Jona
Profet kubä Anutu täŋo man buramikta bitnäŋkuk
1
Yawetä Jona piä man iweränkaŋ ämetpeŋ kuŋkuk
1 *2Kin 14:25Yawetä Jona, Amitai täŋo nanaki ŋode iwetkuk; 2 Eruk gäk yotpärare pähap wäpi Ninive uken ku yäk. Kuŋat-kuŋari gwäjiwani wakiinik yabäŋpäŋ-nadäk täŋkuro unita päŋku kome mähem man kehäromi, komigämän kaŋ yäwet yäk. 3 *1Jo 4:2; Jer 20:7-9; Luk 9:62; 1Ko 9:16Anututä Jona man ude iweränkaŋ Jonatä Yawe täŋo man bitnäŋpeŋ ämetkuk. Ämetpeŋ gäpe terak Tasis yotpärareken kwa yäŋpäŋä Jopa yotpärare gwägu dubiniken kuŋkuk. Uken gäpe kubä Tasis komeken kwayäŋ täŋirän kaŋ-ahäŋkuk. Kaŋ-ahäŋpäŋä Yawe kaŋumuntaŋ käbop irayäŋ nadäŋkaŋ Tasis kwayäŋ gäpe suwaŋpeŋ äroŋkuk.
4 Eruk äroŋpeŋ kuŋirän Yawetä mänit pähap peŋ iwet-pewän piäŋirän gwägu wakiinik täŋkuk. Wakiinik täŋpäŋ gäpe imärayäŋ täŋkuk. 5 Imärayäŋ täŋirän gäpe täŋo piä äma umuntaŋpäŋ anutu iniken iniken uken gera yäŋkuŋ. Täŋpäŋ gäpetä pidäm tawän yäŋpäŋä tuŋum ätu gwägu gänaŋ ureŋ täŋpä äpmoŋkuŋ. Ude täŋ irirä Jona uwä gäpe miyäkiken äpmo däpmon patguŋ taŋkuk.
6 Patguŋ taŋirän gäpe täŋo mähemitä äpmoŋpäŋ Jona kaŋpäŋ ŋode iwetkuk; Gäk mebäri jideta däpmon ŋo pat itan? Eruk aku! Gäkŋo anutuken gera yä! Yäŋiri butewaki käwep nadäŋ nimiŋpäŋ täŋkentäŋ nimiŋirän nämo paotne yäk. 7 Ude yäŋirän gäpe täŋo piä ämatä yäŋpäŋ-nadäk täŋpäŋ yäŋkuŋ; Eruk, netä täŋo mebärita imaka umuri pähap ŋo ahäŋ nimitak yäŋ kaŋ-ahäkta kären täŋpäŋ käna yäk. Ude yäŋpäŋ kären täŋirä Jonaken ahäŋkuk.
8 Jonaken ahäŋirän kaŋpäŋ ŋode iwetkuŋ; Gäk niwet yäk. Imaka ŋo netä täŋo mebäri terak ahäŋ nimitak? Gäk ima piä täk täyan? Gäk de naniktä äbätan? Gäk komeka de nanik? Ba netä täŋo äma äbotken nanik? 9 Yäŋirä yäwetkuk; Näk Hibru äma yäk. Yawe Anutu kunum gänaŋ nanik kome gwägu pähap yäwän ahäŋkuŋo u oraŋ imik täyat yäk.
10 Ude yäŋpäŋ Yawe kaŋumuntaŋ ämetkut yäŋ yäweränä äma gäpe gänaŋ itkuŋo unitä umun pähap taŋpäŋ iwetkuŋ; Yäke! Gäk umuri udewani imata täŋkun? 11 Täŋkaŋ gwägu wakiinik täŋpewän äneŋi iwet yabäŋkuŋ; Jide täŋ gaminapäŋ gwägutä wareŋi nämo pärek? 12 Yäwäwä Jonatä yäwetkuk; Näk yäpmäŋpäŋ gwägu gänaŋ maŋpä äpmoŋira uyaku gwägu wareŋi nämo pärek yäk. Nadätat, gwägu wakiinik täyak u näka yäŋpäŋ täyak yäk.
13 Ude yäweränkaŋ Jona täŋo man nämo buramiŋpäŋ gäpe gwägu gägäni käda kwän yäŋpäŋ keritä bumta täŋ-iwatkuŋ. Täŋ-iwatkuŋo upäŋkaŋ gwägu wakiinik-inik täŋkuko unita täŋpä waŋkuŋ. 14 Täŋpä waŋtäko Yaweken butewaki gera ŋode yäŋkuŋ; O Yawe, äma ŋo gwägu gänaŋ mäna äpmoŋirän, gäk mebäri injinken itak yäŋ niwetkaŋ nibäŋ äwaräkuk täŋiri nämo paotne! Yawe, gäkŋa nadäŋpäŋ täŋkaŋ nintä terak nämo yäwen yäk. 15 Täŋpäŋ äma unitä Jona yäpmäŋpäŋ gwägu gänaŋ maŋpä äpmoŋirän gwägu wareŋi nämo patkuk. 16 Täŋirän äma itkuŋo unitä Yaweta bumta umuntaŋpäŋ bänep täŋkwitakta gupe käbäŋi nikek ijiŋ imiŋpäŋ Yaweta watä piä täŋ imineŋta yäŋkehärom taŋkuŋ.
17 *Jon 4:6; Mat 12:40, 16:14; Luk 11:30Täŋpäkaŋ Yawetä gwägu tom taŋi pähap kubä iniŋ kireŋpewän Jona kämän äpmoŋkuŋ. Kämän äpmoŋirä Jona gwägu tom pähap u koki gänaŋ kepma bipani yaräkubä ude patkuk.