35
Aisaia 35
Anutu täŋo ämawebeniyetä oretoret bumta api täneŋ
1-2 Kome jopi kawukitä oretoret api täŋpek. Bureni, kome waki unitäkaŋ kämiwä gäripi nikek api ahäwek, Lebanon täŋo pom terak ba Kamel kenta Saron awaŋken imaka imaka säkgämän ahäk täkaŋ ude bumik.
Täŋkaŋ oretoret täŋpäŋ kap bumta api tewek. Ude ahäŋirän ämawebe Yawe Anutu täŋo kehäromi, wäp biŋam ba epmäget api käneŋ.
3 Unita äma kehäromini nämo ba äma kujari kwaiwani manbiŋam u yäwetpäŋ bänepi kaŋ täŋkehäromtaŋ yämik täŋput.
4 *Hib 12:4-13 Täŋkaŋ äma täŋumun-umun täŋpani ŋode yäwet täkot; Kwaineŋo! Kehärom taŋpäŋ itkot.
Nadäkaŋ? Anutujin äneŋi äbäŋkaŋ iwanjiye kokwawak nadäŋ yämiŋpäŋ komi piä api yämek. Täŋkaŋ inä api tämagurek.
5 *Ese 29:6-7; Mat 11:5; Luk 7:22 Täŋpäkaŋ kadäni uken dapuri tumbanitä dapun api ijineŋ, ba man nämo nadäwanitä api nadäneŋ.
6 Kuroŋi wakitä pidäm tawäpäŋ tubupeŋtäŋ api kuŋatneŋ. Ba meberi bäräpitä man gera yäŋpäŋ oretoret kap api teneŋ. Täŋpäkaŋ kome kawukiken ume dapuritä ahäŋkaŋ kome jopiken kudup api kuŋatneŋ.
7 Bureni, kome kekeki, tom ägwäri-tägän iraniken ume gwägu tokŋeŋpäŋ wädan ahäŋ bumbum api täneŋ.
8 *Hib 10:20-23; Efe 2:10; 1Te 4:7; 2Ti 1:9; Tai 2:11-14 Täŋpäkaŋ uken kädet taŋi kubä api pärek. Kädet uwä wäpi Kudupi Kädet yäŋ api yäneŋ. Äma bänepi nämo ket urani ba guŋ kädet wakiwaki täŋpanitä kädet u nämoinik api iwatneŋ.
9 Ämawebe kädet u iwatnayäŋ täkaŋ uwä laion ba iwan ätu nämo api yabäneŋ. Nämo, ämawebe wakiken nanik yämagurani unitägän kädet uken kuŋ-äbäŋ api täneŋ.
10 *Rev 7:9, 14:1-4, 15:2-4, 19:7 Bureni, ämawebe Yawetä inita biŋam suwawanitä komeniken äneŋi kukta kädet u oretoret terak api iwat yäpmäŋ äroneŋ.
Kap teŋtäŋ äroŋtäŋgän Saion api kaŋ-ahäneŋ.
Täŋkaŋ uken butewaki nadäwätäk paotinik täŋpänkaŋ oretorettä oretoret pähap api täŋ yäpmäŋ äroneŋ.