1 Napaparin si Āri Nebokadnessar so asa balitok a istatwa a sasyam a poho a kadapan so katohos kan sasyam a kadapan iyaw kawbong na. Pinatnek na do tanap do Dora do probinsya no Babilonya. 2 Do nakatayoka naw, pinatawag ni Āri Nebokadnessar a maychipeh saw pangpangōlo, komisyonado saw, gobirnador saw, kan siraw mamagbaga saw, trisoriro saw, hwis saw, hīpi saw, kan sira tabo kadwanaw a opisyalis do probinsya saw a mangay do didikasyon no istatwaw a pinatnek na. 3 Sinpangan na, naychichipeh sa tabo opisyalis saw do didikasyonaw no istatwa a pinatnek ni Āri Nebokadnessar, kan naychatetēnek sa do salapenaw no istatwa.

4 Sinpangan na, iyaw pinakadangoy naw ni āri, ki kinalyak na inwaragāwag a kāna, “Nyaw no naibilin dyinyo a tawotawo do tabo nasnasyon kan kapaychirin: 5 Anchan madngey nyo ōni no tanggoyob,*3:5 Iyaw tanggoyob, ki olong no animal. pīto, tatdo a soli a nakakordas, lyra, arpa, kan tabo kadwan saw a kīta no pagtokaran, ki magrōkob kamonchi do tana a magdaydāyaw do balitokaya a istatwa a pinatnek ni Āri Nebokadnessar. 6 An sino dya magrōkob kan dya magdaydāyaw, ki insigīda a maipakbong do gomilgilāyab a apoy.”

7 Dawa, apāman a nadngey no tawotawo do tabo nasnasyon kan kapaychirin iyaw ōni daw no pagtokaran saw, ki nagrōkob sa tabo kan nagdaydāyaw sa do balitokaya a istatwa a pinatnek ni Āri Nebokadnessar.

8 Ki do dāwri, siraw kadwan saw a manalādo, ki nangay di āri, kan maylaylangetnget sa a napagatos siras Jodyowaw. 9 Binata da di Āri Nebokadnessar a kon da, “O āpo āri, mabyay ka pakono a magnanayon! 10 Naikeddeng mo, mo āri a aran sino a tawo a makadngey so ōni dan pagtokaran saya, ki machita a magrōkob sa kan magdaydāyaw do balitokaya istatwa. 11 An sino dya magrōkob kan magdaydāyaw, ki maipakbong do gomilgilāyab a apoy. 12 Ari saw kadwan a Jodyo a tinongdo mo a manyidechideb do probinsya no Babilonya a sa Sadrak, Mesak, kan Abednego. Ikāso dabaw imo mo āri. Magsīrbi sabaw dyirad dyos mwaya mana magdaydāyaw do pinatnek mwaw.”

13 Do dāwri, do taywaraw a nakapakasoli ni Nebokadnessar dyira, inbilin na a iyangay da sa Sadrak, Mesak, kan Abednego. Dawa, inyangay da sa do salapen na. 14 Inyahes ni Nebokadnessar dyira a kāna, “Oyodori mo Sadrak, Mesak, kan Abednego a dyi kamo a magsirsīrbi dyirad dyos ko kan dya magdaydāyaw do balitokaya a istatwa a pinatnek ko? 15 Changori anchan madngey nyo iyaw ōnyaw no tanggoyob, pīto, tatdo so soli a nakakordas, lyra, arpa, kan tabo kadwan saw a kīta no pagtokaran, magsagana kamo a magrokob kan magdayaw do istatwaya. Maganay nyaya. Amnan dyi kamo a magdaydayāw, mapayongeb kamo a insigīda do gomilgilāyab a apoy. Do dāwri, aryoriw dyos a makaisalākan dyinyo do tonoro ko?”

16 Tominbay sa Sadrak, Mesak, kan Abednego do āryaw a kon da, “O Āri Nebokadnessar, machita namen aba a ikalintegan inawan namen do salapen mo a maynamot do dyaya. 17 An maipayongeb kami do gomilgilāyab a apoy, iyaw Dyosaw a pagsirsīrbyan namen iyaw makaparin a mangisalākan dyamen do apoyaw, kan iyanchiw mangisalākan dyamen do tanoro mom āpo āri. 18 Ki aran dyi na isalākan yamen, alit na ipakatoneng namen dyimom Apo āri a magsirsīrbi kami aba polos dyirad dyos mo saya, kan polos a dyi kami a magdaydāyaw do balitok a istatwa a pinatnek mo.”

19 Do dāwri, naypāngay nakapakasoli ni Nebokadnessar, kan naychadangedanget do soli na da Sadrak, Mesak, kan Abednego. Inbilin na a marobroban apoyaw tan maypapito so kakohakohat kan do sīgodaw. 20 Inbilin na pa dyirad kadwan saw a kayiyitan a soldādo do bōyot na a bahoden da sa Sadrak, Mesak, kan Abednego, as kapayongeb da sira do gomilgilāyabaw a apoy. 21 Dawa, nabahod sa a sikakagay, sipapantalon, sitotorban,†3:21 Iyaw “torban,” ki manaro a lamit a machidibedibed do oho no mahakay. kan kadwan pa a insōot da, as naipayongeb sa do gomilgilāyabaw a apoy. 22 Maynamot do kainget no bilin ni āri kan taywara a kakohat no apoyaw, iyaw gilāyabaw no apoy, nangdiman siras napayongebaw sa Sadrak, Mesak, kan Abednego. 23 Ki siraw nya tatdo, ki nasday sa do gomilgilāyab a apoy a nāw da sibabahod.

24 Do dāwri, naychihat a naytēnek si Āri Nebokadnessar do kigtot na, kan inyahes na dyirad mamagbaga naw a kāna, “Na, tatdo sabawriw pinayongeb taw a sibabahod do apoyaya?”

Inatbay da a kon da, “Naon, mo āri.”

25 Ki binata ni āri a kāna, “Chiban nyo pa! Apat dana saya midibidi do apoyaya, kan nakawasak saya a dya naan-ano. As iyaw chapat daya, ki akmayaw anak dan dyos.”

26 Naypasngen si Āri Nebokadnessar do asdepanaw no gomilgilāyab a apoy, kan tinawagan na sa a kāna, “Sadrak, Mesak, kan Abednego a pachirawatan no Katotohosan a Dyos, mohtot kamo kan mangay kamo dya!”

Do dāwri, minohtot sa Sadrak, Mesak, kan Abednego a yapo do apoyaw. 27 Naychichipeh saw pangpangōlo saw, komisyonado, gobirnador, kan mamagbaga saw di āri, as naboya da a siraw tatdwaw a mahahakay, ki naparoparo abaw inawan da. Abaw aran asa lang a boboh do oho da a nasalab. No kagay daw, ki naan-ano aba, kan abaw angot da a mayaaahob.

28 Binata ni Nebokadnessar a kāna, “Madaydāyaw pakono Dyos da Sadrak, Mesak, kan Abednego a nanoboy so anghil na, kan insalākan na sa a pachirawatan na a nagtalek dya. Inkaskāso dabaw bilin ko, otro, ginanaganay da a inparawat byay da a madiman kan mabyayaw a magsīrbi mana magdaydāyaw do matarek a dyos malaksid do mismo daw a Dyos.. 29 Dawa, sichangori, ikeddeng ko a aran sino a tawotawo do tabo nasnasyon kan kapaychirin a maychirin so maikontra do Dyos da Sadrak, Mesak, kan Abednego, ki ipasagsag ko sa, kan payparinen ko bahabahay da a mawpopo a bonton, ta abaw matarek a dyos a makaisalākan so komwan.”

30 Sinpangan na, pinatohos ni āri sa Sadrak, Mesak, kan Abednego do matwatohos a saad do probinsya a Babilonya.