1 Inpaw-it ni Āri Nebokadnessar nya a tolas do tawotawo do tabo nasnasyon kan kapaychirin a omyan do tābo a tana: “Maypaypāngay pakono dyinyo talna kan kaasinso. 2 Chasoyot ko a ipadāmag dyinyo a maynamot dyirad pangilasīnan kan makaskasdāaw saw a pinarin no Katotohosan a Dyos para dyaken.

4 “Yaken si Nebokadnessar, ki myan kaydamnayan ko do palasyo kwaya, kan abaw chitahen ko kan maasinso ako na. 5 Ki do asa kahep, myan tinayēnep ko a nangamomo dyaken. Do nakapaypoktad kwaw do katri ko, nakaboya ako so ladāwan sa kan parmata saw a nangbakebakel dyaken a nagparang do aktokto ko. 6 Dawa, inkeddeng ko a tabo a mamasīrib a mahahakay do Babilonya, ki maiyangay do salapen ko tan ipakatoneng da dyaken iyaw chakey na batahen no tayēnep kwaw.” 7 Sinpangan na, nangay saw magmadmādyik saw, mammālad saw, manalādo saw, kan siraw mamasīrib saw. Inbahey ko dyiraw no tinayēnep kwaw, ki naipakatoneng daba dyaken no chakey na batahen.

8 Do kapanawdyan na, ki somindep si Daniel do salapen ko. (Iya, ki napangaranan so Beltesassar a kangarangaran no dyos ko. Myan dya iyaw ispirito no masantwan saw a dyos.) Inbahey ko dyaw tinayēnep kwaw a kon ko, 9 “Imom Beltesassar a pangōlo dan magmadmādyik saw, chapatak ko a myan dyimo no ispirito no masantwan saw a dyos, kan abaw palīmed a taywara malidyat dyimo. Nyaw tinayēnep kwaw, as kaibahey mo dyaken so chakey na batahen. 10 Nya saw parmata a naboya ko do kapaypoktad ko do katri ko: Chiniban ko asaw a kayo do hobok no tanaya. No kakarang naw, ki taywara a matohos. 11 Nayparakoh kan naypahnyiw nya a kayo. No katohos na, ki nakarapit do kademdeman, as kan maboya do tabo do intīrwaya tana. 12 Mapipintas saw bohobohong na. Āro iyaw no asi na a manawob a kanen tabo. Nachisirong saw bolawaw a animal do sīrok naw, kan myan paw binahayan dan manomanok do sangasanga na. Tabo a parswa, ki nabyay sa do asi na.

13 “Do parmata saw a naboya ko do kapaypoktad ko do katri ko, ki naboya ko asaw a masantwan*4:13 Iyaw nya, ki asa anghil. a natoboy a gominchin a yapo do hanyit. 14 Nangagay so malyak a kāna, ‘Tonghen nyo kayowaya, kan tadāwen nyo sangasanga na saya. Pakarohen nyo saw bohobohong na, kan iwaris nyo saw asi na. Boyawen nyo saw bolaw a animal do sīrok naw kan siraw manomanok do sangasanga na saya. 15 Ki bidinen nyo do tana iyaw tohed†4:15 No ladāwan dya, ki si Āri Nebokadnessar. naw a nabedbed so pasek kan tombāga do katamtamkan.

“ ‘Nolay nyo iya a mabasa so apon a yapo do hanyit, kan nolay nyo iya a machipagyan dyirad bolaw saw a animal kan tametamek no tanaya. 16 Nolay nyo aktokto no katawo na a matādyan so aktokto no bolaw a animal. Nolay nyo pa iya a mahabasan papito a kakāwan.

17 “ ‘Iyaw naikeddengaw, ki inbahey dan natoboy saw. On, sira a masantwan, siraw naychirin so tayoka danaw a naidisisyonan. Tan komwan, maparin dan tabo tawotawo a sibibyay a matonngan a iyaw Katotohosan a Dyos mangitoray siras pagāryan no tawotawo, kan itoroh na do aran sino a chakey na a aran dyirad kabobodisan so saad a tawotawo.’

18 “Nya tayēnep ko a yaken a si Āri Nebokadnessar, ki naboya ko. Changori mo Beltesassar,‡4:18 Iyaw Beltesassaraya, ki si Daniel a mismo. ibahey mo na dyaken iyaw kailawlawag na, ta aba dyirad tabo a mamasīrib a mahahakay do pagāryan ko iyaw makaipakatoneng dyaken so chakey na batahen. Ki maparin mo, ta myan dyimo iyaw ispirito no masantwan saw a dyos.”

19 Sinpangan na, si Daniel a natawagan so Beltesassar, do dēkey a ōras, ki taywara a chinakigtot na, kan binakebakel no kapangtokto na. Ki binata ni āri dya a kāna, “Mo Beltesassar, palobōsan mwabaw tayēnep mana iyaw kailawlawag na a mangriribok dyimo.”

Ki tominbay si Beltesassar a kāna, “Mo āpo ko, maipākat pakono iyaw nyaya tayēnep dyirad mangipsokaw dyimo, as kan no kailawlawaganaw, ki dyira dan kabōsor mo! 20 Iyaw kayo a naboya mo, ki nayparakoh kan naypahnyi. No katohos na, ki nakarapit do kademdeman, as kan maboya do tabo intīrwaya tana. 21 Mapipintas saw bohobohong na. Āro iyaw asi na a manawob a kanen tabo. Nachisirong saw bolaw a animal do sīrok naw, kan myan binahayan dan manomanok do sangasanga na. 22 Imom āri, ki akma kas kayowaw a nayparakoh kan naypahnyi. On, naypabīleg ka, kan akma kay makarapit do kademdeman. No kapagāri mo, ki nayyatyat a manda do pachipandan no tanaya.

23 “Sinpangan na, naboya mo asaw a masantwan a natoboy a gominchin a yapo do hanyit, kan batahen na a kāna, ‘Tonghen nyo kayowaya kan rārayawen nyo. Ki bidinen nyo do tana iyaw tohed na a nabedbed so pasek kan tombāga do katamtamkan. Nolay nyo iya a mabasa so apon a yapo do hanyit, kan nolay nyo iya a machipagyan dyirad bolaw saw a animal mandan mahabasan papito a kakawan.’

24 “Iyaw nyaw kailawlawagan no tayēnep mwaya mo āri, kan nyaw inkeddeng no Katotohosan a Dyos a maparin anchi dyimom āpo a āri ko. 25 Mapaksyat kanchi a machibawa do tawotawo, kan machipagyan kanchi dyirad bolaw saw a animal. Koman kanchi so tamek a akma siras bāka, kan mabasa kanchis apon a yapo do hanyit. Papitonchi a kakāwan homabas dyimo mandan matonngan mo a iyaw Katotohosan a Dyos mangitoray siras pagāryan no tawotawo, kan itoroh na do aran sino a chakey na. 26 Iyaw bilinaw a kabidin no tohed naw no kayo, ki nyaw chakey na batahen. Mapaybidinchi dyimo pagāryan mo anchan bigbigen mo a iyaw Dyos do hanyit, ki mangitoray do intīrwaya a tana. 27 Dawa, mo āpo āri, omno pakono dyimo iyaw balākad kwaya. Machisyay ka na do gatogatos mo do kapamarin mo na so malinteg. Dichodan mo sīgod saw a marahet a dadakay mo do kāsi mo a somidong siras mapopobri. Ta aranchi a matongtong kaasinso mo.”

28 Siraw nya sa a tabo, ki naparin di Āri Nebokadnessar. 29 Do nakapakahabas no dadwa poho kan dadwa a kabohan, do kayanaw ni āri a mayayam do atepaw no palasyo na do Babilonya, 30 binata na a kāna, “Āngwa karakoh no syodad a Babilonya!§4:30 Myan syodad kan probinsya a mayngaran so Babilonya. Pinatnek ko nya do mabīleg a panakabalin ko a pagyanan ko, kan do dayag no katan-ok ko.”

31 Madama pa a maychiychirin do kayan naw no tīmek a yapo do hanyit a kāna, “O Āri Nebokadnessar, nyaw naikeddeng para dyimo: Iyaw no pagāryan mwaya, ki mapakaro dana dyimo. 32 Mapaksyat kanchi a machibawa do tawotawo, kan machipagyan kanchi dyirad bolaw saw a animal. Koman kanchi so tamek a akmay bāka. Papitonchi a kakāwan homabas dyimo mandan matonngan mo a iyaw Katotohosan a Dyos mangitoray siras pagāryan no tawotawo, kan itoroh na do aran sino a chakey na.”

33 Do dāwri, nanyeng a natongpal iyaw naibaheyaw a maynamot di Nebokadnessar. Napaksyat a nachibawa do tawotawo. Komninan so tamek a akmay bāka. Nabasa so apon inawan na a yapo do hanyit. Naypananaro iyaw no boboh na a akma danas boboh naw no kangkang, kan naypananaro saw koko na akmay koko no manomanok.

34 Sinpangan na, binata ni Nebokadnessar a kāna, “Do katayoka no nawri a papito a kakāwan, tomnangay ako do hanyit, kan naybidi danaw kapangtokto ko a maganay. Indaydāyaw ko iyaw Katotohosan a Dyos, kan intoroh ko dāyaw kan dayag dya a iyaw mabyay a abos pandan.

36 “Do dāwri met, do nakapaybidi no kapangtokto kwaw a maganay, ki naybidi pa dyaken iyaw dāyaw kan tan-ok ko a para do dayagaw no pagāryan ko. Rinawat da yaken mamagbaga kan magtoray ko saw. Napatnek ako a minirwa do pagāryan ko, kan rakorakoh paw dāyaw ko kan nanmaw. 37 Sichangori, yaken a si Nebokadnessar, idaydāyaw kan itan-ok ko iyaw Āri no hanyit. Ta tabo kaparin na, ki malinteg, kan nainkalintegan a tabo pariparinen na. An sino iyaw mapatohos so inawan na, maparin na a pabodisen.”