16
Hanadan boblen nidat hi holag Eplaim ya holag Manasseh
Hanan poppog nan boblen nidat nadah holag Joseph nah nangappit hi south ya nipalpud Jordan an nih-up ad Jericho inggana nadah ob-ob di Jericho nah nangappit hi timilan di algo ot mumpatikid nah adi maboblayan. Nipalpu boh di ot mumpae nah mabilid an boble ingganad Bethel. Ot mumpae bod Lus an indalanad Atarot Addar an numboblayan nadan Arkite. Ya numpae boh numboblayan nadan holag Japlet nah nangappit hi kalin-oban di algo inggana bo nah da-ul di Bet Horon. Ot mumpaed Geser inggana bo nah Baybay an Mediterranean.
Datuwen bobley nidat nadah holag Eplaim ya godwan di holag Manasseh an imbabalen Joseph an pumboblayan da.
Datuwey poppog di boble da: mipalpud Atarot Addar ot mumpaeh nangappit hi timilan di algo inggana nah tap-on di Bet Horon. 6-7 Ot ahi mumpae nah Baybay an Mediterranean. Hay poppognah nangappit hi timilan di algo ya lina-uwanay Mikmetah ot mumpaed Taanat Siloh ot mumpalikkod ad Janoah. Nipalpu boh di ot mumpadayyud Atarot ya Naarah ingganad Jericho ot mipoppog nah Wangwang an Jordan. Nipalpu bod Tappuah ot mumpaeh nangappit hi kalin-oban di algo inggana nah wa-el an Kanah ot mipoppog nah Baybay an Mediterranean. Datuwey nidat nadah holag Eplaim an pumboblayan da. Nid-um an nidat ke dida nadan i-itay an boblen wadah poppog di lutan di holag Manasseh.
10 Mu uggeda dinog-al nadan Kanaanite an numbobled Geser ot makiboble da nadan holag Eplaim ingganad uwani. Mu numbalin dadiyen tataguh himbut nadah holag Eplaim.