1 Apu an Dios ku, tipet inwalongak ke he-a?*22:1 Tibon yuy Mateo 27:46 ya Marcos 15:34. Mumpahpahmokak anhan ta baddanganak, mu adiyak donglon. 2 Mundasalak nah mapat-al ya hilong ta baddanganak, mu adiyak donglon. Maid pe kattog di linggop ku.

3 Mu he-a, Apu Dios an patul ya makakkaphod kan abu. He-ay daydayawon min holag Israel, 4 ya he-ay nundinolan handidan aammod mi ot ihwang mu dida. 5 Numpahpahmok dan he-a ot baddangam dida ot uggeda nadismayah nundinolan dan he-a.

6 Mu ha-oy ya kayak pe kattog bokon taguh pangat di tatagun ha-on. Om, umatak pe kattog nah kolang hi lutan punhinggagattinan da. 7 Taltalanggaanak am-in hanadah manibon ha-on ya pumpadngolanak ya munwigiwig dan 8 kanan day “Deket hi APU DIOS di pundinolam, ne aga ya- hin ihwang dakan hiya. Gulat nat maka-amlong ke he-a ya tipet adi daka baddangan?”†22:8 Mateo 27:43

9-10 APU DIOS, he-ay nangipaptok ke ha-on nipalpu dih nitungawak. He-ay nundinolak an Dios ku handi ingganad uwani, 11 kinali adika anhan midawwin ha-on te mabulubulunak ya he-a ya abuy mabalin an mamaddang ke ha-on.

12 Linikkubak hi dakol an buhul kun umat hi bubulug nadah kudal ad Basan 13 ya umat da nah mun-olmom an layon an nidadaan an umihakmal.

14 Hay olot ku ya paddungnay danum an mungkiduyag. Ya hay punggibok ku ya kay nungkahpung di gugunit ku. Ya maid di tulid ku. 15 Maid di olot ku. Nakammag-anan di dilak ya nipkot hi alangngaang ku. Tinayananak tuh lutat mateyak hitu.

16 Linikkubak hi gaga-ihon tatagun kay aahu ya tinuduk day taklek ya hay hukik. 17 Makahakkit di adol ku ya makattiboy gugunit ku. Ya maan-anla dan mangang-ang-ang ke ha-on an munholholtap. 18 Ingkap-ong day bulwatik ya imbubunut day mangala nah bulwatik an naabol.‡22:18 Tibon yuy Juan 19:24.

19 APU DIOS an mamadbaddang ke ha-on, adika anhan midawwi, mu baddanganak. 20 Ihwangak ta adiyak patayon ke datuwen tatagun paddungnay mabubungot an aahu. 21 Ihwangak hi katatakut an aton datuwen gaga-ihon tatagun mialig nah layon ya mailom an bulug te maid di kabaelak an makihanggan dida.

22 Ipainilak nadah tutulang kuy mipanggep ke he-a, APU DIOS. Ya ahiyak makikankantan didah pundayaw min he-a.§22:22 Hebrews 2:12 23 Ahik kanan di “Dakayun makangngun-unud ke APU DIOS, hiyay dayawon yu! Om, dakayun holag Jacob an tatagud Israel, hiyay dayawon yu! 24 Hiya ya adina iwalong nadan nawotwot. Baddangana dida nah tiempon di punligatan da ya nidadaan an bumaddang nah punhapulan dah baddang na.”

25 APU DIOS, dayawon daka ya ipaannung ku nan kinalik an iappitan daka nah kaam-amungan nadan mundayaw ke he-a. 26 Hanadan nawotwot an mundinol ke he-a ya makangngan da ya mabhug dat dayawon daka. Om, am-in nadan mundinol ke he-a ya nunna-ud an dayawon daka. Ya hana ot ta pumhod di biyag da ya maan-anla dat nangamung.

27 Ahi nomnomon am-in di tataguh kabobbobleh APU DIOS ta ibangngad dan mundayaw ke hiya 28 te hiya ya nakattag-en patul ya Ap-apun di katagutagu tuh luta.

29 Am-in di kakadangyan ya munyuung dat dayawon dah APU DIOS, takon nadan mungkatkate ya athidi damdamay aton da. 30 Ahi munhilbi ke Apu Dios nadan mitun-ud an holag taku. Ya ahi donglon di iimbabale takuy mipanggep ke hiya te nundingngol hiya. 31 Takon nadan ahi mitungo ya ahida inilaon di nangihwangan Apu Dios ke ditakun tataguna.