunni te idatam hi regalo nadan mangihuyop ke he-a ya bayadam di linalakin malpuh daanan boblet umali dan mangihuyop ke he-a. 34 Hinnatkon ka pe, oha bo ya maid di namilit ke he-an mumbalin hi athina. Adika bo tuwali mabayadan yaden he-a pay udot di bumayad! Talagan hinnatkon ka!
35 Aga, he-an Jerusalem an mialig nah babain pabayad nay adol nah linalaki, donglom hituwen kalin APU DIOS an Nakattag-e. 36 Hituwey kanan diyen Nakattag-en AP-APU: Gapu ke datuwen inat mun in-abulut muy adol muh linalakin pininhod mu, ya gapuh namatayam hi imbabalem ot iappit mu nadah dios mun kinapyan di tagu 37 ya athituy atok: Amungok am-in dadiyen linalakin pakappinhod mun nangipaamlong ke he-a takon nadan kahingngitam ta malikkub dan he-a ne kinaan kuy bulwatim ta ang-ang-angon dakan numbolad. 38 Kastiguwon dakah umat hi kastigun di babain inhuyop nay bokona inayan ya umat hi kastigun di pimmaten kastiguwok hi kate gapuh namahig an boh-ol ku. 39 Ipaboltan dakah tataguh udum an boblen pinpinhod mu ta pumpai da nadan kinanapyam an balen di dios mu. Ya pun-ala day bulwatim ya gamgam mu. Ma-ma-idan di ahida ibatin he-at paddungnay nabladan kat mibabain ka! 40 Ahi mumbabaddang dadiyen pinpinhod mut tugmilan daka ya tanogtogon daka 41 ne linggab day balem yaden ang-ang-angon di udum an binabaih diyen ma-ma-at an kastigum. Hidiyey panikod ku nah at-attom an umat hi at-atton di babain pabayad nay adol na ya hidiyey panikod kuh pangidaidatam hi regalo nadah linalakin pinpinhod mu. 42 Ta makaan moy boh-ol kut dumin-ong moy nomnom ku. Maid moy gumapuh ek bumoh-olan ya adiyak mo umamo nadah udum an dios mu.
43 Nakal-iwam an abuy namaptok kun he-a handih kaittay mu. Ya impaboh-olak gapu nadah inat mu. Kinali mahapul an boklaom am-in dadiyen numbahulam. Kulangom pay bo udot dadiyet atom pay di malalaon ihuyop muy bokon mu inayan. Inat mu pay nadan udum an umipaboh-ol ke ha-on. Ha-oy an Nakattag-en DIOS di nangalin tuwe.’
44 Kanan APU DIOS di ‘Ahi kalkalyon di tataguh tuwe mipanggep ke he-a, Jerusalem: Hay imbabalena ya umat hi ammod na. 45 Makulug an umat kan inam an kahingngitanay inayana ya iimbabalena. Umat ka bo nadah tutulang mun binabain kahingngitan day inayan da ya iimbabale da. Om, makulug an Hittite hi inam ya Amorite hi amam. 46 Hanan tulang mun hi Samaria an panguluwan ya nadan iimbabalena ya dehdi dah nangappit hi north. Hana bon tulang mun hi Sodom an nitun-ud ke he-a ya nadan iimbabalena ya dehdi dah nangappit hi south. 47 Diday nangiun-unudam hanadah gaga-ihon at-attom. Muden nahalman di kinagaga-ihom mu dida. 48 Ya ha-oy an Nakattag-en DIOS an wadat nangamung ya kalyok di kudukdul pay hi Sodom ya nadan imbabalenan binabai te namahig di liwat yun nadah imbabalem an binabai mu dida.
49 Hay liwat nan ibam an hi Sodom ya nadan imbabalena ya mumpahhiya da, mahiga da, namahig di pangan dan kah-in di mamabhug da, ammunay kiphodan dan inila da, adida anhan tibon di kiphodan di ibba da ya adida bumaddang nadah nawotwot an mihahha-ad nah panto dah dola. 50 Hay punnomnom dah adol da ya kudukdul da mu hay udum an tatagu. Oha bo ya at-atton da nadan kahingngitak. Hidiyey gapunan dinadag ku dida. Inilak an impakainnilam di mipanggep kediye. 51 Ya hi Samaria ya nadan imbabalena ya paddungnay adi mikagodway liwat dan he-a. Nahalman an abuy kinagaga-ihom an paddungnay tab-unanay kinagaga-ihon di iSodom ya iSamaria ta hidiye nan deket ipaddung dakan dida ya kay mo maid di liwat da. 52 Gulat na ya bumaba-in ka te namahig di liwat mu, mu hay liwat nadan iibam. Ta hidiye nan deke nimpet ipaddung dakan dida ya kay mo maid di liwat da.
53 Dinadag ku da Sodom ke Samaria takon nadan iimbabale da mu ahik ibangngad di kinadangyan da. Ne ahik imbangngad damdamay kinadangyan mu. 54 Ongal di kibabainam gapu nadah himpappangen liwat mu, mu da Sodom ke Samaria ta pangali da on kudukdul da mu he-a. 55 Muden ahik paphodon da Sodom ke Samaria takon di he-a. Takon nadan boble yu ya ahik paphodon ta umat bo handi. 56 Kon adi handi ke ya tanaltalanggaam hi Sodom te mumpahhiya ka. 57 Mu ad uwani ya makainnilan namahig gayam di kinagaga-ihom. Taltalanggaan daka ya kahingngitan dakah iEdom ya iPilistia ya nadan udum an boblen nunlinikkod ke he-a. 58 Mahapul an munholholtap ka ta boklaom nadan umipaboh-ol an inat mu. Ha-oy an DIOS di nangalin tuwe.’
59 Hituwe boy kinalin nan Nakattag-en DIOS: ‘Mahapul an makastigu ka Jerusalem te uggem inat di nakitobbalak ke he-a ta ot mumbalin an maid di hilbina. 60 Mu adik ibahho nan nakitobbalak ke he-a handih kaungam ya hammadok an kalyon ke he-an punnanongok ta nangamung hidiye. 61 Ahim moppe nomnomon nadan inat mut bumaba-in ka namam-a ten ibangngad kun he-a dadiyen iibam an panguluwan ya udidiyan mu ta kay mu mo imbabale dida, takon di bokon athidiy nakitobbalak handi. 62 Punnanongok hituwen hinamad kun kinali ta panginilaam an ha-oy di AP-APU. 63 Pakawanak di liwat mu, mu nonomnomom metlaing nadan gaga-ihon inat mu ya maid moy mabalin mun kalyon te naba-inan ka. Ha-oy an Nakattag-en DIOS di nangalin tuwe.’ ”

*16:3 16:3-43 Hanadan Amorite ya Hittite an nangapyah Jerusalem an pumboblayan da ya mialig da nah ammod an iwalong nay imbabalena. Ya mialig di Jerusalem nah golang an inwalong di ammod na. Ot agamidon Apu Dios ot ipaptok na. Indani ya paddungnay kimmat-agu ya maddikit an babai ot mialig an in-inen Apu Dios. Indani ya mundayaw di iJerusalem hi udum an dios ya hidiyen inat da ya mialig at-atton di babain pabayad nay adol nah lalaki. Ot gapun diye ya kinastigun Apu Dios didan iJerusalem.