1 Hituwey impainilan APU DIOS ke Isaiah an imbabalen Amos mipanggep hi kakastiguwan di iBabilon.

2 Itagge yuy bandela yu nah tap-on nan bilid an maid di kaiw ta punsinyas yu. Ya itukod yu nadah tindalut hogpon da nan mumpahhiyan boble an Babilon ta dadagon da. 3 Minandal APU DIOS nadan tindalunan makangngun-unud ke hiya ta gubaton da nadan pinhod nan kastiguwon*13:3 Hin-uddum ya usalon APU DIOS di tindalun di udum an boblen mangapput nadah mangipaholholtap nadah holag Israel. Umat ketuwe an minandal APU DIOS nadan iMedes ta dadagon da nadan iBabilon an nangie nadah holag Israel hi boble da ot mumbalin dan balud hidi. te namahig di boh-ol nan dida. Dadiyen tindaluna ya umamlong dah pangapputana.

4 Donglon yuy ngalan di dakol an tatagu nadah bibilid. Inamung APU DIOS an Kabaelanan am-in di titindaluh kabobboblet idadaana didan makigubat. 5 Mungkalpu dah nidawwin bobleh pingngit di lutat iusal APU DIOS didan manadag am-in hanadah bobled Babilon†13:5 Hay udum an nanginilah kalin Hebrew ya kanan day: Hay kibalinan di “am-in hanadah bobled Babilon” ya “am-in di boble tuh luta.” gapuh boh-ol na.

6 Muntutukuk kayuh takut yu te tuwen madatngan nan algon gintud APU DIOS an Kabaelanan am-in hi panadaganan dakayu. 7 Ahi kayu kumakkapuy te mama-id di tulid yu.‡13:7 Jeremiah 6:24 8 Ahi namahig di takut yu ya punholholtapan yu, umat hi punholholtapan di babaih puntungawana. Maid di maat yu, ammunay munhintotkol kayun matibon namahig di takut yu. Ya mun-iingit di anga yuh takut yu. 9 Ya ahi madatngan nan algon gintud APU DIOS hi pangipatib-anah namahig an boh-ol nat dadagona tun luta ta mumbalin hi adi maboblayan. Pakidadag nan am-in nadan naliwat. 10 Hanadan bittuwon ya bulan ya adida humiyo ya nan algo ya tumapol.§13:10 Tibon yuy Joel 2:10 ya 2:31 ya Revelation 6:12-13.

11 Kanan APU DIOS di “Dadagok tun lutat kastiguwok am-in di gaga-ihon tatagu gapuh liwat da, takon nadan mumpahhiya ya nadan makabbungot an tatagu. 12 Ahi o-ohay matdaan hi tatagu gapu ketuwen maat ta hidiye nan ahi dakdakol di bilang di namahman balituk mu dida. Om, ahi dakdakol di bilang di balituk ad Ophir mu hay tatagu. 13 Ha-oy an AP-APU an Kabaelanan am-in ya ipatibok di bungot kun iwagot kuy kabunyan ta makaan tun luta nah nipab-unana.

14 Hanadan e nakibobled Babilon ya mibangngad dah boble dan kay da makawan pumpudug di mun-anup ya kay da niwahit an kalneron maid di mangipattol ke dida. 15 Hanadan bumtik ot kuma, mu nadpap da ya tupigon di buhul da didat mate da. Ya nadan numbati nah boble ya mapate da metlaing. 16 Ya nadan imbabale da ya patayon di buhul da didan bakdungan da didah hinangngab da. Hogpon bon di buhul day babale dat pun-ala day nganne dadiyen wadah di. Ya nadan inayan da ya piliton di buhul dan ihuyop dida.”

17 Kanan bon APU DIOS di “Hingitok nadan iMedes*13:17 Hanadan iMedes ya numboble da nah parten di north an kanan dan Iran ad uwani. Datuwen iMedes ya nakid-um da nadah tindalun Cyrus an patul di Persia ot apputon day iBabilon handih 539 B.C. (Tibon yuy Jeremiah 51:11 ya 51:28. Tibon yu damdamay Daniel 5:31 ya 6:28.) ta gubaton da nadan iBabilon. Takon di kaatnan balituk ya silber di in-al-aluk dan didat adida ituluy an mangubat ke dida ya uggeda naal-aluk. 18 Ahida pumpana nadan kakat-agu ya adida homkon di goggolang ya u-unga. 19 Man-ut hay Babilon di kapkaphodan an boblen am-in tuh lutan ipahhiyan nadan bimmobled Babilon, mu ha-oy an AP-APU ya dadagok ta umat ad Sodom ya Gomorrah! 20 Ta maid mot ingganay mumbobleh di. Ya nadan mun-ine-en Arab ya adida e mungkampuh di. Takon nadan mumpattol ya adida ipattol di aggayam dah di. 21 Hidiy kiha-adan nadan aggayam nah adi maboblayan. Ya nadan nakadaddag an babaleh di ya kiha-adan nadan akup ya ostrich. Hanada damdaman mailom an gulding ya hidiy pun-ay-ayyaman da. 22 Ya nadan hay ena ya jakal ya diday miha-ad nadah mungkaphod an babalen di aap-apun nabao. Dandanin madatngan hidiyen nagtud an tiempon kadadagan di Babilon.”