7
Hay pinhod APU DIOS an ipainila nah patul an hi Ahas
1 Handih numpatulan Ahas an imbabalen Jotham an imbabalen Ussiah ad Judah ya ginubat da Resin an patul di Syria ya hi Pekah an imbabalen Remaliah an patul di Israel nadan iJerusalem, mu uggeda inapput dida.*7:1 Tibon yuy 2 Patul 16:5.
2 Handih dingngol Ahas an patul di Judah an makibaddang nadan tindalun di Syria hi tindalun di Israel an mangubat ke didan iJudah ya namahig di takut na.†7:2 Handi ya hi Ahas an patul ya nadan tindaluna ya inapput di iSyria ya iIsrael hi gubat. Tibon yuy 2 Chronicles 28:5-8. Takon nadan tataguna ya namahig damdamay takut dat munggagayonggong dan umat da nah kaiw an midmiddangew hin mumpuwok.
3 Mu kanan APU DIOS ke Isaiah di “Ikuyug mu nan imbabalem an hi Sear Jashub‡7:3 Hay kibalinan nan ngadan an Sear Jashub ya “ahi waday o-ohan tatagun matdaan.” ta eyu damuwon nan patul an hi Ahas. Dehdi nah kalatah pungngunuwan nadan mangapyah bulwati nah poppog di kanal an dalanon di danum an malpun nah Nuntap-on Lobong. 4 Kalyom ke hiyat mundadaan ya palinggoponay nomnom nat adi tumakut. Hay bungot nan patul an hi Resin, nadan ibbanan iSyria ya nan patul an hi Pekah ya adi katatakut te mialig di bungot da nah mungkad-op an duwan mumbabalan itungu.§7:4 Hi Resin an patul di Syria ya hi Peka an patul di Israel ya umat da nah mungkad-op an duwan bala te nakapuy di tindalu da. Inapput di Assyriay Syria handih 732 B.C. ya nala-uy himpulun toon ya inapput di Assyriay Israel handih 722 B.C. ot ie da nadan iIsrael hi boble da ot mumbalin dan himbut hidi.
5 Implanun dadiyen patul di Syria ya Israel an 6 gubaton day Judah ne tinaktakut da nadan tataguh dit makid-um dan dida ya pumbalinon dan patul di Judah nan imbabalen Tabeel.
7 Mu ha-oy an DIOS an Nakattag-e ya adik iabulut an maat di athidi 8 te hay iSyria ya adi e nalnal-ot mu ha-oy an Ap-apu yu. Hay panibok ya maid di ikodhol di Damascus an importanteh bobled Syria, takon hi Resin an patul hidi. Hay Israel ya makadaddag hantuh mala-uy nan-om ta liman toon.*7:8 Hanadan o-ohan natdaan an holag Israel an ugge nipaed Assyria ya naka-apput da ot handih nala-uy 65 an toon (669 B.C.) ya bokon mo diday mun-ap-apuh tatagu da, mu nadan nipaalin iAssyria an nunsakup ke diday mun-ap-apu. 9 Ta am-in di bobled Israel ya maid di ikodhol da takon di Samaria an importanten bobleh di. Athidi bo nah patul dan hi Pekah an maid di ikodhol na.
Mu deket adiyu punnanongon di pundinol yun ha-on ya maid di kabaelan yu.”
Hay pangimmatunan hi aliyan Emmanuel
10 Intud-ak bon APU DIOS hi Isaiah an e mangali hi pinhod nan kalyon ke Ahas an patul. Hituwey kanan APU DIOS: 11 “Ibagam ke ha-on an AP-APU an Dios muy pangimatunam an makulug an baddangan dakat apputom nadan buhul mu. Mabalin an hay idat kuh pangimatunam ya malpuh kabunyan weno malpud dalom hi kadungayan, nangamung di pinhod mun piliyon.”
12 Mu ugge inabulut Ahas an kananay “Adiyak mumbagah pangimatunak, adik pinhod te adik mahapul an patnaan di kakulug di kalyon APU DIOS.”†7:12 Hi Ahas ya man-uh kalina te ipatibonan mundinol ke APU DIOS, mu hay kakulugana ya nomnomnomonan mumpabaddang nadah iAssyria an mangubat hi iIsrael ya iSyria. Tibon yuy 2 Patul 16:7-9.
13 Kanan Isaiah ke Ahas ya nadan ibbanay “Dakayun ibbak an holag David, napoppog mo anhan di anus kun dakayu yaden taguwak ya abu, kon pinhod yun mapoppog damdamay anus Apu Dios? 14 Hiyay ahi mangidat hi pangimatunan yu: Hanan kat-agun babai ya ahina itungoy golang an lalakin ngadananah ‘Emmanuel.’‡7:14 Hanan hinamad APU DIOS an kinalina mipanggep ke Emmanuel ya duway nipaannungana. Hay mamangulu ya intungon nan kat-agun babai nan golang an lalaki handih nala-u ya abuy kaatnan toon nipalpuh nangalyan APU DIOS ketuwe. Maid di maptok hin dahdih tuwen golang. Hay udum ya kanan day oha nadah linalakin imbabalen Isaiah. Hay udum ya kanan day imbabalen nin di ap-apu weno patul. Hay mikadwa ya nan intungon Maria an hi Jesu Kristo handih nala-uy dakol an toon nipalpuh nangalyan APU DIOS ketuwe. 15 Hantuh kaongngalanan kabaelana mon mumpili hin nganney maphod ya gaga-iho ya hay kanon di tatagu ya gatas ya iyyukan.§7:15 Hay udum an tatagun nanginilah Hebrew ya kanan day gapu te hay kanon nadan iJudah ya gatas ya iyyukan ya hidiyey kitib-anan ahi waday punligatan da. Mu hay ohan kibalinana ya ahi mahawwahawwal di makan ad Judah te kediye ya apputon di iAssyriay Israel ya Syria. 16 Man-uke ya adi pay ni-an madatngan hidiyen tiempo ya maapput nadan duwan patul an pakatakkutan yu an dadiye ya patul di Israel ya patul di Syria. Maapput an nunna-ud di boblen dadiyen patul ta miwahit nadan tataguh di.
Hay panadagan di iAssyria hi Judah
17 Muden ahi umali nan tiempon ipaalin APU DIOS di nahalman an ligat ke he-a, Ahas, nadah tatagum ya am-in nadan iibam. Nahalman an katatakut hituwen umalin holholtapon yun ligat mu nadan ligat an hiniktaman di boble taku nipalpu dih nihi-anan di Israel hi Judah. Ahina ipaali nan patul di Assyria ya nadan tindaluna.
18 Kediye ya ahi munhulpip hi APU DIOS ta panginilaan nadan iEgypt an kay da lalog an umalin malpuh kadawdawiyan an boble nadah hahapang nan Wangwang an Nile. Takon nadan iAssyria ya umali da damdaman kay da babayung 19 ta mihinap dan am-in tuh boble yu takon hanadah numpundotal, nadah liyang, nadah mapagit ya nadah kudal.
20 Kediye ya e ahi awiton Apu Dios nan patul di Assyria nah bah-el nan Wangwang an Euphrates ta umalin mangubat ke dakayu. Hidiyen patul ya umat nah matangdanan an mumpu-lit te dadagonan am-in di wadan dakayun kay na punlabahay emeng yu, hay buuk hi ulu yu ya takon hi adol.
21 Hantuh kadatngan diyen tiempo ya namahig di ahi punholholtapan nadan tatagun matdaan ta nadan himpapamilya ya hin-oh-an baka ya hindudwan kalnero ya abuy pangal-an dah itanud da. 22 Ta hidiye nan ammunay gatas ya iyyukan an kitaguwan nadan o-ohan tatagun ahi matdaan.
23 Kediye bon tiempo ya matoan nadan makaphod an lutan natanoman hi hinlibun grapes an mumbalol hi hinlibun kalang ta tummol di papagit ya gulun. 24 Ta pun-anupan mon nadan mun-anup te tinummol di o-ongal an holok takon nadan nungkapagitan. 25 Ta nadan nahabalan handi ya maid moy umeh di te tinummol di napagitan an holok ya hidiy panganan nadan babaka ya kakalnero.”

*7:1 7:1 Tibon yuy 2 Patul 16:5.

†7:2 7:2 Handi ya hi Ahas an patul ya nadan tindaluna ya inapput di iSyria ya iIsrael hi gubat. Tibon yuy 2 Chronicles 28:5-8.

‡7:3 7:3 Hay kibalinan nan ngadan an Sear Jashub ya “ahi waday o-ohan tatagun matdaan.”

§7:4 7:4 Hi Resin an patul di Syria ya hi Peka an patul di Israel ya umat da nah mungkad-op an duwan bala te nakapuy di tindalu da. Inapput di Assyriay Syria handih 732 B.C. ya nala-uy himpulun toon ya inapput di Assyriay Israel handih 722 B.C. ot ie da nadan iIsrael hi boble da ot mumbalin dan himbut hidi.

*7:8 7:8 Hanadan o-ohan natdaan an holag Israel an ugge nipaed Assyria ya naka-apput da ot handih nala-uy 65 an toon (669 B.C.) ya bokon mo diday mun-ap-apuh tatagu da, mu nadan nipaalin iAssyria an nunsakup ke diday mun-ap-apu.

†7:12 7:12 Hi Ahas ya man-uh kalina te ipatibonan mundinol ke APU DIOS, mu hay kakulugana ya nomnomnomonan mumpabaddang nadah iAssyria an mangubat hi iIsrael ya iSyria. Tibon yuy 2 Patul 16:7-9.

‡7:14 7:14 Hanan hinamad APU DIOS an kinalina mipanggep ke Emmanuel ya duway nipaannungana. Hay mamangulu ya intungon nan kat-agun babai nan golang an lalaki handih nala-u ya abuy kaatnan toon nipalpuh nangalyan APU DIOS ketuwe. Maid di maptok hin dahdih tuwen golang. Hay udum ya kanan day oha nadah linalakin imbabalen Isaiah. Hay udum ya kanan day imbabalen nin di ap-apu weno patul. Hay mikadwa ya nan intungon Maria an hi Jesu Kristo handih nala-uy dakol an toon nipalpuh nangalyan APU DIOS ketuwe.

§7:15 7:15 Hay udum an tatagun nanginilah Hebrew ya kanan day gapu te hay kanon nadan iJudah ya gatas ya iyyukan ya hidiyey kitib-anan ahi waday punligatan da. Mu hay ohan kibalinana ya ahi mahawwahawwal di makan ad Judah te kediye ya apputon di iAssyriay Israel ya Syria.

© 2004 WBT