1 Am-in kayun tataguh kabobboble, itkuk yuy pundayaw yun Apu Dios. 2 Ikanta yuy mipanggep hi madayaw an ngadana ya hay pundayaw yun hiya. 3 Kanan yun Apu Dios di “Umipamodwong nadan atom. Ya ongal di kabaelam, ta hidiye nan mundukkun nadan buhul mun he-a gapuh takut da. 4 Dayawon dakan am-in hi tagu tuh lutan ikanta day pundayaw dan he-a ya pundayaw dah ngadan mu.”

5 Nomnomon yu nadan umipamodwong an inat Apu Dios an kiphodan di tataguna. 6 Winadanay mamagan dalan nah gawwan di baybay ot umagwat nadan tatagunan uggeda natina. Kinali mun-an-anla taku gapu kediyen inat na. 7 Hiyay munnanong an mun-ap-apu gapuh ongal an kabaelana. Halipat-anay aton di katagutaguh kabobboble. Ta hidiye nan dakayun mungngohe, adiyu ipatnan hanggaon hiya.

8 Am-in takun tatagu, dayawon takuh Apu Dios. Olton takun mungkantah pundayaw takun hiya. 9 Hiyay nangdon hi biyag taku ya tibonat adi taku maapput.

10 Pinatnaan dakamin he-a, Apu Dios, umat nah silber an ayugon hi apuy ta mamahma. 11 Paddungnay kinna dakami ot ipahakbat muy madam-ot an ligat ke dakami. 12 In-abulut mun apputon dakamih buhul mi ot namahig di numpaholholtap dan dakami. Paddungnay impundallan dakamih apuy ya impun-agwat dakamih umianud an danum. Mu kay anhan ya impadatong dakami tuh boblen wadan am-in di mahapul mi.

13-14 Umaliyak an mun-appit hi maghob nah Templom ta ipaannung kun iappit nan insapatak handih mabulunak. 15 Om, mun-appitak ke he-a hi baka, gulding ya kalneron maghob an umipaamlong ke he-ay hamuy na.

16 Makayun makangngun-unud ke Apu Dios ta donglon yuy kalyok mipanggep hi inat nan kiphodak. 17 Nundasalak ke hiya ta baddanganak ya ingkantak di pundayaw kun hiya 18-19 ya dingngol nay dasal ku ot baddanganak te kinalik am-in ke hiyay liwat kun maid di uggek kinali. Mu gulat nat waday inhaut ku ya nunna-ud an uggena hinangud di dasal ku.

20 Dayawok hi Apu Dios te hinumang nay dasal ku ya impunnanong na nan adi malumman an pamhod nan ha-on.