5
Hay kanta mipanggep nah laguntan natanoman hi grapes
1 Donglon yu ta ikantak di kantan nan gayyum*5:1a Hituwen gayyum an kanan Isaiah ya hi APU DIOS. ku mipanggep nah intanom nan grapes.
Hidiyen gayyum ku ya waday intanom nan grapes nah ittay an bilid an makaphod di lutana.†5:1b Hanadan holag Israel ya hin-uddum on diday kanan dah laguntan APU DIOS an natanoman hi grapes. (Tibon yuy Jeremiah 12:10 ya Psalm 80:8-19 ya Mateo 21:33-45.) 2 Ginabutana ya kinaanay babatu ot gabyonona ot tanomanah makaphod an grapes. Ya ingkapya nay natag-en pungguwalyaan ya nangapyah pungkopalan.‡5:2 Mateo 21:33, Marcos 12:1 Hin-od nan mal-um nadan grapes, mu indanit nal-um da ya maantam da.
3 Kanan diyen gayyum kuy “Makayun iibbak an iJerusalem ya iJudah ta tibon yu hin nganney gapunan athidih diyen intanom ku. 4 Nganne pay nin di uggek inat? Tipet athidin maantam nadan grapes yaden nomnomnomok an malumiiy ibunga da?
5 Athitu moy ninomnom kun aton: Kaanok ot kattog di alad diyen intanom kun grapes ta umali day mailom an aggayam ta pungkan da ya pun-igatin da.§5:5 Deket kanan APU DIOS di “mailom an aggayam,” hay pinhod nan kalyon ya nadan iAssyria an buhul nadan holag Israel an manadag hi boble da. 6 Adik gabutan ta takon di makahlokan. Ya adik puttutan di haping na ya adik tag-odan. Mihdit humaybong di holok ya hubit ya mandalok di kulabut ta adina ogahon di udan hidi.”*5:6 Hin-uddum ya adi ipaalin APU DIOS di udan ta kastiguwona nadan mangohen tataguna. (Tibon yuy Deut. 28:23-24 ya 2 Samuel 1:21 ya 1 Patul 17:1.)
7 Hituwen kantak ya mipanggep nadah iIsrael ya iJudah an tatagun APU DIOS an Kabaelanan am-in. Dida nan mialig nah grapes an inip-iphod nan intanom. Namnamaonan maphod di aton da, mu bokon ot ya abu te pumate da. Ya namnamaonan aton day maandong, mu kon ot danongdonglonay pumpahpahmokan nadan paholholtapon da.
Hanadan gaga-ihon aton di tatagu ya nadan kastigun nan tagun mangat hi athidi
8 Mahmok kayu te nunna-ud an makastigu kayun tatagu! Dakayun tagan yuy gatang†5:8 Hanadan holag Israel ya damanan bumalal dah lutan di ibbada, mu adinadaman eda gumatang weno munggattang hi luta te nadan luta da ya nikap-ong ke dida ta bagi dat nangamung. (Tibon yuy Numbers 27:7-11 ya 1 Patul 21:1-3) hi bale ya lutat maid di kiha-adan di udum an tatagu ta pangali yu ta dakayu ya abuy miha-ad hidi. 9 Mu nunna-ud an kastiguwon dakayun APU DIOS an Kabaelanan am-in te dingngol kun kananan ha-on di “Am-in datuwen makaphod an babale ya ahi mabao. 10 Hanan grapes an ambilog di nitanomana ya liman galon ya abuy kakapyaana. Ya hay himpulun talub an page ya mumbalin an ohan talub an boga.”
11 Mahmok kayu te nunna-ud an makastigu kayun tatagu! Humalaman kayun bumangun ta ekayu manginum ya ihilhilong yu inggana makabbutong kayu. 12 Hana boh punhahamulan yu ya mangmanginnum kayu ya makaphod di paggango yu, umat hi gitala, ayyuding ya ingngiing. Mu adiyu nomnomon di at-atton APU DIOS. 13 Kinali pumbalinon dakayuh balud hi nidawwin boble. Hanadan ap-apu yu ya mate dah inagang da ya dakayun udum ya mate kayuh inuwo yu. 14 Ta hidiye nan loktat ya mungkabillog di kadungayan an pangayan yun kakadangyan ya nungkawotwot an iJerusalem, takon di dakayun bimmoblen bumutobutong on ngimmalangala.
15 Kediye ya maba-inan kayun am-in ya mipababa kayun mumpahhiya. 16 Mu hi APU DIOS an Kabaelanan am-in ya midayaw nah maandong an punhumalyaana. Ya matibo boy kaphod na nah pangat na. 17 Ya hantuh kadadagan tun boble ya ahi makakkahlokan ta panganan di kalnero ya gulding.
18 Mahmok kayu te nunna-ud an makastigu kayu te adiyu pinhod an iwalong nadan gaga-ihon atoaton yu. 19 Kanan yu bo udot di “Hana ot ta gal-an APU DIOS an makaphod an abun Dios di holag Israel an mangat am-in hi pinhod nan aton ke dakamit tibon mi hin nganne tuwaliy wadah nomnom na.”
20 Mahmok kayu te nunna-ud an makastigu kayu! Dakayun nahunnihunniy punnomnom na. Hanan gaga-iho ya kanan yuy maphod ya nan maphod ya kanan yuy gaga-iho. Athidi bo nah mapat-al an kanan yuy munhihhilong ya nan munhihhilong ya kanan yuy mapat-al. Ya nan mapait ya kanan yuy malumii. Ya nan malumii ya kanan yuy mapait.
21 Mahmok kayu te nunna-ud an makastigu kayu te hay punnomnom yuh adol yu ya nanomnoman kayu ya nakala-ing kayu.
22 Mahmok kayu te nunna-ud an makastigu kayun nal-ot an manginum ya dakayun nalaing an muntemplah mainum, 23 ya dakayun adi maandong di punhumalya yun kanan yuy nadan nabahulan di maid di bahul nat malibli dah kastigu da gapu te binayadan dakayu. Ne nadan maid di bahul nay kanan yuh nabahulan ta makastigu da.‡5:23 Tibon yuy Isaiah 1:23 ya 10:1-2.
24 Ta hidiye nan mialig kayu nah namag-anan an dagamin gobhon. Ya mialig kayu nah holok an mabuluk di lamut na ya itayyap di dibdib di habung nan kay dap-ul. Hay gapunan madadag kayu ya nginohe yuy tuttudun APU DIOS an Kabaelanan am-in ya makaphod an abun DIOS di holag Israel. 25 Namahig mo anhan di boh-ol APU DIOS ke dakayun tatagunat deyan kastiguwon dakayu. Ahina iwagot nadan bilid§5:25 Tibon yuy Isaiah 64:3 ya Jeremiah 4:24-26 ya Hebrews 12:26 ya Exodus 19:18 ya Haggai 2:6. ta mungkakatey tatagut mungkiwahit di adol da nadah kalatan kay da lugit. Mu takon di athidi ya nanongnay boh-ol APU DIOS, ta hidiye nan kastiguwon dakayu pay.
26 Ta ayagana mo nadan buhul yuh nungkidawwin boble*5:26 Datuwen buhul da ya mabalin an dida nadan tindalun di Assyria an nangubat hi Israel ya Judah handih 722 B.C. ya handih 701 B.C. weno iBabilon an nangubat hi Jerusalem handih 605 B.C. ta galagala dan umalit gubaton dakayu. 27 Maid ke diday maatut mihubag ya adida iohnong ta mun-iyatu da weno mahuyop da. Ya mungkihamad di balikit da ya hay gakod di apatut da. 28 Matadom di pana da ya nidadaan dan pumana. Ya nakal-ot di kabayu dan mangiguyud hi kalesan punluganan da ya nakal-ot da bon bumtik. Hay pilid nadan kalesa da ya paspas an muntilon. 29 Hanadan tindalu da ya kay da layon an mun-olmom hin waday pinate dah aggayam an pun-ie dan nah maid di mamangngad. Athidiy ahida aton hanadah tataguk.
30 Hantuh kaatan datuwe ya umalid Israel an kay da layon an mun-olmom ya mumbungug dan kay bungug di danum hi baybay. Namahig di pangat dah dopapon dan paholholtapon da dida. Tibon yuh diyen boble an Israel! Hidiyen boble ya makakkahmok an paddungnay munhihhilong an hinaniyan di kulabut di potang.†5:26-30 Hay pinhod datuwen verses an kalyon ya mipanggep nadah tindalun di Assyria an umalin mangubat ya manadag hi Israel.
*5:1 5:1a Hituwen gayyum an kanan Isaiah ya hi APU DIOS.
†5:1 5:1b Hanadan holag Israel ya hin-uddum on diday kanan dah laguntan APU DIOS an natanoman hi grapes. (Tibon yuy Jeremiah 12:10 ya Psalm 80:8-19 ya Mateo 21:33-45.)
‡5:2 5:2 Mateo 21:33, Marcos 12:1
§5:5 5:5 Deket kanan APU DIOS di “mailom an aggayam,” hay pinhod nan kalyon ya nadan iAssyria an buhul nadan holag Israel an manadag hi boble da.
*5:6 5:6 Hin-uddum ya adi ipaalin APU DIOS di udan ta kastiguwona nadan mangohen tataguna. (Tibon yuy Deut. 28:23-24 ya 2 Samuel 1:21 ya 1 Patul 17:1.)
†5:8 5:8 Hanadan holag Israel ya damanan bumalal dah lutan di ibbada, mu adinadaman eda gumatang weno munggattang hi luta te nadan luta da ya nikap-ong ke dida ta bagi dat nangamung. (Tibon yuy Numbers 27:7-11 ya 1 Patul 21:1-3)
‡5:23 5:23 Tibon yuy Isaiah 1:23 ya 10:1-2.
§5:25 5:25 Tibon yuy Isaiah 64:3 ya Jeremiah 4:24-26 ya Hebrews 12:26 ya Exodus 19:18 ya Haggai 2:6.
*5:26 5:26 Datuwen buhul da ya mabalin an dida nadan tindalun di Assyria an nangubat hi Israel ya Judah handih 722 B.C. ya handih 701 B.C. weno iBabilon an nangubat hi Jerusalem handih 605 B.C.
†5:30 5:26-30 Hay pinhod datuwen verses an kalyon ya mipanggep nadah tindalun di Assyria an umalin mangubat ya manadag hi Israel.