1 Kediyen algo ya waday oha nadah tatagu ya ikanta day “Dayawon daka, APU DIOS! Bimmoh-ol kan ha-on ot kastiguwonak, muden inalubyagak bo te maid moy boh-ol mu. 2 He-a, Apu Dios di mangihwang ke ha-on. Madinolak ke he-a ya adiyak tumakut. Te he-a, AP-APU di nangidat hi ongal an kabaelak ya olot ku. Om, he-ay mangihwang ke ha-on.”

3 Hanadan tatagun APU DIOS ya ongal di amlong dah pangihwanganan dida, umat nah nauwon tagun umamlong hi panginumanah matuning an danum.

4 Kediyen algo ya ahiyu kanan di “Mumpasalamat takun APU DIOS! Mundasal takun hiya. Kalyon takun am-in hi tataguy inat na! Ya kalyon takuy mipanggep hi kinatag-ena! 5 Ikantaan takuh APU DIOS gapu nadah makaphod an inat na ya ipainila takun am-in hi tatagu dadiye. 6 Ditakun tatagud Zion, itkuk takuy kanta taku gapuh amlong taku, te nan Dios di Israel an makaphod an abu ya ongal di kabaelana ya makiha-ha-ad ke ditaku.”