2
Nínive e-chikahu
1 Unubẹ ndu Nínive; onye a-bya achịkashia unu nanụ nanụ abyaakwa.
Unu chekwa ụlo-mgbochi unu nche;
unu echekwaphu nche l'ụzo ono!
Unu rụkotakwa onwunu arụkota;
unu arụkotakwaphu ike unu l'ọ ha!
2 A makwarụa lẹ ndu ọhogu
gwowaru iphe ẹphe kpakparakpa;
bya emebyishikota iphe
ẹphe meberu l'alị l'ọha;
obenu lẹ Ojejoje e-mekwa
tẹ ugvu awa Jékọpu
laphutaru ẹphe azụ ọdo;
t'ọ bya adụ ugvu ẹge
ndu Ízurẹlu shi adụjehawa.
3 Iphe ndu sọja iya egudeje
egbochita onwẹphe;
bẹ ekekota uswuswe.
Ndu sọja ẹphe eyekota uwe, eke mee-mee.
Mgbọro-ígwè, e gude mee
ụgbo-ịnya ọgu ẹphe
egbukwa ngerengere
mbọku ono,
ẹphe kwakọberu kẹ ọgu ono.
Arwa ẹphe; bẹ ẹphe gudewa
aba mbavu-ọgu.
4 Ụgbo-ịnya ẹphe awụkwa
kpọtikpoti l'iphe bụ esu-ụzo;
ẹphe jiru edukfu ji:
ẹphe -jee ifu; ẹphe alaa azụ.
Ẹphe l'ẹphe ha tụko
dụ l'ọ bụ ọku itsu-ọku;
l'ezigbaa phaphapha l'ọbu ebemu-igwe.
5 Ndu sọja iya ndu ọphu a fọru afọfo
b'o kukobewaru l'ẹkalanu;
ọle ẹphe tụko ejelee l'evuko alị evuko.
Ẹphe ekwojeru jeshia lẹ mgbodo,
e gude kpụ-pheta mkpụkpu ono;
iphe eegude egbochi onwonye l'ọgu
egbe nọdugbawa nụ lẹ mgbodo ono
kẹ jịngu-jingu.
6 Ụzo, eeshi eje ẹnyimu; b'e tsukafuwaru;
gheru ọnu.
Iphe bụ ndu, nọ l'ufu-eze
bẹ ẹhu aanmakwa nmanma.
7 A tụwaru iya l'ọ bụ iwu
lẹ ndu mkpụkpu-wa; bẹ aa-kpụ lẹ ndzụ;
laa alị ọdo.
Ụnwu-mgbọko, a-nọdu
agbaru ẹphe mbọyi;
kụgbaaru ẹka l'ukuvu; l'akpọ kukuku.
8 Nínive dụlephu l'ọ bụ okpuru,
mini, nọ iya nụ awụfu
awụfu l'ọ bụ nggele.
Iphe aaragbaa bụ:
“Unu vudo-o! Unu vudo!”
Ọ bụ l'ẹ t'o nwedu m'ọo onye lanụ,
gharu ẹnya l'azụ.
9 Unu vua mkpọla-ọcha; vua mkpọla-ododo;
kẹ l'ẹku, mkpụkpu-wa
doberu bukwa 'erige erige.
10 Mkpụkpu ono dabuakwaru iphoro;
Ọ bụwa kpurupyata; daburu ochobo.
Iphe bụ ndu bu iya nụ;
bẹ meji tọfukotaakwaru:
ikpere l'avụkota ẹphe kwẹrikweri;
ẹhu atụko l'anma ẹphe kpakpakpa;
ifu agbanwụshihukota ẹphe agbanwụshi.
11 ?Nanụ ẹke iduma-agụ ono nọ;
mbụ ẹke ono,
ọonoduje anụ ụnwu iya nri ono;
mbụ ẹke oke agụ yẹle nyee ya shi ejeje;
ẹphe l'ụnwu ẹphe;
to nwe iphe ẹphe atsụ egvu?
12 Agụ ono shi egbujeru ụnwu
iya anụ, e-dzuru ẹphe;
dzụ-gbushia anụ pata je atọgboru nyee ya;
O shi egbuje anụ je edojia ọgba iya edoji;
lajashịa anụ bya akụbe l'ọgba iya.
13 Ọwaa bụ iphe Ojejoje, bụ Ọkaribe-Kakọta-Ike kfuru. Ọ sụru: “T'unu lenu; ya achịkwaru unu ẹjo idzu. Ya e-gude ọku dzụpyashia ụgbo-ịnya unu; yọ kpọo ẹnwuru-ọku; kpoo tụu. Ọ bụ ogu-mbeke; bẹ ee-gude gbushia ụnwu agụ unu pyaapyaa. Ẹ tọ dụkwa anụ, ya a-haru unu lẹ mgboko t'unu gbujee; taa. Ọphu 'onwedu l'anụkwadua olu ndu ozi ngu ọdo.”