Joshua
Hay mipanggep nah liblu an Joshua
Hituwen liblu an Joshua ya ipainilanay nangipaannungan APU DIOS nah insapatanan Abraham an idat na nan boble an Kanaan hanadah holag na an nadan holag Israel. (Genesis 15:18-21 ya 17:18) Intugun APU DIOS handi nadah holag Israel an gubaton da nadan tatagud Kanaan ya patayon dan am-in di numbobleh di. (Deut. 7:1-5) Datuwen iKanaan ya nahalman di kinagaga-iho da te patayon da pay ahan di iimbabale dan gohbon dat iappit da nadah dios da. (Lebiticus 18:21-30)
Indat APU DIOS di kabaelan Joshua ya nadah ibbanan holag Israel an mangapput nadah tatagun numbobled Kanaan. Hituwey kitib-anan hi APU DIOS di makulug an Dios ya ongal di kabaelana mu nadan dios di iKanaan. Hay maadal nadan holag Israel hitu ya mahapul an punnananongon dan mangun-unud ke APU DIOS. Hiya ya abuy dayawon da ya punhilbiyan da te pinili na didan tataguna. (Deut. 7:6-11)
Hay nitudok ketuwen liblu:
1. Hinggop nadan holag Israel di Kanaan an boblen insapatan APU DIOS an idat nan dida. (chapters 1-5)
2. Nakigubat nadan holag Israel nadah iKanaan ot apputon da dida. (chapters 6-12)
3. Nunggogodwaan nadan holag Israel di Kanaan. (chapters 13-22)
4. Hay nanguddidin intugun Joshua nadah holag Israel ya nan natayana. (chapters 23-24)
1
Kinalin APU DIOS ke Joshua an ipangulu na nadan holag Israel ta ume dad Kanaan
1 Handih maid moh Moses an muttatyun nan AP-APU an Dios ya kimmalih diyen AP-APU nah kabaddang Moses an hi Joshua an imbabalen Nun. 2 Kananan hiyay “Ad uwanin maid moh Moses an muttatyuk ya mundadaan kayun am-in hanadah tatagut umagwat kayu nah Wangwang an Jordan ta ume kayu nah boblen idat kun dakayun holag Israel. 3 Kinalik tuwalin Moses handi an idat kun dakayun holag Israel am-in hidiyen boblen pangayan yu. 4 Hay poppog diyen boble ya mipalpu nah adi maboblayan hi south inggana nadah bibilid ad Lebanon. Ya mipalpu nah Wangwang an Euphrates nah nangappit hi timilan di algo, takon nan numboblayan nadan Hittite inggana nah Baybay an Mediterranean nah nangappit hi kalin-oban di algo. 5 Kalyok ke he-a Joshua an maid di mabalin an mangapput ke he-ad uwanin kataggum te wadaak ta ingganan bumaddang ke he-a, umat hi namaddangak ke Moses. Adi daka iwalong ke ha-on.
6 Pakodholom di nomnom mu ya mundinol kan ha-on ta adika tumakut te he-a moy mangipangulu nadah ibbam an holag Israel an e mumboble nah kinalik handidah aammod yun idat kun dakayu. 7 Mu mahapul an pakodholom di nomnom mu ya adika tumakut. Ya tibom ta un-unudom am-in nadan intugun kun indat Moses ke dakayu. Adim iwalong takon di oha ke datuwen tugun ta maphod ta nangamung di maat ke dakayu takon di daanay pangayan yu. 8 Mahapul an itugutugun mu datuwen nitudok an Tugun ku nadah tatagu. Ya takon di hilong weno mapat-al ya adaadalom nadan mituttudu ke dadiyen Tugun ku. Mahapul an un-unudom am-in dadiye, ta pumhod kayu ya maphod di pumbalinan am-in di aton yu. 9 Ya nomnomom nimpen wadaak ta nangamung an bumaddang ke he-a takon di daanay pangayam. Kinali adika madismaya ya adika tumakut. Pakodholom ot ya abuy nomnom mu ya mundinol kan ha-on.”
Hay in-olden Joshua nadah tatagu
10 Indani ya in-olden Joshua nadah aap-apun 11 ume dah kampun nadan tatagu ta kalyon dah tuwe ke dida: “Mundadaan kayuh makan te mala-uy tulun algo ya umagwat taku nah Wangwang an Jordan ta etaku mumboble nah boblen indat APU DIOS ke ditaku.”
12 Ya kanana nadah holag Reuben ke Gad ya nadah kagodwan di holag Manasseh di 13 “Adiyu kal-iwan di kinalin din hi Moses ke dakayu an idat APU DIOS an Dios taku tun bobled Jordan an nangappit hi timilan di algo ta pumboblayan yu. 14 Hanadan inayan yu, nadan imbabale yu ya nadan aggayam yu ya mihtu da. Mu dakayu ken tindalu ya ipangulu yu nadan ibba yun holag Israel ta umagwat taku nah Wangwang an Jordan ta baddangan yu dida 15 inggana sakupon takuh diyen indat APU DIOS damdaman didan bobled Jordan nah nangappit hi kalin-oban di algo. Ta deket malinggop mon am-in di holag Israel ya damanan mibangngad kayu ta mumboble kayu tuh nangappit hi timilan di algon intuddun Moses an muttatyun APU DIOS ke dakayu.”
16 Hinumang nadan tataguh Joshua an kanan day “Aton min am-in di iolden mu. Ya takon di daanay pangitud-akam ke dakami ya ume kami. 17 Un-unudon mi bon am-in di kalyom umat hi nangun-unudan min Moses. Hana ot ta baddangan dakan nah AP-APU an Dios taku, umat hi namaddanganan Moses. 18 Deket waday ohan tagun ngohayonay kalyom weno waday adi mangun-unud hi iolden mu ya mipipate. Adika munhalinduwa, mu mundinol ka ya atom am-in di kabaelam.”