1 APU DIOS, maan-anla nan patul nah ongal an kabaelam. Pun-am-amlonganay nangipangapputam ke hiya. 2 Indat mun am-in di pinhod na, maid di uggem indat.

3 Indatam boh ongal an bendisyon ya pingngotam hi balituk. 4 Imbaganan he-an ihwang muh kate ya timbal mu, ot idatam hi andukken biyag na.

5 Madayaw hidiyen patul ya nundingngol te impangapput mu. 6 Pun-amlonganay kawadam ke hiya ya munnanong ta nangamung ke hiyay bendisyon mu. 7 Man-uke ya mundinol hidiyen patul ke he-a, APU an Katagtag-ayan. Ta hidiye nan nunna-ud an luminggop an maid di pundanagana te ongal di pamhod mun hiya.

8 Gapuh ongal an kabaelam ya pumbalinom an balud am-in di buhul mun humihhingit ke he-a. 9 Ya dadagom didan am-in, umat hi panadag di ongal an apuy. Om, pakadadaggom dida gapuh namahig an boh-ol mu hantuh pumpatib-am 10 ta maid di matdaan an tumaguh holag dadiyen buhul mu te patayom didan am-in. 11 Man-ut ihamad dan mumplanuh gaga-ihon aton dan he-a, mu adi maat di iplanu da, 12 te ahida mamtik hantuh pangidongdongam hi panam ke dida.

13 Ta hidiye nan dayawon daka, APU DIOS, gapuh ongal an kabaelam ya ikankanta miy amlong mi nadah inainat mun umipamodwong.