54
Hanan pamhod APU DIOS nadah holag Israel
1 He-an boble an Jerusalem, mialig ka nah babain maid di imbabalena. Mu ad uwani ya itkuk muy kantam gapuh anlam. Dakol mo kayay imbabalem mu nan babain ug-ugge tinaynan di inayana.* 54:1 Galatia 4:27 2 Ongngalom ya ihamad muy pumbobleyam.† 54:2 Handih in-anamut APU DIOS nadan holag Israel an inilpunad Babilon an nihbutan da ya ong-ongal di kabaelan da ya immambilog di boble da. 3 Ahim pun-idoldol di poppog di boblem hi numpipiningngit ya ahim bangngadon am-in nadan boblem an sinakup di udum an boble. Ta nadan ongal an boblen maid di numboble ya ahi mapnuh tatagu.
4 Adika tumakut. Adika mo kaya mibabain ya adika mo madismaya. Makal-iwan mo nan kababain an inat mu handih kaungam ya makal-iwan nan makakkahmok an biyag yun umat hi biyag di nabalun babai. 5 Hanan nunlutun he-a ya mibilang an inayam an hay ngadana ya hi APU DIOS an Kabaelanan am-in. Hiya an makaphod an abun Dios di holag Israel ya ihwang daka. Hiyay Dios an Ap-apun am-in di boble tuh luta.
6 Mialig ka bo nah kat-agun babain nalahin an namahig an u-umyungan te tinaynan di inayana. Mu bangngadon daka mon APU DIOS an kananay 7 “Tinaynan daka ni-an hi nakatang,‡ 54:7 Hay kibalinan nin tuwe ya handih in-abulut APU DIOS an ien nadan iBabilon nadan holag Israel hi boble dat mumbalin dan balud hidi. mu gapuh ongal an pamhod kun he-a ya bangngadon daka. 8 Inwalong dakah nakatang gapuh boh-ol ku, mu adi mo mapoppog di naminhod kun he-a.” Hituwey kanan APU DIOS an nangihwang ke he-a.
9 “Handih tiempon Noah ya hinamad kun kinalin adik mo lobngon di luta.§ 54:9 Genesis 9:11 Ya ad uwani ya hammadok bon kalyon an adiyak mo bumoh-ol ke he-a ya adi daka mo kastiguwon. 10 Takon di mungkakagdey bibilid ya munnanong di pamhod kun he-a. Ya adik ibabawi nan hinamad kun kinalin he-an palinggopon daka.” Hidiyey kanan APU DIOS an ongal di pamhod nan he-a.* 54:4-10 Hanadan holag Israel ya imbilang APU DIOS an inayana. Ta hidiye nan handih nie dad Babilon ot midawwi dah boble da ya paddungnay imbolhen APU DIOS dida gapuh liwat da. Mu hinamad APU DIOS an kinalin ibangngad na boy pakihayyupan di holag Israel ke hiya.
Hay maat hi Jerusalem hi udum hi algo
11 Kanan bon APU DIOS di “He-an boble an Jerusalem, he-an munholholtap an boblen maid di mangalubyag ke he-a, iphod ku nan nadadag an boblem an usalok di nungkanginan babatu. Ta hay kipab-unam ya saphire. 12 Ya ikapyak di ruby an maingit an nanginan babatu nah natag-en pungguwalyaan an nipattuk nah tap-on di binattun alad mu. Ya ikapyak nadah hoob muy munlitaak an babatu ya ikapyak nadah alad muy gamgam.
13 Ha-oy di ahi manuttudu nadah tatagum ya idatak didah kiphodan da ya linggop da ya ahi ongal di an-anla da. 14 Hay maandong ya niptok an pangat di mangipal-ot ke he-a ya ahika mihwang nadah mangipaligligat ke he-a ya nadah nganneh diyen katatakut. 15 Adik ipaaliy mangubat ke he-a, mu hin kananat waday umalin mangubat ke he-a ya paapput ku dida.
16 Ha-oy di nunlutu nadah mumpanday an mangapyah almas. Ya lintuk bo nadan tindalun mangusal ke dadiyen pamate da. 17 Mu maid di almas an munliput ke he-a ya kabaelam an humangon di pabahul dan he-a. Ha-oy ya itakdog kuy muttatyuk ta mangapput.” Hituwey kinalin APU DIOS.
*54:1 54:1 Galatia 4:27
†54:2 54:2 Handih in-anamut APU DIOS nadan holag Israel an inilpunad Babilon an nihbutan da ya ong-ongal di kabaelan da ya immambilog di boble da.
‡54:7 54:7 Hay kibalinan nin tuwe ya handih in-abulut APU DIOS an ien nadan iBabilon nadan holag Israel hi boble dat mumbalin dan balud hidi.
§54:9 54:9 Genesis 9:11
*54:10 54:4-10 Hanadan holag Israel ya imbilang APU DIOS an inayana. Ta hidiye nan handih nie dad Babilon ot midawwi dah boble da ya paddungnay imbolhen APU DIOS dida gapuh liwat da. Mu hinamad APU DIOS an kinalin ibangngad na boy pakihayyupan di holag Israel ke hiya.