3
Iphe-ẹhuka, Nínive e-je
1 Aphụ a-tsụru mkpụkpu ono,
bụ mee jiru iya ono.
Ọ bụ ẹjo-ire; mẹ iphe a nakọru lẹ nfụ;
bẹ jiru iya nụ;
ọphu 'onwedu teke
aa-kpabuhu iya madzụ ẹhu akpabuhu.
2 Unu ngabẹnu nchị nụa ọda ẹchachi;
ọda ụgbo-ịnya, agba ọso;
igidi ịnya, akfụ wugengu wugengu;
mẹ ụgbo-ịnya, awụ l'etso iya nụ.
3 Ndu agba ịnya-ọgu; bẹ ifu bọhuakwaru.
Ẹphe gudeakwa ogu-mbeke ẹphe aba
mbavu-ọgu: arwa ẹphe
l'adagbaa kẹ swịmu; swịmu.
Ndu e gburu l'ọgu dụ l'igwe;
odzu ndu nwụshihurunu akụru;
odzu madzụ abụru 'agụta agụta;
k'ọphu aadzọtsua ẹphe ọkpa l'esweta.
4 Iphe kparu iphe ono l'ọha bụ
lẹ nwanyi ọkpara ono tsonukaru nwoke;
kẹ l'ọomashi mma ike;
l'agwọshikwaphu ọgvu ike;
onye egudeje kẹ unwoke,
ootso reshia mba, dụ iche iche.
5 Ojejoje, bụ
Ọkaribe-Kakọta-Ike sụkwaru:
“T'i lekwa! L'obu ta dụhekwa
iya mma l'ẹke ịino.
Ya a-jị-likwa mkpuni ngu; ghaa ngu l'ifu.
Ya e-me tẹ iphe bụ
mbakeshi phụ ngu l'ẹke ịigba ọtu.
Iphere e-gude ngu l'ifu
alị-eze, dụ iche iche.
6 Ya e-me ngu ẹjo ahụma;
nggu adụ oyi l'ẹnya;
Ya e-me t'ẹ b'ọ dụhe iphe aa-gụbe ngu;
mee ngu t'ị bụru iphe
ee-gude l'akọ ọnu.
7 Iphe bụ ndu phụru ngu nụ
a-kpọ-yiru ngu ukuvu;
sụ: ‘Lẹ Nínive; bẹ ẹgbara kfụakwaru;
?Bụ onye a-yọru iya ọshi;
bụ onye l'a-dụ iya ike.’ ”
8 Nínive; ?ị ka Tebusu mma tọo; mbụ mkpụkpu ono, bu l'ọnu ẹnyimu Náyịlu; mini gbapheru mgburumgburu ono? Ọ bụ ẹnyimu ono bụ iphe egbobutaje iya nụ; mini ẹnyimu ono abụru ụpho-mkpuma, e gude kpụ-buta iya. 9 Ndu Itiyópiya yẹle ndu Íjiputu shi bụru agbarike iya; ike ta agvụje ẹphe agvụgvu. Ndu Putu mẹ ndu Líbiya shitsukwaa bụru ndu yẹ ya tụgbaberu bụru nanụ. 10 Ọle e megekwarụa; kpụa ya lẹ ndzụ laa alị ọdo. Ụnwegirima iya; ndu ọphu angụ ẹra b'e gweru rakaraka lẹ mbadụzo. Ndibe iya ndu ọphu a maru ẹpha ẹphe; b'a tụru ido; gude keshia ẹphe. Ndu ọphu bụ oke amadụ l'ẹphe b'a tụshiru mkpakọbe; keeru ndu ọhogu ẹphe.
11 Unubẹdua l'onwunu; bẹ mẹe e-gudekwaphu. Unu e-mekochaa achọ ẹke unu e-domi onwunu tẹ ndu ọhogu ba aphụ unu. 12 Iphe bụ ụlo, unu kpụshiru ike a-dụkotakwa l'ọbu oshi figu, akpụru iya kẹ mbụ chashịru achashị, abụje; a -nma ya yikayika; nebyi iya adashịa l'ọnu ndu a-ta iya nụ. 13 Unu lewaru ndu sọja unu ẹnya; phụ ẹge ẹphe dụtsua l'ọ bụ ụnwanyi. Iphe bụ ọnu-ọguzo, eeshije abata mkpụkpu unu l'ẹphe ha; bẹ ghekotaru ọnu; k'ọphu ndu ọhogu unu e-shi iya wụbata. 14 Unu kukwaa mini sụa malẹ ọgvu teke ndu ọhogu unu a-bya eyebuta unu! Unu emee tẹ ụlo ono, unu kpụshiru ike ono kabaa oshihu ike! Unu dzọo ẹja; mekwashia iphe e gude ayọ bụloku; yọshia bụloku.
15 Ọ kwa l'ẹke ono; bẹ ọku a-dzụ-gbushi unu; e gude ogu-mbeke gbushia unu pyaapyaa. Unu kabaa l'igwe l'ọ bụ ogu; mbụ zaa l'ọ bụ igube! 16 Ndu azụru ngu aswa b'i mewaru; ẹphe azaa l'igwe ka mkpọ-kpodo, nọ l'igwe; obenu l'ọ bụ ẹge igube azaje l'igwe bụ ẹge ẹphebedua a-za bya egwotagee iphe nọ l'alị ono; mee wangu. 17 Ndu eche ngu nche etsu l'ọbu igube; ndu ishi-ọru ngu anyịnwua l'ọ bụ igube, mbọku oyi atsụ; je anyịnwua lẹ mgbodo. Anwụ -chidelephu; ẹphe ephekashihu; tọ nwe onye a-ma ẹke ẹphe ala.
18 Nggụbe eze ndu Asiriya; ndu echeru ngu atụru; bẹ mgbẹnya tụtsuakwaru. Ndu a maru ẹpha ẹphe chịakwaru ẹka ye l'ifu ụtakfu; nọ-kirishia. Ndibe ngu gbawaru nanụ nanụ l'ugvu ugvu; tọ dụ onye e-je ẹphe achịkobe. 19 Iphe e mekaru ngu te nwekwa ọgvu; ọnya, nọ ngu l'ẹhu; bẹ ishi nggu l'iya a-yịkwa. Iphe bụ onye, nụru ẹge ọomuru ngu a-nọdu etekwa ẹswa k'adada, ị daru. Ishi iya abụru: ?bụ onye b'ẹ ti meedua ẹjo iphe?